ДАЛИ И КЕШИШЕВ ЌЕ ПОТВРДИ ДЕКА ПАЛЧО Е УБИЕЦОТ? Ќе зборува соучесникот кој ја однесе полицијата до телото на Вања

Што ќе открие штипјанецот Влатко Кешишев денеска во Кривичниот суд во Скопје? Четвртообвинетиот за грабнувањата и за свирепите убиства на 74-годишниот Панче Жежовски и на 14-годишната Вања Ѓорчевска денеска ќе го дава својот исказ за страшните злосторства извршени на 22 и на 27 ноември 2023 година. Првообвинет за убиствата е Љупчо Палевски Палчо од Скопје, поранешен претседател на Десна, а им се суди и на сопартијците Велибор Манев и Боре Видевски, двајцата од Велес. На таткото Александар Ѓорчевски му се суди за помагање во грабнувањето на неговата ќерка Вања.

Зошто е клучен Кешишев?

Соучесникот Кешишев е клучен сведок од повеќе причини.

Прво, тој повеќе години бил позициониран многу блиску до шефот Палчо како негов готвач и домаќин во седиштето на партијата и би можел да знае многу повеќе детали за намерите и планирањето на злосторствата. Кешишев поминувал многу време со Палевски, затоа што заедно живееле во партиското седиште.

Второ, тој е единствениот од обвинетите што покажал трошка совест по свирепите убиства. Кога дошла полицијата во седиштето на Десна на 2 декември, следејќи ги трагите на „рено кангу“ Кешишев самоиницијативно ги однел до околината на Бразда и прво им го покажал местото каде го запалиле „цитроенот“ на Панче. Велел дека „Палчо ќе го убие поради ова“. Коментирал дека и тој е лош човек, нечовек, и по подолго кршење во себе на инспекторите Музафер Каришиќ и Дејан Димовски им го покажал и местото каде што ја закопале Вања. „Таму е маленкото што го барате“, им рекол. Да не беше неговата совест, кој знае кога полицијата ќе го пронајдеше телото на Вања и дали и воопшто ќе го пронајдеше.

Трето, Кешишев во истрагата ги посочил сите останати обвинети. Прво на инспекторите уште кога дошле во партијата им го споменал Вељо од Велес, односно Велибор Манев, по што Манев е приведен. Кога ги однел инспекторите кај телото на Вања им рекол дека во грабнувањата учествувал и Боре каратистот од Велес. Поточно, им кажал дека и Боре бил во „цитроенот“, по што и тој е приведен. Кога го прашале кој пукал во детето, рекол Палчо.

Кешишев наводно „го вмешал“ и таткото Александар, односно тој на полицајците им рекол дека Палчо од таткото на девојчето дознал кога таа ќе оди сама на училиште, за да може да биде грабната. Останува да се види дали неговата подготвеност да изнесува детали може да открие и нешто повеќе од досега искажаното во судница.

Не е очевидец, ама е соучесник во убиствата

Кешишев, според сведочењето на Манев, не го видел убиството на Панче Жежовски. Не ни бил во близина, туку останал подоле на патот со „реното кангу“. Не е познато дали го видел убиството на Вања, но, според она што им го кажал на инспекторите, бил во близина, а во девојчето пукал Палчо.

Останува да се види дали истото ќе го повтори во судницата.

Кешишев пред инспекторите изрази страв од Палевски, а тој страв беше дел и од една епизода во судењето. Во фазата додека се изнесуваа материјалните докази, на 18 ноември, судијата Ивица Стефановски на странките во постапката им даде негова писмена изјава во која Кешишев наведува дека Палевски на 22 и на 27 ноември 2023 година не бил со тројцата обвинет во Велес и во Скопје, туку дека спиел во штабот. Кешишев навел дека згрешил што го послушал Велибор и дека кажал невистина дека Палчо бил со нив.

Но, по овој обид за пресврт, на следното рочиште Кешишев ја негираше таа изјава. Рече дека два пати бил транспортиран од затворот до судот и назад заедно со Палевски и при тој транспорт Палевски му дал ливче. Палевски од Кешишев побарал да го препише со свој ракопис, да стави потпис и да го пушти до судот. Кешишев појасни дека чувствувал страв од првообвинетиот и затоа го сторил тоа. Додаде дека сè што има да каже, ќе каже пред судот.

Обвинителството до денес не извести дека отворило истрага за да го побара евентуалното оригинално писмо кое Палевски му наредил на Кешишев да го препише.

Што сè има да каже?

Што ќе каже денеска Кешишев за злосторствата што ги потресоа Македонија и регионот? Ќе изнесе своја, четврта верзија за суровите егзекуции на Панче и на Вања или ќе потврди некоја од досега изнесените три пред Кривичниот суд – онаа на Обвинителството, на Велибор Манев или на Боре Видевски. Ќе потврди ли дека Палчо пукал во нив, како и дека Александар им открил кога Вања оди сама на училиште?

Според ЈО, мотивот за делата е користољубие. Панче го грабнале и го убиле за да му го земат „цитроенот“, кој пак им бил потребен за да ја грабнат Вања. За девојчето требало да бараат откуп од член на семејството, но се испаничиле од потрагата по неа на социјалните мрежи, па Палевски ја убил.

Велибор Манев ги призна убиствата, но изнесе друга варијанта на настаните. Според него, таткото Александар нема никаква вина, а го посочил во полиција под присила со силен ќотек. Не било планирано никој да биде убиен, туку само да биде грабнат – и тоа Панче за возилото, а некоја жена за пари. Двајцата требало да бидат чувани во дупката каде подоцна е најдено телото на Панче и потоа ослободени. Но, Палчо ги убил и Панче и Вања и тоа ладнокрвно, со истрел во главата одблизу. И двете жртви биле со врзани раце и нозе и завиткани. Не им бил планот да ја грабнат Вања, туку некоја жена од истиот влез, ќерка на фармацевт. Но, поради темницата во влезот, по грешка го грабнале девојчето.

Манев откри и дека некој четврти човек, засега непознат, добил налог од Палевски да го среди пакетот, односно ранецот во кој биле пиштолот и трите мотороли што ги користеле при злосторствата. Ниту за овој момент нема информација дали Обвинителството го бара тој човек, кој наводно го уништил оружјето со кое се изврени убиствата и кое до денес не е пронајдено.

Боре Видевски, пак, негираше сè. Рече дека дента кога е убиен Панче Жежовски бил на работа, а кога е убиена Вања Ѓорчевска спиел во партијата Десна. Кога се разбудил околу 10 часот, таму биле и Кешишев, Манев и Палевски. Рече дека претходната вечер останале до доцна на состанок, поради што не се вратиле во Велес со Манев, туку останале да преспијат.

По Кешишев, на наредните рочишта ќе дава исказ петообвинетиот Александар Ѓорчевски, а потоа првообвинетиот Љупчо Палевски Палчо.

Исказот на Кешишев ќе почне со прашања од неговиот бранител Игор Ефремов.