Османи: Сите патишта водат кон Мала Речица

Портпаролот на ДУИ, Бујар Османи на својот Фејсбук профил објави „математичка“ пресметка дека на оваа партија и е сеедно со кого ќе коалицира во формирањето на идната Влада и дека сите патишта водат кон Мала Речица.

Османи, всушност, посочува дека СДСМ и Беса, односно коалицијата „Можеме“, практично, има ист број мандати (46) колку што би имале и ВМРО-ДПМНЕ (44) и Левица, која стана парламентарна партија освојувајќи два мандати. Од тоа излегува дека барем „математички“ за ДУИ би било сеедно дали во идната влада ќе коалицира со СДСМ и Беса, за кои Османи наведува дека поединечно имаат 42 плус 4 пратеници или со ВМРО-ДПМНЕ е со Левица. Односно, дека и во двата случаи крајниот резултат би бил 61 пратеник, што е минимумот за формирање парламентарно мнозинство и за добивање на мандатот за формирање влада.