НИ ТРЕБА РЕШЕНИЕ БАЗИРАНО НА ПРИНЦИПИ, НЕ НА ОТСТАПКИ Муцунски сака јасна мапа и гаранции за европскиот пат

Македонија  и македонските граѓани немаат капацитет за уште билатерални отстапки кон соседите, а такви имаше безброј во изминатите 30 години, смета министерот за надворешни работи Тимчо Муцунски. На прес-конференција во министерството тој рече дека потребен е јасен пат за ЕУ со гаранции дека нема да имаме нови условувања од Бугарија или од други земји.

– Дали е ова последната отстапка која се бара од нас? Треба да исцртаме мапа за јасно членство, предвидлив пат. Нема да биде лесно, ова ќе биде тешко решение, но базирано на принципи. Процесот ќе биде значаен и за кредибилитетот на ЕУ, која верувам дека не смее да си дозволи земјите кандидати да имаат сомнеж дека Унијата не е искрена во своите намери – изјави министерот одговарајќи на новинарско прашање.

Муцунски вели дека дијалог меѓу страните имало во последните 6 месеци, но и дека Владата јасно и гласно зборувала за своите идеи за решенија со челниците во Европа.

– Први потпишавме стратешки аранжман со ЕУ со што силно ја потврдивме нашата евроатлантска посветеност. Усвоивме и реформска агенда, која, парафраизрам, беше наречена најдобра агенда во регионот – истакна министерот.

Македонскиот премиер Христијан Мицкоски денеска изјави дека Македонија нема да прави нови отстапки, но ќе продолжи силно да ги промовира европските вредности.

Мицкоски и првиот македонски дипломат Муцунски во вторник заедно ќе одат на самит во Брисел каде што треба да ги повторат своите позиции и предлози за европскиот пат. Муцунски рече дека пристапот на Владата повеќепати бил јавно искажан и е зацртан и базиран на принципи.