СДСМ Е НАЈДЕМОКРАТСКАТА ПАРТИЈА ВО ДРЖАВАТА, ПОЧИТУВАМЕ РАЗЛИЧНИ СТАВОВИ Кузеска му одговори на Шилегов
Немаме намера да навлегуваме во лични напади, и остануваме посветени на демократските принципи кои ги почитуваат различните ставови, но во рамките на цивилизиран дијалог, рече портпаролката на СДСМ, Богданка Кузеска.
Портпаролката на СДСМ Богданка Кузеска денеска на прес-конференција, коментирајќи ги објавите на ексградоначалникот на Скопје, Петре Шилегов, изјави дека СДСМ имаше легитимни внатрепартиски избори на кои го избра новиот лидер во постапка во која учествуваа дури четворица кандидати.
– СДСМ е најдемократска партија во државата која единствена го бира својот претседател на демократски и непосредни избори. Оттаму легитимитетот на претседателот на СДСМ не може да се оспорува. Немаме намера да навлегуваме во лични напади, и остануваме посветени на демократските принципи кои ги почитуваат различните ставови, но во рамките на цивилизиран дијалог – рече Кузеска.
Инаку, Шилегов ноќеска објави Фејсбук статус преку кој обвини дека СДСМ е заробена партија.
„СДСМ е заробена партија. Уште од 2019 година. Со двајца октроирани „лидери” од јужните краишта. Тоа не е СДСМ. Тоа се тезгароши. Од Милановац. Горњи или Долни. Март е пролет!!! Пролет е СДСМ!!!!“, напиша Шилегов.
Подоцна тој објави уште еден статус како појаснување на првиот:
„1.000 зошто, едно затоа: За да нема нејаснотии, бидејќи имам многу јавувања, многу пораки, многу коментари: ако нешто не е во ред и гледаш дека е така, а молчиш, со молкот стануваш соучесник… Ете затоа“, наведува Шилегов.