ГРАЃАНИТЕ СИ СВЕТАТ СО МОБИЛНИТЕ АКО СЕ ДВИЖАТ НОЌЕ ПЕШ Што се крие зад мракот?

Реткост е да се забележат луѓе кои пешачат сами покрај улиците и булеварите во главниот град, бидејќи штом падне мрак единствено светло што може да се забележи е тоа што доаѓа од автомобилите, а причина за тоа е што Град Скопје и дел од општините сѐ уште штедат струја.

Жителите на скопските општини се револтирани, што и покрај тоа што плаќаат за улично осветлување, стравуваат за својата безбедност во доцните вечерни часови, кога Скопје во некои делови личи како да е помрачен град.

– Да ти е страв кога се движиш по булеварите и по уличките низ Аеродром. Единствено светло е она од автомобилите, а доколку возиш кола треба да ги отвориш добро очите бидејќи може некое куче да ти излезе на патот. Навистина не знам зошто плаќаме за улично осветлување секој месец, а не добиваме за тоа што плаќаме – се жали Горан М. кој живее во Аеродром.

Особено за својата безбедност стравуваат скопјанки, кои покрај стравот од уличните кучиња кои не можат да се забележат во темница, се плашат и да не бидат физички нападнати од некого.

– Пред неколку дена со другарка бевме на роденден кај наш пријател и некаде по полноќ се враќавме дома. Толку ни беше страв што моравме светло да пуштиме од мобилните телефони за да можеме да видиме каде одиме и дали случајно некој можеби нѐ следи. Со овие мерки на штедење, морам да кажам дека Скопје не е безбеден град – вели за Марија Т. за Плусинфо.

Граѓаните посочуваат дека денот веќе е подолг, а светилките не светат во скусената ноќ. Од друга страна, пак, цената на струјата веќе нема драстични скокови, туку стагнира или е намалена. Лани откако поскапе електричната енергија, сите општини во земјава почнаа да бараат начин да заштедат и тоа го правеа пред сѐ преку кратење на јавното осветлување.

Граѓаните сведочат и дека влезот во Скопје од автопатот од Гостивар е целосно мрачен и кога се влегува во главниот град се вози во темница. Не свети ниту една бандера на автопатот, ниту на влезот кон скопската обиколница.

Градоначалничката Данела Арсовска лани во август истакна дека Град Скопје нема под ниту едни услови да го изгасне јавното осветлување на улиците и на булеварите кои се во надлежност на Градот, како дел од мерките за штедење на потрошувачката на електрична енергија.

– Првенствено од причина што сметаме дека треба да има приоритет јавниот интерес, а особено безбедноста и сигурноста на скопјани. Ние ќе направиме сѐ што е возможно што се однесува до мерките кои можеме ние да ги преземеме, меѓутоа не врз грбот на граѓаните и не врз тоа што би им била загрозена сигурноста и безбедноста при движењето на градските улици и булеварите. Булеварите и улиците кои се под надлежност на Град Скопје нема да се исклучуваат од јавното осветлување – нагласи тогаш Арсовска.

Таа на споменатата прес-конференција рече дека ќе бидат спроведени мерки со цел да се намали потрошувачката на струја за улично осветлување, при што најави дека ќе биде намалена јачината на лед светилките на улиците и булеварите до најмногу 70 проценти од моќноста.

И покрај тоа што неколкупати имаме пишувано на оваа тема, повторно се обидовме да дознаеме што се случува во Градот, дали и колку изнесуваат сметките за струја, до кога скопјани ќе се движат по темни улици и булевари, но од и нејзината служба добивме само молк.

Од општина Кисела Вода за Плусинфо велат дека енергетската криза која силно ја погоди Македонија, беше и останува да биде можна опасност за буџетските средства на сите општини, вклучително и нивните.

– Од наша страна, направивме максимални напори да не им го ускратиме правото на нашите жители да имаат осветлување иако тоа значеше поголем предизвик во однос на менаџирањето на средствата и дополнителни инвестиции кои ако не постоеше скокот во цената на струјата, немаше да бидат итни. Оттука, не ги оставивме нашите граѓани без осветлување, но влеговме во непланирана финансиска инвестиција за промена на светилките со штедливо лед осветлување – ни одговорија од Кисела Вода.

Оттаму додаваат дека во вакви услови, кога има толкав, енормно висок скок на цените на енергенсите, централната власт треба да има многу поодговорен однос кон општините, а со тоа и кон граѓаните, бидејќи, неизлегувањето во пресрет на барањата на локалната самоуправа значи директно кратење токму од нивните потреби.

– Овде не говориме само за финансиските олеснувања што централната власт е неопходно да ги направи во поглед на уличното осветлување, туку и за потрошувачката на електричната енергија и загревањето на училиштата и на градинките – велат од општина Кисела Вода.

Општина Центар поради настанатата енергетска криза, во насока на заштеда на електрична енергија, спроведе мерки на редукција за уличното осветлување на нејзината територија во период од 1.11.2022 година до 31.3.2023 година.

– Менаџирањето на исклучување на уличните светилки на територија на Општина Центар се вршеше етапно, по територија на Урбани заедници и нивното враќање во целосна функција се спроведуваше на истиот начин – ни посочија од Центар.

За Плусинфо од Општината велат дека овие мерки на редукција овозможиле полесно надминување на настанатата енергетска криза, што беше евидентно по намалените фактурирани сметки за потрошувачката на електричната енергија на уличните светилки на територија на Општина Центар за дадениот период.

– Општина Центар за намалување на сметките за електрична енергија презема соодветни мерки, како што се етапна замена на натриумовите светилки со ЛЕД светилки, чија потрошувачка на електрична енергија на уличните светилки е значително помала од обичните светилки. Неодамна Општина Центар го основаше и ТД „Енергија Центар“ и е во фаза на спроведување на проектот за снабдување со електрична енергија од обновливи извори, со поставување на фотоволтаични системи на основите училишта, детските градинки и јавните објекти кои се на нејзина територија и се во нејзина надлежност – истакнуваат од општина Центар.

Како што е веќе добро познато, комуналната такса за улично осветлување граѓаните ја плаќаат во сметката за струја, што значи дека парите се слеваат кај ЕВН. Од компанијата, за Плусинфо велат дека тие само ја вршат наплатата, а средствата директно ги префрлаат на сметките на општините. Секое домаќинство плаќа 184 денари, секоја фирма плаќа по 368 денари месечно за јавно осветлување.

– Компанијата во целиот процес само им прави услуга на општините. Понатаму, самите општини менаџираат со средствата, а тие им служат за одржување на јавното осветлување и плаќање на потрошената електрична енергија – ни одговорија од ЕВН.

Од ЕВН добивме бројки според кои може да се види дека скопските општини собираат висок процент од средствата за јавно осветлување, со исклучок на Шуто Оризари и Сарај.

– Во Аеродром, Ѓорче Петров, Кисела Вода, Карпош и Центар се наплаќа 98% од таксата за јавно осветлување, во Бутел 97%, во Гази Баба 96%, во Чаир 91%, во Шуто Оризари 85% и во Сарај 73% – велат од ЕВН.

Додека не се сменат околностите, на скопјани им останува да бидат многу внимателни кога се движат по мрачните улици и булевари, затоа што дел од градоначалниците одлучиле да штедат при тоа не преземајќи други мерки за да се осветли градот.