РЕФОРМИТЕ СЕ КЛУЧНИ ЗА ЕКОНОМСКИ РАСТ Владите ќе треба да им помогнат на компаниите да останат на глобалниот пазар

За да може економијата да креира раст и работни места, во услови на трговска војна, на компаниите треба да им се овозможи да ја зајакнат конкурентноста преку инвестиции и иновации, вели министерката за финансии. 

64

Целосна имплементација на новиот Закон за буџети и усвојување на конкретни мерки за фискална консолидација, намалување на дефицитот, зајакнување на ефикасноста на прибирање на приходите во буџетот, се дел од препораките за земјава содржани во заедничките заклучоци од 11. Економски и финансиски дијалог меѓу ЕУ и земјите кандидати за членство  во Брисел.

Министерката за финансии Гордана Димитриеска-Кочоска која учествување на состанокот рече дека овие заклучоци се на линија на реформите предвидени со реформската агенда и со Програмата за реформи во управувањето со јавните финансии.






Таа смета дека во услови на глобална економска нестабилност, фискалната политика треба да  одговори на неизвесностите присутни во глобалната и домашната економија.

– Значајно за приватниот сектор е подготвеноста на нашите влади да обезбедат квалитетна даночна политика, квалитетна инфраструктура, расположива и квалитетна работна сила, пристапна енергија, помал административен товар и правна рамка којашто ќе овозможи креирање на регионални синџири на снабдување. Она што ние како креатори на политики и носители на одлуки треба да размислиме  и одлучиме е како да се креира динамично деловно окружување кое ќе им помогне на нашите компании брзо да се прилагодат на сегашната остра конкуренција на глобалниот пазар – рече Димитреска Кочоска.

Според неа, владата е посветена на реформи фокусирани на дигитална трансформација, одржлива енергетска транзиција, јакнење на човечкиот капитал, јакнење на владеењето на правото и подобро управување со јавните финансии.

Дискусијата на годинешниот Економски и финансиски дијалог беше фокусирана на конкурентноста на Европа во контекст на сегашните геополитички случувања и потребата за поедноставување на правната рамка со цел намалување на административниот товар врз компаниите.

За да може економијата да креира раст и работни места, во услови на трговска војна, на компаниите треба да им се овозможи да ја зајакнат конкурентноста преку инвестиции и иновации.

На Економски и финансиски дијалог во Брисел учествуваат министрите на тековното и двете последователни претседателства со Советот на ЕУ, претставници на земјите членки на ЕУ, претставници на Европската комисија, Европската централна банка, Европска инвестициска банка, како и министрите за финансии и гувернерите на централните банки од земјите на Западен Балкан, Турција, Грузија, Молдавија и Украина

Поврзани содржини