ТРАМП ОДЛУЧИЛ ДА ЈА НАПАДНЕ ВЕНЕЦУЕЛА? Новата војна може да почне уште вечерва

Администрацијата на американскиот претседател Доналд Трамп одлучи да нападне воени објекти во Венецуела, а нападите би можеле да се случат во секој момент, изјавиле извори запознаени со ситуацијата за Мајами Хералд, додека САД се подготвуваат да ја почнат следната фаза од својата кампања против нарко-картелот Солес.

Планираните напади, најавени и од „Волстрит џурнал“, ќе бидат насочени кон уништување на воени објекти што ги користи нарко-организацијата, за која САД тврдат дека ја предводи венецуелскиот автократ Николас Мадуро и ја  управуваат врвни членови на неговиот режим.

Извори изјавија за Мајами Хералд дека целите – кои би можеле да бидат погодени од воздух во рок од неколку дена или дури и часови – исто така имаат за цел да ја „обезглават“ хиерархијата на картелот.

Американските претставници веруваат дека картелот извезува околу 500 тони кокаин годишно, поделени помеѓу Европа и САД.

Иако изворите одбија да кажат дали самиот Николас Мадуро е цел, еден од нив рече дека „нема време“.

– Мадуро наскоро ќе сфати дека е заробен и дека можеби нема да може да ја напушти земјата дури и ако одлучи. Уште полошо за него, сега има повеќе од еден генерал подготвен да го фати и да го предаде, целосно свесни дека едно е да се зборува за смрт, а друго да се гледа како доаѓа – рекол изворот.

Вашингтон ја дуплираше наградата за информации што би довеле до апсење на Мадуро на 50 милиони долари – најголемата награда од ваков вид што некогаш беше понудена. Моментално нуди и по 25 милиони долари за апсење на некои од неговите најблиски соработници, вклучувајќи го и министерот за внатрешни работи Диосдадо Кабаје, за кој се верува дека ги води операциите на картелот. Друг клучен член на режимот кој се соочува со американски обвиненија за трговија со дрога е министерот за одбрана Владимир Падрино Лопес.

Кога во август ја објави одлуката за удвојување на наградата на Мадуро од 25 милиони долари на 50 милиони долари, американската државна обвинителка Пам Бонди рече дека Мадуро го предводи картелот Солес – организација за дрога со корени во венецуелската војска – и соработува со групи како што се венецуелската банда Трен де Арагва, мексиканскиот картел Синалоа и други транснационални криминални мрежи. Бонди го нарече Мадуро „еден од најголемите дилери на дрога во светот и закана за нашата национална безбедност“, додавајќи дека зголемувањето на наградата има цел да ја „затегне мрежата“ околу него.

Американската војска нагло го зголеми своето присуство покрај брегот на Венецуела како дел од операција за која Белата куќа вели дека има за цел да го спречи шверцот со дрога и криминалните мрежи поврзани со режимот во Каракас. Еден од првите потези на претседателот Доналд Трамп по враќањето во Белата куќа во јануари 2025 година беше да му наложи на Стејт департментот да ги означи одредени нарко-картели како терористички и транснационални криминални организации – меѓу нив Трен де Арагва, а подоцна и Солес.

Во август, САД почнаа да собираат голема воена група во јужниот дел на Карипското Море, во близина на северна Венецуела, формирајќи Заедничка работна група која првично вклучуваше три разорувачи – опремени за противвоздушна, противподморничка и ракетна одбрана – и амфибиска група од околу 4.500 војници. Мисијата, исто така, вклучува поморски патроли со извидувачки авиони П-8, како и летови за надзор на долг дострел за мапирање на рутите за трговија со дрога.

Во септември, распоредувањето беше засилено со 10 ловци Ф-35Б стационирани во воздухопловната база Сеиба во Порторико и вооружени беспилотни летала MQ-9 Reaper на аеродромот Рафаел Хернандез на островот. Американските претставници велат дека авионите можат да извршат прецизни напади врз лаборатории, тајни писти, возила или бродови поврзани со операции со дрога.

На 24 октомври министерот за одбрана Пит Хегсет им нареди на носачот на авиони УСС Гералд Р. Форд и неговата борбена група – вклучувајќи еден крстосувач и 3 разорувачи, да влезат во Карипското Море. Борбената група на носачи на авиони, со повеќе од 4.000 лица и околу 90 борбени авиони, беше опишана од пензионирани венецуелски офицери кои разговараа со Хералд како ‘рбет на „финалната фаза“ насочена кон неутрализирање на лидерите на картелите и за извршување напади врз фиксни и мобилни цели во Венецуела.

Досега, овие сили главно се користеа во поморски операции. До оваа недела, американските напади беа насочени кон моторни чамци за кои администрацијата вели дека превезувале наркотици – повеќето пресретнати покрај брегот на Венецуела. 61 осомничен трговец со дрога беа убиени во тие напади. Администрациските претставници велат дека работната група наскоро ќе ги префрли операциите на копно бидејќи шверцерите сега се помалку подготвени да ризикуваат со бродови што би можеле да бидат откриени и нападнати на море.

Самата големина на распоредените сили доведе многу аналитичари до заклучок дека крајната цел на мисијата е да се собори режимот на Мадуро, иако американските претставници не дадоа многу детали за планираните акции во Венецуела. Повеќето експерти се сомневаат дека САД имаат намера за долгорочна окупација.