ПЕКИНГ ГИ ОТФРЛИ ОБВИНУВАЊАТА НА ТРАМП „Целосна измислица е дека Кина се мешала во изборите во САД“
Лин рече дека Кина постојано го почитува принципот на немешање во внатрешните работи на други земји и нема интерес да влијае на изборите во САД.
Портпаролот на кинеското Министерство за надворешни работи, Лин Џиан, денес изјави дека Кина ги отфрла тврдењата на американскиот претседател Доналд Трамп дека се мешале во изборите во САД, оценувајќи ги како неосновани и злонамерни.
На редовната прес-конференција, Џиан рече дека ваквите обвинувања се „целосно измислени“ и дека одамна е докажано дека немаат основа во фактите.
Тој, исто така, ги обвини САД за мешање во внатрешните работи на други земји, за вршење надзор на влади, компании и граѓани низ целиот свет, како и за собирање податоци за странски државјани.
– Ја повикуваме американската страна да ги преиспита своите постапки, да престане со неоснованите обвинувања против Кина и да не ја користи Кина како тема во изборната политика – рече Лин.