НЕМА НОВИ ПАРЛАМЕНТАРНИ МНОЗИНСТВА Власта ќе го слуша гласот на народот и ќе се менува

Разобличени се сите дезинформации во јавноста за наводни нови парламентарни мнозинства. Сите партии од коалицијата јасно потврдија дека имаме парламентарно мнозинство и владина коалиција која е стабилна, обединета, коалиција која го води нашето општество напред, силна и сплотена, соопшти денеска СДСМ.

„Продолжуваме да работиме посветено, заедно за доброто на граѓаните. Пред нас имаме друг предизвик. Граѓаните ни упатија критика. А, ние тој став го слушаме и го уважуваме. Свесни сме дека повеќе нема толеранција за повторување на истите грешки. СДСМ ги слуша луѓето, не гази врз нив. СДСМ учи од грешките. Постојано се менуваме и ги поправаме грешките за да обезбедиме подобар живот за граѓаните. Ние сме демократска партија која се менува после критика. СДСМ од понеделникот влезе во процесот на унапредување на комуникација со граѓаните и на тој начин стануваме уште подостапни за народот и ги зајакнуваме механизмите за брз одговор на сите потреби. Од овој момент, постапуваме по насока која ја дава народот“, велат од партијата.

Оттаму повикуваат на обединување и граѓаните да го дадат гласот за напредокот на државата.

СДСМ во вториот круг влегува во 40 општини меѓу кои и Град Скопје.

„Токму Скопје ја влече државата напред. Скопје е наше, на сите. Пред сѐ, на скопјани, но и на Македонците, Албанците, Турците, Србите, Власите, Ромите, Бошњаците и другите. Напредокот е невозможен ако Скопје продолжи назад. Гласот за СДСМ на 31 октомври е глас за живот во слобода и демократија, со власт која слуша и се корегира, а не со режимска власт пред која народот молчи. Да се обединиме околу идејата која води напред, во иднината, кон подобар живот и слободно утре. Ние знаеме како тоа да го овозможиме. Обединети!“, порачаа од СДСМ.