Груби: Села му забива нож во грб на првиот премиер Албанец

Генералниот секретар на ДУИ Артан Груби открива дека сите лидери на партиите на Албанците со кои разговарал Али Ахмети, односно Мендух Тачи, Африм, Гаши и Билал Касами декларативно се согласиле да го поддржат предлогот за премиер Албанец, освен лидерот на Алијансата Зијадин Села. Тој ова го вели во интервју за албанскиот весник „Шќип“ .

– Резултатите од изборите во нашата земја не прогласија за апсолутни победници и во сите изборни единици победи ДУИ и Али Ахмети. Првиот чекор по потврдувањето на победата и објавувањето на резултатите беше воспоставување контакт со албанските парламентарни политички партии за обединување на силите во Собранието и за максимизирање на нашите достигнувања. Декларативно, сите партии се согласија да ги поддржат националните стремежи освен Зијадин Села иако ден пред изборите, тој вети дека ќе го стори тоа и дека ќе го почитува победникот. Но, верувам дека по обидите за дефокусирањето за длабокиот пораз и избегнување на одговорноста во рамките на партијата, и тие ќе рефлектираат – вели Груби во интервјуто.

Тој додава дека им е неопходно албанско обединување за да ги постигнат национални цели.

– Вистината е дека ни треба албанско обединување за да постигнеме национални цели, а не „ножеви зад грб“ со тоа што овие партии ќе престанат да стојат позади врата и целосно да им бидат на располагање на македонските партии. Сега засега, сите ја поддржуваат нашата идеја за првиот премиер Албанец на нашата земја и цениме дека тоа е можно и е во најдобар интерес на земјата и го заокружува патот до целосна еднаквост, ја зголемува довербата меѓу двете државни заедници и создава стабилност – вели Груби.