ЌЕ МОРА ЛИ МАКЕДОНИЈА ЕДНОКРАТНО ДА ПЛАТИ КАЗНА ОД 53 МИЛИОНИ ЕВРА АКО НЕ ДОЗВОЛИ 60-ЧАСОВНА РАБОТНА НЕДЕЛА НА КОРИДОРИТЕ? „Бехтел и Енка“ изгледа се обезбедил и со месечни пенали од над 2 милиони евра
Плусинфо ги прашува македонските потписници на договорот со конзорциумот „Бехтел и Енка“ - дали наведените суми на пеналите се точни и зошто прифатиле ваков услов во договорот, знаејќи дека законските измени ќе доведат до дискриминација и нерамноправен третман на работниците на пазарот на трудот, што може да биде основа тие, ако се усвојат, утре да бидат поништени од страна на Уставниот суд?
Плусинфо располага со фотографии од најважните делови од Договорот за Коридорот 8 (Гостивар – Букојчани и Требеништа – Струга – делницата на експресниот пат Ќафасан) и Коридорот 10 (експресниот пат Прилеп – Битола).
Исто така, располагаме и со фотографии од еден од придружните документи насловен како Schedule 18 – Qualifications and Assumptions. Овој документ е важен во поглед на она што ќе се случува на седницата на Собранието.
Судејќи според бројките на дното на секоја страница, станува збор за обемен материјал од вкупно 438 страници, кој ги дефинира сите детали од Договорот помеѓу нашата држава, која во случајов се јавува како Работодавец и конзорциумот „Бехтел и Енка“, кој е во ролјата на Контрактор.
На страницата 427 од документот Schedule 18, станува збор за тоа какви пенали ќе му плати Работодавецот на Контракторот, во случај да не обезбеди 60-работна недела за неговиот персонал, во рок од 45 дена од потпишувањето на Договорот.
Ова е фотографијатa на страницата 427:
Кaко што може да се прочита, тука пишува дека времето на извршување на договорените работи и цената зависат од претпоставката дека на целиот персонал на Контракторот ќе му биде овозможено легално да работи 60 часа неделно. Оваа одредба очигледно е предвидена поради фактот дека македонските власти неодамна ја скратија работната недела и го прогласија денот недела за неработен.
Во точката „i“ пишува дека неисполнувањето на таа обврска ќе значи продолжување на рокот на работите за најмалку 6 месеци.
Во точката „ii а“ на оваа страница се зборува за тоа дека ако овој услов не се исполни, минимална сума од 53 милиони евра еднократно ќе биде додадена на почетната сума од 117 милиони евра што ќе ја плати Работодавецот. Овие 53 милиони евра ќе бидат исплатени во рок од 15 дена по истекувањето на рокот од 45 дена, кога Работодавецот треба да обезбеди 60-часовна работна недела за персоналот на Контракторот.
Во точката „ii b“ пишува дека капиталните индиректни трошоци, кои се плаќаат месечно, ќе пораснат за најмалку 1.265.000 евра месечно.
Во точката „ii c“ се спомнува уште еден пенал, сума од 900.000 евра месечно, што Работодавецот, ако добро разбираме, ќе ја плаќа од моментот кога истекол рокот од 45 дена да обезбеди 60-часовна работна недела, до моментот кога можеби ќе успее да усвои таква законска измена.
Плусинфо јавно ги прашува потписниците на договорот со „Бехтел и Енка“ од македонска страна, како и сите надлежни органи кои имале свој удел во зделката:
- Колку пари еднократно треба да му бидат исплатени на конзорциумот „Бехтел и Енка“, во случај да не се обезбеди 60-часовна работна недела за персоналот што ќе работи на коридорите? Дали сумата од 53 милиони евра е точна?
- Колку вкупно пенали ќе се исплаќаат на месечно ниво, доколку не поминат законските измени за продолжување на работната недела за персоналот на „Бехтел и Енка“? Колку ќе биде вкупната сума пенали што ќе бидат исплатени на месечна основа во договорниот период?
- Зошто Работодавецот прифатил ваков услов во договорот, знаејќи дека законските измени ќе доведат до дискриминација и до нерамноправен третман на работниците на пазарот на трудот, што може да биде основа законските измени, ако се усвојат, утре да бидат поништени од страна на Уставниот суд?