МЕРКИТЕ ВО СКОПЈЕ ДАДОА РЕЗУЛТАТИ Од утре се укинува бесплатниот градски превоз

На денешниот брифинг со градоначалничката на Град Скопје, Данела Арсовска информираше дека досегашните мерки против загадувањето го дале посакуваниот резултат, па поради тоа од утре истите престануваат да важат.

Па така се укинуваат мерките за бесплатен јавен превоз за скопјани и ЈСП продолжува да вози по нормалниот возен ред.

Засега, како што истакна градоначалничката, нема да има нови мерки, бидејќи се лимитирани.

Таа потенцираше дека сите институции, на централно и на локално ниво, треба да реализираат мерки кои се во нивна надлежност со цел истите да имаат вистински ефект.

– Самите услови налагаат дека централната власт треба посериозно да преземе мерки врзани за она коешто го гледаме сега, а коешто е извесен аларм. Ние нашите препораки ги издадовме, нашите препораки се базираат на тоа коешто е утврдено претходно како план, меѓутоа за дел од нив обврски има и централната власт. Ние не можеме да спречиме влез на возила, односно да ги пренасочуваме. Ние не можеме голем дел од работите коишто се внатре во препораките да ги направиме, тоа е обврска на централната власт и таа треба тоа да го направи, треба да ја преземе конечно одговорната за тоа што е носител на власт – рече градоначалничката.

Арсовска се осврна на дел од мерките кои градскиот инспекторат ќе го спроведува во наредниот период, како што се засилените активности на терен на комуналните инспектори, како и вонредните инспекции на индустриските капацитети чија контрола е во надлежност на Град Скопје.

– Ние не спроведуваме само препораки, имаме луѓе на терен кои постојано ги контролираат индустриските капацитети, кои вршат вонредни инспекциски надзори и контроли, а во наредните два месеца ќе имаме повеќе надзори отколку во изминативе неколку години наназад. Изминативе две години направени се само 5 надзори за животна средина. Во овој момент, постојано контролираат инспекциските служби и се изрекуваат глоби, за фрлање на отпад и градежен шут, за горење на отпад … Службите се постојано на терен и се она што може Градот Скопје да го направи ќе го направи и го прави – додаде Арсовска.

Градоначалничката се осврна и на преостанатите мерки кои се реализираат изминатиов период, а имаат големо влијание на животната средина и квалитетот на воздухот во Скопје.

– Со цел да се влијае на квалитетот на воздухот мора да се имплементира сеопфатен сет на мерки, нешто што комплементарно ќе се надополнува, со цел да се лимитираат сите извори на загадувањето. Ние ќе реализираме сет на мерки, сè што е во наша надлежност ќе направиме. Изминатиов период исчистивме 120 диви депонии кои до вчера се палеа и го загадуваа воздухот, а сега повеќе не постојат. Истите се оградени, затворени, ниту може некој да фрла таму, ниту може отпадот да го пали – кажа Арсовска.

Средните дневните концентрации на ПМ10 честички во воздухот во текот на вчерашниот ден беа под дефинираниот праг на алармирање од 150 микрограми на кубен метар на мерните места во Скопје – Центар, Гази Баба, Лисиче и Ректорати, како и во Струмица, покажуваат податоците на Државниот автоматски мониторинг систем за квалитет на воздухот (ДАМСКВ).

Со ова, како што информира Министерството за животна средина и просторно планирање, со ова по два дена алармантно високо ниво на концентрации на ПМ10 честички на овие пет мерни места, тоа падна под дефинираниот праг на алармирање.