МАСК САКА ДА ЈА ПРЕЗЕМЕ НАСА, НО ПРВО ДА Ѝ ГО СКРАТИ БУЏЕТОТ Ќе се пренасочи ли мисијата на Месечината кон Марс?

Ексцентричниот милијардер Илон Маск вложува големи напори да ја натера НАСА да ги прескокне планираните мисии на Месечината и наместо тоа да се фокусира на Марс, пишува „Волстрит Џурнал“.

Весникот вели деа ова ја потврдува дамнешната амбиција на Маск да основа човечка колонија на Црвената планета.

Но, дали Маск навистина сака да ја преземе НАСА? Неговиот влијание врз НАСА би можело наскоро да се зголеми уште повеќе, бидејќи милијардерот и вселенскиот турист Џаред Ајзакман, кој финансираше и предводеше неколку приватни вселенски мисии на Спејс Икс се очекува да биде именуван за нов администратор на НАСА во наредните месеци.

Маск веќе стапил во контакт со Ајзакман за да ја повтори својата желба за заедничка работа на испраќање луѓе на Марс.

Спејс-Икс е веќе најголемиот приватен партнер на НАСА. Истовремено, преку Министерството за ефикасност(ДОГЕ) кое го води во администрацијата на американскиот претседател Доналд Трамп сака да го намали буџетот на НАСА, која е државно финансирана, односно федерална агенција на САД.

Агенцијата е веќе погодена од овие напори на Маск. На почетокот на годината, агенцијата се соочи со масовни отпуштања, а погодените работници добиле кратки рокови и биле лишени од бенефиции.

Според извори, Белата куќа сè уште ја разгледува можноста за укинување на програмата „Space Launch System“ (SLS), огромната ракета која требаше да испрати астронаути на Месечината до крајот на деценијата.

Таквиот потег би претставувал драстична промена во насоката на НАСА, особено ако се земе предвид дека подготовките за мисиите веќе се во напредна фаза.

Само минатата недела, централниот степен на ракетата СЛС за мисијата „Артемис II”, во која астронаути ќе ја обиколат Месечината, беше споен со помошните ракети, што беше клучен чекор кон лансирањето планирано за следната година.

Пренасочувањето на средствата од Месечината кон Марс би можело да предизвика голем интерес во јавноста. Спејс Икс веќе работи на развој на огромната ракета Старшип (во превод Ѕвезден Брод), наменета за меѓупланетарни мисии.

Министерството на Маск се обидува и да ја ослаби Федералната администрација за авијација (ФАА), која е одговорна за регулирање на безбедноста при лансирањето на Старшип.

Според „Волстрит Џурнал“, клучни луѓе од Спејс Икс веќе стекнуваат моќ во НАСА. Долгогодишниот раководител на Спејс Икс, Мајкл Алтенхофен, кој има блиски врски со Ајзакман, уште во јануари беше поставен за висок советник во НАСА.

Но, дали НАСА навистина е подготвена да се откаже од децениските планови? Портпаролката на НАСА не ја отфрли таа можност, изјавувајќи дека агенцијата и понатаму останува посветена на „враќањето на Американците на површината на Месечината“.

За време на својот инаугуративен говор, поранешниот претседател Доналд Трамп изјави дека неговата администрација ќе испрати американски астронаути да постават знаме на Марс, што укажува дека неговата визија е во согласност со идеите на Маск.

Сепак, промена на насоката на НАСА во оваа фаза би била исклучително скапа.

Исто така, укинувањето на програмата „Артемис“ би предизвикало револт кај моќните поддржувачи на НАСА во двата политички табора во Конгресот.