ВАСЕВ И НУХИ ОДАТ ВО КУЌЕН ПРИТВОР Судот го одби барањето на Обвинителството

Поранешниот медицински директор на Клиниката за онкологија, д-р Нино Васев, и поранешниот организациски директор Нехат Нухи, обвинети во случајот „Онкологија“, ќе се бранат од слобода. Основниот кривичен суд Скопје донесе одлука за домашен притвор за двајцата, иако Обвинителството бараше ефективен притвор поради опасност од бегство и тежината на делата за кои се товарат.

„Основниот кривичен суд Скопје, постапувајќи по предлог на Основното јавно обвинителство Скопје, за определување мерки за обезбедување присуство против две лица, доставен до судот заедно со обвинителниот акт за предметот во јавноста познат како ‘Онкологија’, по одржана седница во присуство на странките донесе решенија со кои против обвинетите Н.В. и Н.Н. се определува мерка куќен притвор“, соопшти судот.

Судот одлучи и дека остануваат во сила и претходно определените мерки на претпазливост – одземање на патна исправа и забрана за нејзино издавање, повикувајќи се на член 165 став 1 точка 1 од Законот за кривична постапка, односно опасност од бегство. Против оваа одлука странките имаат право на жалба до Апелациониот суд Скопје.

Од друга страна, Јавното обвинителство беше категорично дека притворот е неопходен.

„Основното јавно обвинителство Скопје, заедно со поднесените обвиненија во предметот Онкологија, до Основниот кривичен суд вчера поднесе и предлог за определување мерка притвор за двајца обвинети – медицинскиот и организацискиот директор на ЈЗУ Универзитетска клиника за радиотерапија и онкологија Скопје“, се наведува во соопштението.

Обвинетите се товарат за злоупотреба на службената положба, проневера и измама, додека биле на раководните функции. Обвинителството истакна дека за делата се запретени високи затворски казни, а нанесена е и значителна имотна штета на државниот буџет.

„Последицата од сторените кривични дела може да влијае врз мотивот на обвинетите да се дадат во бегство“, нагласуваат од обвинителството, додавајќи дека со поднесувањето на обвинението е подигнат степенот на сомнение и извесноста од санкционирање за нивните противправни дејствија.

Во соопштението се посочува и дека поради опасност од бегство, за уште тројца обвинети лекари онколози се предложени мерки на претпазливост – привремено одземање на патна исправа или забрана за нејзино издавање.

„Ваквите мерки се неопходни за непречено водење на кривичната постапка“, велат од Обвинителството.