ЌЕ БЕРЕМЕ ЈАГОДИ ВО АНГЛИЈА, АМА ВОЛАН НЕ ФАЌАМЕ Возачите на ЈСП масовно напуштаат работа, во јуни нема да има кој да нѐ вози?
Од ЈСП Скопје тврдат дека бројот на возачи со кои располага претпријатието е сосема доволен за покривање на секојдневните работни задачи за непречено и квалитетно функционирање на јавниот превоз.
Во ЈСП-Скопје, очигледно, не цветаат рози. Околу стотина возачи незадоволни од условите за работа одлучуваат да си заминат и да возат автобуси во меѓуградскиот и меѓународниот сообраќај каде што платите се поголеми, но голем дел од нив, пак, изненадувачки, решаваат да заминат во Англија и да берат јагоди или да работат некоја друга сезонска работа.
И покрај тоа што градоначалничката на Скопје, Данела Арсовска и в.д. директорот на ЈСП, Александар Стојковски, велат дека јавното претпријатие е во добра кондиција, сепак во претпријатието се подготвува вистински егзодус кој ќе резултира со недостиг на стотина возачи во следните два месеца.
Според информациите до коишто дојде Плусинфо, во јуни во пензија ќе заминат околу 50 лица, а тоа значи дека значително ќе се намали бројот на возачи, кој, според в.д. директорот Стојковски, изнесува 656 лица. Но, според нашите извори, во овој момент во ЈСП има нешто над 400 лица кои ги управуваат автобусите, а пак над 1.300 луѓе работат во администрацијата.
Околу стотина возачи се одлучиле да поднесат барање за неплатен одмор од 6 или 12 месеци, но како што нѐ информираа ваквото нешто им било забрането од страна на раководството на ЈСП Скопје, но и од градоначалничката Данела Арсовска. Поради тоа, веќе 30 возачи одлучиле да дадат отказ и да си заминат од фирмата иако таму работеле повеќе гоидни.
Дури 17 возачи од гаражата на ЈСП во Ѓорче Петров и уште 12 возачи од гаражата во Автокоманда за два месеца заминуваат во пензија. Петмина возачи веќе им соопштиле на своите шефови дека ја напуштаат работата, а за уште десетина возачи се зборува дека наскоро ќе го направат истото
– Вистинска катастрофа се случува во ЈСП, условите за работа воопшто не се добри. Многупати ни ветуваа дека ќе имаме зголемување на платите, но освен тоа што законски ни следуваше од 2.800 денари ништо нема променето. Поради платата која излегува околу 32.000 денари со сите додатоци (ноќна смена, празници и слично), најголем дел од колегите одлучуваат да се вработат во компанија за меѓуградски превоз или во туристичките агенции кои нудат плата од најмалку 40.000 денари – ни изјави еден возач кој сакаше да остане анонимен.
Друг извор за Плусинфо сподели дека откако приватните превозници престанаа да бидат дел од јавниот превоз, во ЈСП биле примени околу 30 возачи за да ги покријат линиите кои претходно ги возеле. Според моменталната ситуација со приватните превозници, кои најверојатно повторно ќе возат по скопските улици од 1 април, дел од овие возачи, неофицијално, планираат повторно да се вратат на своите стари работни места.
Членови на високото раководство на ЈСП-Скопје, во неформален разговор за Плусинфо признаваат дека се соочуваат со сериозен број откази од возачи, но и со сериозно намалување на бројот на вработени со оглед на групата од триесетина возачи кои за два месеца треба да замине во пензија.
– Дури 17 возачи од гаражата на ЈСП во Ѓорче Петров и уште 12 возачи од гаражата во Автокоманда за два месеца заминуваат во пензија. Петмина возачи веќе им соопштиле на своите шефови дека ја напуштаат работата, а за уште десетина возачи се зборува дека наскоро ќе го направат истото – велат нашите извори од ЈСП.
