ТОПЛОТЕН БРАН ВО ГРЦИЈА, СО 110 ДРОНА СЕ ВРШИ НАДЗОР ЗА ПОЈАВА НА ПОЖАРИ Годинава се уапсени 308 лица за подметнување пожар

Температури до 38 Целзиусови степени се очекуваат во текот на денешниот ден во Грција, што дополнително ќе се зголемат за викендот, а според прогнозите, земјата, веројатно, до средината на следната седмица ќе биде зафатена од мини топлотен бран, што во одредени делови ќе донесе и температури од над 40 степени.

Алтернативниот портпарол на противпожарната служба на Грција, Јанис Артопиос, во интервју за државната телевизија ЕРТ посочи дека пожарникарите се во состојба на оперативна подготвеност „во пресрет на новите метеоролошки прогнози за високи температури, кои во комбинација со влагата, со засилените ветрови, може да создадат проблеми“.

– Како што е познато, имаме 110 дрона во целата земја, кои ги надгледуваат чувствителните и стратешки важните подрачја во целата земја, меѓу кои и шумските екосистеми. Овие дронови, кои 24 часа надлетуваат, може да откриваат шумски пожари и жаришта, а во одредени случаи да помогнат и во идентификувањето можни сторители, кои подметнуваат пожари – посочи Артопиос.

Во однос на подметнувачите на пожар, намерно или од невнимание, тој објасни дека од почетокот на годината уапсени се 308 лица, а мнозинството од нив (272 уапсени) стојат зад случаи на пожари предизвикани од невнимание.

Тој нагласи дека иако противпожарните сили се во целосна готовност, сепак „ниту најголемата можна оперативна мобилизација не може да ја замени личната одговорност и превенцијата“ и затоа апелира до граѓаните да бидат внимателни.