Големиот градски пазар во Гостивар ќе биде затворен 30 дена

Големиот градски пазар во Гостивар ќе биде затворен во наредните 30 денови, како мерка за спречување на ширење на корона вирусот. Тоа беше едно барањата на кризниот штаб по состанокот кој се одржа вчера.

Од Општина Гостивар информираат дека вчера бил остварен контакт со сопствениците на претпријатието „Прогрес пазари“ кое управува со големиот градски пазар и е донесена заедничка одлука со која пазарот нема да работи.

„Ова е заедничка одлука на градоначалникот Арбен Таравари и на Кризниот штаб во Гостивар и во соработка со раководителите на претпријатието“, се наведува во соопштението од локалната самоуправа.

Иако мерките за заштитата од ширење на вирусот не ги опфатија отворените пазари, гостиварските локални власти во кризниот штаб примиле повеќе поплаки и барање за затворање на пазарот, особено кога во вторник како пазарен ден имаше зголемено присуство на граѓани и продавачи.

Од Општината упатија апел со барање до граѓаните да имаат разбирање за ваквиот потег, бидејќи е во насока на спроведување на препораките за заштита од пандемијата на корона вирусот.