КОВАЧЕВСКИ И ТАРАВАРИ СЕ ДОГОВОРИЛЕ Алијанса добива бинго, Алтернатива со празни раце, ќе ја даде ли СДСМ и Управата за јавни приходи?

Премиерот Димитар Ковачевски и Арбен Таравари доцна попладнето во петокот постигнале конечен договор за влез на Алијанса на Албанците во владата. Засега ништо официјално не е соопштено.

Извор од Алијанса брифирал неколку медиуми дека нов министер за информатичко општество би можел да биде Азир Алиу, професор од Штуловиот универзитет во Тетово. До сега овој ресор беше во рацете на Алтернатива на Африм Гаши. Оваа партија до недела треба да одлучи дали ќе ја напушти владата на Ковачевски, бидејќи, според бриферот од Алијанса, предлог за овој ресор од партијата на Таравари побарал премиерот Ковачевски.

Како што веќе се шпекулираше, Кренар Лога ќе биде министер за правда, а неврологот Фатмир Меџити министер за здравство. Заменик за одбрана ќе биде Тирон Јахјага, а за земјоделство Вјолца Бериша. Ова ќе биде екипата на Таравари во реконструираната влада на Ковачевски.

Според дел од медиумите, СДСМ ќе ѝ го отстапи на Алијанса и директорското место во Управата за јавни приходи, но сегашната директорка Сања Лукаревска, која е и заменик претседател на СДСМ избрана на конгрес, би требало да биде министерка за животна средина. Друга, поверојатна опција е на министерската позиција во овој ресор да дојде Каја Шуклева, сегашниот државен секретар. Во таков случај, не е јасно дали ќе се оствари трансферот во УЈП.

Неизвесно е и тоа кога премиерот Димитар Ковачевски ќе соопшти што се договорил со Таравари и со другите коалициски партнери. Некои извори велат дека е можно во следните два дена да се бара решение да се изврши притисок врз Алтернатива да остане во владата. Што ќе му биде понудено на Африм Гаши, ако воопшто нешто му се понуди, засега не се знае.

АЛТЕРНАТИВА ЌЕ ВРТИ УШТЕ ДВА КРУГА ДО НЕДЕЛА Да не помисли Таче дека е „лесна“ партија