Најмалку 4 лица се загинати, 2.000 куќи се уништени, а од воздух делува како да паднала атомска бомба (ВИДЕО)

Невреме со град со големина на тениски топчиња и торнадото кое мина синоќа низ седум села на југот на Чешка однесе најмалку четири животи и оштети или уништи, како што рече премиерот Андреј Бабиш, околу 2.000 куќи.

Торнадото, кое ретко се гледа во Чешка во регионот на Јужна Моравија, на границата со Австрија и Словачка, уби најмалку четири лица, јави Чешката телевизија.

– Ова е навистина апокалипса. Две илјади оштетени куќи, ние мора да сториме сè за да им помогнеме на овие луѓе. Сакам да видам сам што ќе им треба – рече премиерот Бабиш, кој од денешниот самит на ЕУ лета директно кон регионот на Јужна Моравија во посета на најтешко погодените села.

Десетици повредени лица се пренесени во болниците во Бржецлав, јужно од Брно и Ходонџин, екипите на брзата помош и спасувачите пружиле итна помош на самото место, а се проценува дека биле повредени скоро 200 лица.

– Торнадото беше со силина од 219 километри на час. Така, тој едноставно ги исчисти куќите, автомобилите или дрвјата пред него. Не е исклучено брзината на ветерот на некои места да е поголема. Материјалната штета одговара на последиците од торнадото со интензитет „F3“ на скала од пет степени. Степенот „F3“ значи дека брзината на ветерот е помеѓу 254 и 332 км на час“ – изјави метеорологот Дагмар Хонсова.

Во Чешка, каде што, за разлика од соседна Полска, торнадото се случува исклучително ретко, според Хонсова, па многу е тешко да се предвиди неговата појава.

Во селото Хрушки, кое е едно од четирите најпогодени села, половина од куќите се претвориле во урнатини, пренесуваат чешките медиуми.

Министерството за локален развој веднаш издвои околу 17 милиони евра во буџетот како помош за реконструкција, бидејќи некои куќи се толку оштетени што ќе мора да бидат урнати, а луѓето од погодените области веќе можат да сметаат на итна прва помош од околу 2.300 евра.

Добротворните организации на црквата и невладините хуманитарни организации започнаа со собирање помош за луѓето од селата од Јужна Моравија кои останаа без покрив над главата, Чесите масовно испраќаат помош, а веќе утрово, во текот на првиот час кога започна собирањето на помошта, веќе биле донирани 400.000 евра.

Околу 75.000 домаќинства се без електрична енергија, 2.000 без гас, а неколку десетици предаватели не пренесуваат сигнали за мобилна телефонија.

Претседателот на регионот на Јужна Моравија, Јан Гролих, апелираше до евакуираните од седумте села низ кои помина торнадото, дека засега, додека спасувачката и противпожарната единица и полицијата се на терен, тие да не се обидуваат да стигнат до своите куќи.

– Тоа е многу опасно. Голем број оштетени куќи чекаат да бидат срушени, најпрво структурните инженери мора да ги прегледаат. Издржете, ќе ни треба вашата помош – рекоа властите на јужноморавскиот регион.

Градоначалникот на Бржецлав, Сватоплук Пјечек, исто така, апелираше до Чесите да се откажат од торнадо-туризам и да не ја посетуваат погодената област од огромна љубопитност, што често се случуваше по катастрофалните поплави.

Метеоролозите предвидуваат променливо време со летни бури во Чешка во наредните денови, но наведуваат и дека веројатноста некаде да се случи торнадо е многу мала.

Секоја година се појавуваат околу 300 торнада во Европа, најчесто од Франција до Централна Европа, но Чешка не е на европската „алеја на торнада“, како што ја нарекуваат метеоролозите.