КИМ КАРДАШИЈАН ИМА ПЕТ ДАДИЛКИ ЗА ЧЕТИРИ ДЕЦА Реалити ѕвездата откри како изгледа секојдневјето со децата од бракот со Канје Вест

45-годишната реалити ѕвезда, Ким Кардашијан, во интервју за „The Sunday Times Style Magazine“ откри дека има пет дадилки кои ѝ помагаат во грижата за четирите деца што ги има со поранешниот сопруг Канје Вест.

Милијардерката бизнисменка објасни дека дадилките работат по принцип на ротација, па секогаш една од нив е со децата кога тие се кај неа.

Ким и Канје ги имаат Норт (13), Сент (10), Чикаго (8) и Псалм (7).

И покрај помошта што ја има, Кардашијан вели дека таа ги носи и ги зема децата од училиште, а секоја вечер вечераат заедно и им чита книги пред спиење.

– Мислам дека сум умерено строга мајка. Исклучително сум трпелива и полна со љубов. Сè уште дозволувам некое од децата да спие во мојот кревет кога сака – вели 45-годишната Кардашијан.

Кардашијан и Вест, кои беа во брак од 2014 до 2022 година, и понатаму мораат да комуницираат околу своите деца. Таа вели дека особено добро се усогласуваат кога станува збор за Норт и нејзините професионални ангажмани.

Нивната најстара ќерка веќе се насочува кон музичка кариера, а Кардашијан вели дека со Вест се обидуваат да бидат усогласени околу проектите во кои таа учествува.

– За тоа татко ѝ и јас имаме подобра комуникација. Се грижиме да бидеме усогласени и таа да учествува во проекти што и двајцата ги одобруваме – вели Кардашијан.

Во интервјуто Ким вели дека била сингл пет години.

– Тоа ми годеше. Можев да се посветам на моите деца и на проектите во кои навистина сакав да учествувам. Воопшто не чувствував дека треба да брзам. Навистина не се чувствував празно. Чувствував дека ми треба време. Сакав целосно да заздравам и да работам на себе. Не бев подготвена да се отворам. Искрено, воопшто не размислував за тоа. Универзумот работи во ваша корист кога едноставно ќе му дозволите – вели таа.

Иако има голема помош околу децата, Кардашијан претходно зборувала за тоа дека родителството понекогаш ѝ е тешко. Во 2024 година признала дека се чувствува осамено во воспитувањето на децата, особено во текот на ноќта.

– Луѓето секогаш ќе кажат: Но ти имаш ресурси да имаш дадилки и помош. А јас во основа сама воспитувам четири деца – рекла тогаш.

Кардашијан во меѓувреме продолжува со своите деловни и професионални ангажмани. Во 2019 година го лансираше брендот „Skims“, а веќе неколку години се обидува да положи правосуден испит.

Нејзината актерска кариера исто така продолжува. Во 2025 година доби улога во серијата „All’s Fair“ на Рајан Марфи, а неодамна го заврши снимањето на втората сезона.

Кардашијан неодамна ја потврди и врската со возачот во Формула 1, Луис Хамилтон. Канје Вест, пак, по разводот со Кардашијан се ожени со манекенката Бјанка Чензори.