Дека состојбата не е сјајна во ЈСП говорат и другите информации кои ги имаме, а тоа е дека откази ќе фрчат и од другите струки во претпријатието: паркирачи, механичари…
Во моментов располагаме со 650 возачи, до јуни месец по основ на пензионирање претпријатието ќе го напуштат 5 возачи, а само еден возач користи неплатено отсуство во период од 3 месеци
Од ЈСП Скопје на нашите поставени прашања одговорија дека не сакаат да коментираат шпекулации и неофицијални информации, но, одговорно тврдат дека претпријатието не се соочува, ниту, пак, ќе се доведе во ситуација да се соочи со недостиг од возачи.
– Бројот на возачи со кои располага претпријатието е сосема доволен за покривање на секојдневните работни задачи за непречено и квалитетно функционирање на јавниот превоз. Во моментов располагаме со 650 возачи, до јуни месец по основ на пензионирање претпријатието ќе го напуштат 5 возачи, а само еден возач користи неплатено отсуство во период од 3 месеци – ни одговорија официјално од ЈСП Скопје.
Оттаму додаваат дека годинава, за жал, нема да бидат во можност да вработат возачи на неопределено време, со оглед на тоа дека Советот на Град Скопје без објаснување не го усвоил Годишниот план за вработување на ЈСП Скопје, кој предвидувал во текот на 2023 година на неопределено време да бидат вработени 90 возачи.
– Тоа значи дека дел од ангажираните возачи и натаму ќе бидат вработени преку агенција за привремени вработувања, а и доколку се јави потреба од нови возачи, на истите ќе можеме да им понудиме единствено ангажман преку АПВ – нѐ информираат од јавното претпријатие.
„Си ги сакаме парите“
Дека состојбата во јавното претпријатие не е сјајна се пишува веќе подолго време во медиумите, но кулминираше во средината на ноември кога возачите на ЈСП Скопје не излегоа да возат бидејќи им доцнеше исплатата на октомвриската плата.
Тогаш јавниот превоз беше во колапс цели два дена, па поради тоа градоначалничката Данела Арсовска побара од Советот на Град Скопје да бидат исплатени 2 милиони евра на јавното претпријатие. Откако им легнаа парите на сметките, автобусите излегоа од гаражите.
Плусинфо во неколку наврати пишуваше за тоа што се случува во јавното претпријатие и дека е вистински хаос, а сведоци за случувањата ни беа токму вработените во ЈСП Скопје.
Имаше одмазда?
Во октомври минатата година напишавме дека врз возачите се вршел мобинг откако јуни 2022 година тие најавија протест преку кој сакаа да укажат на ниските плати и на тешките услови за работа.
Возачите се сомневаа дека по постигнувањето на договорот за зголемување на платите за 2.800 денари, почнувајќи од јуни, следеле одмазднички потези во претпријатието кои натежнале врз нивниот грб.
– Внатре, во фирмата, владее класичен хаос. А целиот проблем започна пред неколку месеци откако ние вработените во ЈСП побаравме зголемување на платите. Тогаш се заканивме со штрајк, но од раководството веднаш нѐ информираа дека барањата ќе ни бидат прифатени. И тогаш всушност започна одмаздата. Ни ги зголемија платите, ама ни ги загорчија животите. Ако јас цел живот возам автобус со број 22, сега морам да работам двократно и да работам на две возни линии кои немаат никаква поврзаност една со друга. На пример, во 8 часот тргнувам од Ѓорче Петров до Автокоманда, а завршувам во 12 часот. Потоа си одам дома и во 16 часот продолжувам со втора смена почнувајќи во Ченто и завршувам дури во 22 часот. Но, ова не се случува само со мене, туку буквално со сите возачи во ЈСП – изјави тогаш возач на ЈСП.
