ЕУ МОРА ДА ИЗБЕРЕ НОВ МОДЕЛ НА РАСТ Шефицата на ЕЦБ предлага тој да почива на единствениот пазар и на развојот на новите технологии

Европа мора подобро да го искористи својот единствен пазар и потенцијалот за развој на нови технологии, бидејќи европската економија се соочува со крајот на моделот на раст кој со децении се базираше на силна глобална трговија, конкурентна индустрија и стабилен меѓународен поредок, изјави претседателката на Европската централна банка (ЕЦБ), Кристин Лагард.

-Европскиот повоен модел на раст слабее, бидејќи условите на кои почиваше се менуваат – вели Лагард во  говорот на Меѓународниот бизнис совет на Светскиот економски форум во Женева објавен на веб страницата на ЕЦБ.

Лагард смета дека Европа, како една од најотворените економии во светот, профитираше силно од глобализацијата, но трговските ограничувања го прават таков модел на раст сè потежок.

– Само минатата година, во светот беа воведени повеќе од 2.500 нови трговски ограничувања – вели шефицата на ЕЦБ.

Во исто време, според неа, Кина сè повеќе се натпреварува со европската индустрија во сектори со поголема додадена вредност, додека предноста на релативно евтината енергија на која некогаш се потпираше европската индустрија, исто така, исчезна.

Лагард нагласи дека минатата година цените на електричната енергија за енергетски интензивната индустрија во ЕУ беа во просек повеќе од двојно повисоки отколку во САД и околу 50% повисоки отколку во Кина.

Европската економија е дополнително погодена од геополитичките тензии и промените во глобалниот безбедносен поредок, смета Лагард.

-И покрај предизвиците, Европа има важни предности, вклучувајќи ја најголемата мрежа на трговски договори, силна индустриска база, квалификувана работна сила и единствен пазар со 450 милиони потрошувачи. Економијата на еврозоната порасна за 1,5% минатата година, а растот беше целосно поттикнат од домашната побарувачка. Таа, исто така, позитивно придонесе за раст од 0,4 % во вториот квартал од оваа година и треба да остане главен двигател на растот и во 2026 година – вели Лагард.

Според неа, Европа сега мора да ја искористи отпорноста на домашната побарувачка за да го стимулира економскиот раст на долг рок, меѓу другото и со подобро искористување на потенцијалот на единствениот пазар. Особено е важно да се забрза примената на вештачката интелигенција за Европа да не го повтори искуството од првата дигитална револуција, кога најголемите економски придобивки од новите технологии беа остварени надвор од Европа.

– Не можеме да си дозволиме да повториме такво искуство со вештачката интелигенција – втората индустриска револуција- рече Лагард.

Оваа година, европските компании треба да насочат просечно 9% од вкупните инвестиции во вештачка интелигенција, според податоците презентирани од Лагард.

-Но, ширењето на новите технологии го попречува фрагментирањето на единствениот пазар и пазарот на капитал. Компаниите сè уште главно се натпреваруваат на националните пазари, додека иновативните компании по почетната фаза на развој тешко го добиваат капиталот потребен за понатамошен раст – вели Лагард.

Според податоците од Европската инвестициска банка, европските брзорастечки компании во првите пет години од работењето собираат приближно иста количина капитал како и оние од Сан Франциско, но до десеттата година собираат околу 50% помалку.

Околу 12% од европските компании со скалирање се преселија надвор од ЕУ, главно во САД.

Затоа, Европа работи на подобро интегрирање на единствениот пазар и пазарот на капитал. Меѓу предлозите е и „EU Inc.“, правна рамка на ниво на ЕУ што би им овозможила на компаниите да се основаат според унифицирани правила и да работат низ целата Унија.

Во исто време, се работи на интеграција на пазарот на капитал, а лидерите на ЕУ ги повикаа законодавците да постигнат договор за пакет мерки за негово поврзување до крајот на 2026 година.

-Подоброто искористување на големината на европскиот пазар би им овозможило на компаниите да растат побрзо, да го забрзаат ширењето на новите технологии и да ја зголемат продуктивноста – вели Лагард.