ПРЕГОВАРАЧКАТА РАМКА Е ЅИД ЗА НОВИ БУГАРСКИ УЦЕНИ Софија веќе не може да пробие во Брисел со нови барања

Поранешниот министер за надворешни работи, Бујар Османи сè уште смета дека новата македонска влада е нелегитимна, бидејќи, како што рече, „нема легитимитет од албанскиот народ“.

– Во принцип не треба ни да даваме предлози до власта која ја сметаме за нелегитимна – рече Османи синоќа во гостување на Канал 5.

Во врска со преговорите со ЕУ, Османи вели дека на власта ѝ давал политички идеи како поранешен министер, а не како член на ДУИ.

– Не дадов законски предлог, дадов политички идеи и тоа не како член на ДУИ, туку како поранешен министер за надворешни работи, затоа што овде се обидуваме да бидеме партнери на Европската Унија, дури и со нелегитимна влада – рече Османи.

За спорот со Бугарија Османи вели дека за нас било важно да се заклучат прашања кои се стожерот на нашите позиции како држава.

– Преговарачката рамка има изградено ѕид, бугарските барања да бидат само домашна политичка реторика. Тие не можат да ја пробијат Преговарачката рамка. Оттука се обидувам да ѝ објаснам на Владата и на тие што одлучуваат дека во Бугарија постојано ќе има избори и партии кои ќе се обидуваат да добијат политички поени, но тие прашања можеа да пробиваат до ЕУ до кога не беше Преговарачката рамка. Оттука не е исто. Изградивме ѕид од нови бугарски барања, а тој има само неколку пори и се однесуваат на човековите и малцински прашања – рече Османи.