СИЛНИ ЗБОРОВИ ОД КРЕМЉ, РУСИЈА ВЕТУВА ПОДДРШКА ЗА ИРАН Путин се сретна со Арагчи во Санкт Петербург
Путин и Арагчи во Санкт Петербург разговараа за стратешката соработка, состојбите во регионот и потребата од побрзо постигнување мир.
Рускиот претседател Владимир Путин се сретна со иранскиот министер за надворешни работи Абас Арагчи, јавија руските новински агенции.
– Почитуван господине министер, драги пријатели, дозволете ми срдечно да ве поздравам овојпат во Санкт Петербург. Би сакал на почетокот на разговорите да напоменам дека минатата недела добив порака од врховниот лидер на Иран – рече рускиот претседател на почетокот на средбата со иранската делегација предводена од Арагчи.
– Би сакал да ве замолам да ги пренесете моите најискрени благодарности за таа порака и да потврдам дека Русија, исто како и Иран, има намера да ги продолжи нашите стратешки односи – додаде рускиот лидер.
Путин изјави дека Русија се надева оти иранскиот народ ќе го надмине сегашниот „тежок период“ и дека мирот ќе победи.
– Секако, многу се надеваме дека, водени од храброста и стремежот за независност, иранскиот народ, под раководство на својот нов лидер, ќе го надмине овој тежок период на искушенија и дека мирот ќе победи – изјави рускиот претседател.
Русија ќе направи сè во интерес на Иран и на другите земји во регионот, додаде Путин, цитиран од државната новинска агенција РИА.
– Од своја страна ќе направиме сè што одговара на вашите интереси, на интересите на сите народи во регионот, за овој мир да биде постигнат што е можно побрзо. Добро ја знаете нашата позиција – рече рускиот претседател.
– Гледаме колку храбро и херојски се бори народот на Иран за својата независност и својот суверенитет – истакна Путин.
– Како што правилно забележавте, пред целиот свет беше докажано дека иранскиот народ, благодарение на својот отпор, храброст и дух, успешно се избори против американските напади и агресија. Иран го издржа сето тоа и ќе опстои и во иднина – рече тој.
JUST IN – Iran’s FM Araghchi and Putin shake hands and hold a meeting in Moscow. pic.twitter.com/qG3QtiRugu
— Disclose.tv (@disclosetv) April 27, 2026
Арагчи му се заблагодари на Путин за поддршката за Иран.
– Благодарни сме за цврстата и силна поддршка за Иран – рече шефот на иранската дипломатија.
Тој исто така му се заблагодари на Путин за сочувството „во врска со маченичката смрт на покојниот врховен лидер, ајатолахот Али Хамнеи“.
Арагчи изрази и „посебна благодарност“ за тоа што рускиот лидер веднаш му честитал на новиот врховен лидер на Иран за неговото именување – ајатолахот Моџтаба Хамнеи.