ТРИУМФ НА „НЕТФЛИКС“ НА ДОДЕЛУВАЊЕТО НА „ЕМИ“ Седум награди за „Круна“

„Нетфликс“ ги освои највредните статуетки на овогодишните „Еми“ награди. Меѓу нив, британската серија за кралското сeмејство „Круна“ (The Crown) е прогласена за најдобра драма, а „Гамбит на кралицата“ (Queen’s Gambit) е најдобра мини-серија.

Приказната за британското кралско семејство донесе седум „Еми“, додека сериите „Гамбит на кралицата“ и „Халстон“ го зголемија бројот на освоени награди на вкупно 10.

Серијата „Тед Ласо“ ги собра одличјата за најдобра комична серија, најдобар главен глумец во комична серија (Џејсон Судејкис), како и женска и машка споредна улога (Хана Вадингам и Брет Голдстејн). ТВ-серијата на стрим-платформата „Епл ТВ плус“ освои вкупно седум „Еми“ статуетки.

Оливија Колман и Џош О’Конор од „Круна“ ги освоија телевизиски драмски награди за главни улоги. Колман и О’Конор ги глумеа кралицата Елизабета Втора и принцот Чарлс.

Кејт Винслет е прогласена за најдобра актерка, за мини-серијата „Кобилата од Исттаун“ (Mare of Easttown), а Јуан Мекгрегор победи со улогата на моден дизајнер во „Халстон“.

Трофеите за „Круна“ вклучуваат најдобра драмска серија, плус четири актерски победи за Џилијан Андерсон, Оливија Колман, Џош О’Конор и Тобиас Мензес.

„Каков прекрасен крај на најнеобичното патување со ова прекрасно семејство“, рече Колман за нејзината последна серија во улогата на кралицата Елизабета Втора.

„Ја сакав секоја секунда и едвај чекам да видам што ќе се случи понатаму “.

А потоа во емотивен наплив, таа додаде: „Би сакала татко ми да беше тука да го види ова. Го изгубив за време на Ковид. Многу ќе му се допаднеше сето ова.”