ИЗЛОЖБА НА ФОТОГРАФИИ ОД СВЕТА СОФИЈА И ПЕРФОРМАНС „ТЕЛО ОД ОГАН“ Програма на „Скопско лето“ за вторник и за среда навечер
Фотографската изложба „Света Софија - Светлината на тишината" од светски познатите фотографи Изет Керибар и Мехмет Озџај се среќава со љубителите на уметноста во Македонија.
Вечерва (вторник, 07.07.2026 г.) со почеток во 20:30 часот на Факултетот за ликовни уметности – Сули ан ќе се отвори фотографска изложба насловена „Света Софија – Светлината на тишината” на светско познатите Изет Керибар и Мехмед Озџај. Овој настан се реализира во соработка со Турскиот културен центар во Скопје „Јунус Емре”.
„Фотографската изложба „Света Софија – Светлината на тишината” од светски познатите фотографи Изет Керибар и Мехмет Озџај се среќава со љубителите на уметноста.
Света Софија, како уметничко дело, плени не само со својата архитектура и историска вредност, туку и со својот внатрешен мир и безвременска естетика“ – соопшти Дирекцијата за култура и уметност.
Утревечер (среда, 08.07.2026 г.) со почеток во 20:30 часот на Факултетот за ликовни уметности
– Сули ан ќе се одржи мултимедијален перформанс под наслов „Тело од оган” на Игор Јосифов. Музичка придружба на настанот ќе биде ди-џеј Џејмс Худини од САД.
„Игор Јосифов е визуелен и перформанс уметник чија 25-годишна меѓународна пракса го позиционира огнот како инструмент на уметничко истражување.„Тело од оган” го испитува прагот помеѓу материјалната трансмутација и естетската појава. Огнот не функционира како деструктивна сила, туку како примарен соработник и сведок во генеративното дело. Уметникот зафаќа запечатена структура, изведувајќи го чинот на согорување како намерна уметничка методологија. Преку ова внатрешно согорување, уметничкото дело се материјализира на надворешни архитектонски површини преку перформанс и мултимедијална инсталација кои го менуваат просторното искуство на дворот на Сули ан“ – се вели во соопштението на Дирекцијата.
Влезот за двата настани е слободен.