Автобуси на „трупци“
И на почетокот на ноември минатата година разговаравме со неколку вработени во ЈСП Скопје кои рекоа дека поради проблеми со гумите, намален е бројот на автобуси кои циркулираат низ градот, затоа што оние кои не можат да се сервисираат се оставени на „трупци“ и чекаат да добијат нови гуми за да може повторно да бидат пуштени во сообраќај.
– Автобусот што го возам има распукана една гума, па поради тоа отидов до сервис да ја сменам. Кога пристигнав таму, им кажав на сервисерите за проблемот, а тие ми одговорија: „Нема проблем, бирај која сакаш гума, оваа или оваа“ и притоа ми покажаа со прст кон празно место каде што немаше ниту еден пневматик. Им реков: „Луѓе што е работата, па немаме ниту една гума. Што ќе правиме? Распукана е целата гума. Не дај боже ќе направиме беља“, а тие само ги креваат рамениците – вели нашиот соговорник кој сакаше да остане анонимен.
Од ЈСП Скопје подоцна реагираа на нашата објава и истакнаа дека станувало збор за мало доцнење на испораката на нови гуми откако имале потпишано договор со новата фирма која ќе ги снабдува и проблемот бил надминат.
АВТОБУСИТЕ ПАРКИРАНИ НА ТРУПЦИ Продолжува агонијата во ЈСП, возачите возат со распукани гуми
Немаше гориво
Во ноември следеше уште еден скандал на кој алармираа возачите и вработените во јавното претпријатие, а беше поврзан со недостигот на гориво и честите проблеми со дефектите на автобусите.
– Од петокот од 17 часот нема нафта во гаражите во Автокоманда и во Ѓорче Петров. Денеска 3-4 автобуси на ЈСП останаа на улиците без нафта. Во моментов десетина автобуси се принудени да се повлечат во гаражите. Доколку не добиеме нафта денеска или утре, најдоцна до 4.30 сабајлето, пред да почне возењето, Скопје може да остане без никаков јавен превоз – ни изјавија тогаш изворите на Плусинфо од ЈСП.
Уморни возачи
Истиот месец се случи и протестот на приватните превозници кои поради долгот од страна на ЈСП Скопје престанаа да возат, затоа од претпријатието беа принудени да ги преземат дел од нивните линии, а во тој период возачите се пожалија дека поради зголемениот обем на работа, некои возачи се принудени да возат две смени една по друга.
– Навистина не знам до кога ќе трае ова лудило, зашто повеќе не се издржува. На пример, возам прва смена, го враќам автобусот и веднаш седнувам во друг и се вклучувам во сообраќај. Искрено, како јас, така и колегите, веќе сме преморени. Одговорноста е голема, а заморот може да нѐ совлада и да дојде до некоја непосакувана грешка – ни изјави возач во ЈСП Скопје, кој сакаше да остане анонимен.
Го прашавме во ЈСП Скопје дали се точни информациите што ги добивме од возачите. Претпријатието вели дека станува збор за шпекулации.
– Наведените поплаки од возачите ги сметаме неосновани. Очигледно е дека станува збор за шпекулации – ни одговорија од ЈСП.
НЕ ИЗМИСЛУВАЈТЕ, ВОЗАЧИТЕ НА ЈСП НЕ ВОЗАТ ДУПЛИ СМЕНИ! Возачи обвинуваат, ЈСП демантира
Проблемите од ден во ден се зголемуваат во ЈСП Скопје што ѝ задаваат главоболки и на градоначалничката Арсовска која во својата предизборна кампања најави нови 250 еколошки автобуси и бесплатен превоз за сите скопјани. Но реализацијата на овие проекти како да е стопирана, а тоа резултираше и со промена на в.д. директорот Кристијан Чушков кој беше на функцијата 4 години и беше поставен од страна на претходниот градоначалник Петре Шилегов. На местото на Чушков беше именуван Иван Илиевски, но по само пет месеци на функцијата тој беше заменет со актуелниот в.д. директор Александар Стојковски.