СПИЈАТ НА ТЕНОК ДУШЕК ПОСТАВЕН НА МЕТАЛ И СО ЕДНО ЌЕБЕ Бруклински „пекол“ за Мадуро и сопругата
Сурови услови, ограничен контакт и засилени безбедносни мерки го означуваат почетокот на притворот на поранешниот венецуелски претседател и неговата сопруга во Њујорк.
Поранешниот венецуелски претседател Николас Мадуро и неговата сопруга Силија Флорес сега се соочуваат со сурова реалност во Метрополитенскиот притворски центар (MDC) во Бруклин, Њујорк. Познат по строгите услови и засилените безбедносни мерки, центарот е една од најозлогласените затворски установи во САД.
Како што известува Си-Ен-Ен, Мадуро и Флорес се сместени во одвоени ќелии и се изолирани од општата затворска популација. Престојот во изолација, познат како Посебна станбена единица (SHU), значи дека тие поминуваат до 23 часа дневно заклучени, со ограничен пристап до активности надвор од ќелиите.
– Тоа е навистина пекол. Климатизацијата е лоша, греењето исто така. Секој затвореник добива едно волнено ќебе, а спие на тенка комбинација од душек и перница дебела околу пет сантиметри, поставени на метална плоча – ја опиша ситуацијата во притворот сојузниот затворски консултант Сем Менгел.
Претходниот директор на Сојузното биро за затвори, Хју Хурвиц, додава дека двојката веројатно нема редовен меѓусебен контакт, освен доколку се совпаднат термините за средби со адвокатите.
– Во неговиот случај, станува збор за сериозен безбедносен ризик. Никој не знае како би реагирале другите затвореници, особено припадници на банди или картели, па неговото вклучување во општата популација би претставувало огромен ризик за установата – вели Хурвиц.
„MDC“ е познат по лошите услови, честите прекини на струја и хроничниот недостиг од персонал. Адвокатите и затворениците без задршка ја опишуваат установата како „одвратна“ и „ужасувачка“. Во текот на 2024 година таму беа убиени двајца затвореници, а властите сè уште се под притисок по случајот со Џефри Епстин, кој изврши самоубиство во друг њујоршки притвор во 2019 година.
На судското појавување на 5 јануари, Мадуро и Флорес се изјаснија дека не се виновни по обвиненијата за трговија со дрога и оружје. Судот ги информираше за правото на консултации со конзуларни претставници на Венецуела.