Мицкоски, Села и Гаши со една нога во предизборна коалиција за локалните

Можно ли е најголемото изненадување на претстојните локални избори да биде предизборна коалиција помеѓу опозициските ВМРО-ДПМНЕ и Алијанса за Албанците и Алтернатива? Засега и во македонскиот и во албанскиот опозициски блок тактизираат и не откриваат дали е можен договор за соработка меѓу лидерите Христијан Мицкоски, Зијадин Села и Африм Гаши, особено по изјавите на владините партнери Зоран Заев и Али Ахмети дека не исклучуваат меѓусебна соработка, како за локалните во 2017 година.

Доколку ВМРО-ДПМНЕ и АА-А се решат на таков чекор тогаш и за едните и за другите ќе биде првпат да коалицираат уште во првиот изборен круг.

Функционер од ВМРО-ДПМНЕ за Плусинфо вели дека сите опции се во игра, но дека сè уште не е решено како ќе настапат на локалните во октомври.

– Сите опции се отворени од самостоен настап со коалицијата, предизборна коалиција со опозициски партии на Албанците, коалиција во вториот изборен круг. Или пак, можно е само во некои општини да се оди во коалиција уште во првиот круг. Сепак рано е, ќе видиме – вели функционерот.

Од Алијанса и Алтернатива засега велат дека се на ставот во првиот круг да настапат самостојно како коалиција АА-А, а дека за вториот круг е можна соработка во општини каде е можна вземна поддршка.

Села вчера на брифинг со новинарите на прашање дали е можно коалицирање со ВМРО-ДПМНЕ во одредени општини рече дека во политиката сè е можно, но потенцира дека со ВМРО-ДПМНЕ тој нема коалиција ниту такви разговори. Според него, градоначалниците имаат слобода да соработуваат и коалицираат со граѓаните, па и со партии.

Информациите дека е можна предизборна соработка помеѓу опозициските партии од македонскиот и од албанскиот блок се подгреajа по конференцијата во организација на десничарската „Конрад Аденауер“, лани во ноември. Тогаш Мицкоски, Села и Гаши најавија дека е можно да си подадат рака пред локалните избори. Мицкоски по тој повод изјави:

– Ова е прв чекор кон споделување, на би рекол наши десничарски, конзервативни вредности во коишто веруваме и јас би сакал оваа наша соработка и во иднина да продолжи, а зошто да не, да кулминира со една заедничка коалиција пред локалните избори.

Гаши тогаш рече дека ако подадат рака за соработка, градат мостови за заеднички и за општ интерес и дека кога ќе дојде фазата за организација на локалните избори прво ќе седнат со Села, па и со другите партии за да видат што е најдобро.

Според информации на Плусинфо, засега не се одржала средба помеѓу Мицкоски, Села и Гаши за евентуална соработка за локалните избори.

Алијанса и Алтернатива неодамна излегоа со понуда до Ахмети, власта и опозицијата во албанскиот блок да си ги одмерат силите на локалните избори, но според изјавата на лидерот на ДУИ дека вреди да се размисли за соработка со СДСМ за изборите во октомври, јасно е дека ќе нема „албанска битка“ за локалните.

Претходно и Заев најави дека е можна соработка со ДУИ како на изборите во 2017 година. Тогаш Заев и Ахмети излегоа со заеднички кандидати за градоначалници во неколку општини како Тетово, Гостивар, Кичево, Куманово, Скопје, Бутел…, односно таму каде што едната партија номинираше кандидат за градоначалник, другата ја поддржа.

Откако Ахмети го отфрли предлогот на Села, лидерот на Алијанса го предизвика лидерот на ДУИ на ТВ дуел. Ахмети во интервју на ТВ21 порача прво Села и Гаши да решат со кого да излезе на дебата. На ова Гаши преку Фејсбук предност му даде на Села.

„Синоќа претседателот на Демократската унија на зелени се согласи да дебатира со албанската опозиција, под услов да решиме со кого ќе дебатира. Ја поздравувам оваа подготвеност и мило ми е што после две децении се согласува да дебатира. Во оваа прилика би сакал да му кажам дека најмала работа е дали ќе бидам јас или Зијадин пред него. Може да бира и тој, но за да му олеснам, му давам предност на мојот пријател, претседателот на Алијанса, Зијадин Села. Чекаме негов одговор“, напиша Гаши на Фејсбук.

Од ДУИ засега нема одговор дали Ахмети ќе прифати телевизиски дуел со Села.