ЌЕ ЈА СПАСУВА ЛИ ТАРАВАРИ ВЛАСТА НА КОВАЧЕВСКИ ПО РЕЦЕПТОТ НА ГАШИ „Огнената група“ на ДУИ се заканува, мнозинството се топи како мразулец?
Ковачевски може да ги понуди и сите министерства, но тој заборава дека на Македонија ѝ следува тешка економска и енергетска криза. Ни следува банкрот. И што ако им понуди министерски или директорски места на новите коалициски партнери? Тоа е исто како некој да ви рече дека ќе добиете 50 проценти од нула, вели аналитичарот Синиша Пекевски.
Сегашните 64 пратеници кои го сочинуваат владиното мнозинство во Собранието многу лесно би можеле да се намалат на 62, особено откако „огнената група“ на ДУИ, чии членови никако не можат да се помират со фактот дека Артан Груби сѐ уште е главна фигура и десна рака на лидерот Али Ахмети, овојпат отворено се закани дека би можела да делува како фракција, додека, пак, двајцата пратеници од оваа група – Изет Меџити и Мерита Коџаџику – би ја напуштиле пратеничката група во Парламентот и би делувале како независни пратеници.
И кога на сето ова ќе се постави и прашањето колку СДСМ може да смета на својот пратеник Диме Велковски, кој веќе еднаш ѝ го сврте грбот на партијата кога соопшти дека е против францускиот предлог, но и ако се земе предвид незадоволството на пратеникот и лидер на Демократски сојуз, Павле Трајанов, воопшто не би било изненадување доколку наскоро почнат полека да се кршат и така стаклените нозе на власта.
Но, за волја на вистината, коментираат политичките аналитичари со коишто разговараше Плусинфо, дури и таквата пата-пата ситуација и таквото неочекувано изедначување на силите во Собранието не би требало да претставуваат „крај на светот“ за властите, бидејќи, судејќи по потезите повлечени во блиското минато, ова нема да им биде првпат на СДСМ и на ДУИ да изнаоѓаат начини како да се извлечат од калта и да го одржат потребното мнозинство во Парламентот.
Сите се заинтересирани за бенефиции, никој не сака да биде директор без моќ и без финансии. Што ако добиеш функција ако сите скокаат врз тебе и плачат оти не добиле плата?
Лани во декември, истата оваа власт, но на чело со експремиерот Зоран Заев наместо со актуелниот Димитар Ковачевски, се најде во слична ситуација кога партијата на Билал Касами, Беса, одлучи да ја напушти власта по одлуката на Државната изборна комисија (ДИК) да има прегласување во Општина Желино по приговори поднесени од ДУИ. И тогаш почнаа сериозно да се тресат стаклените нозе на власта, особено откако тројцата пратеници на Беса го напуштија парламентарното мнозинство, но и покрај сѐ, власта на Заев и Ахмети и тогаш најде брзо решение: склучи коалициски договор со лидерот на тогашната опозициска Алтернатива, Африм Гаши, кој, пак, „скапо ги продаде“ своите четворица пратеници – за возврат доби три министерски места, три заменик-министерски и десетина директорски фотелји.
Според аналитичарите, доколку и сега би се случило такво нагло топење на владиното мнозинство, не би требало да нѐ чуди доколку и премиерот Ковачевски, по стапките на својот претходник, тргне во мисија да убедува некоја од опозициските партии да се приклучи во владината коалиција. А во моментов, посочуваат нашите соговорници, најблиску до такво нешто е партијата на Арбен Таравари, Алијанса за Албанците, која брои 8 пратеници.
Дека нешто такво веќе сериозно се шушка, говори и завчерашната изјава на Таравари, кој јасно порача: Ако добиеме понуда за влез во Влада, ќе ја разгледаме!
– Темата за условување околу тоа дали да се влезе или да се излезе не сме ја дискутирале, ние не сме биле дел од Владата ниту, пак, сме размислувале за тоа. Но, ќе размислиме, ќе ја разгледаме опцијата ако постои таков предлог, но сега за сега нема нешто такво – рече Таравари.
И политичкиот аналитичар Синиша Пекевски се согласува дека Алијанса за Албанците е најбиску до склучување договор за коалиција со власта, но како што објаснува, преговорите ќе бидат тешки, оти овојпат премиерот нема да може да се расфрла со министерски и директорски позиции како што тоа го правеше Заев минатата година.
– Кога велам дека нема да може да се расфрла со директорски и министерски функции всушност мислам дека министерските и директорските функции веќе ја загубија вредноста. А вредноста се губи кога постојат сериозни финансиски проблеми. Ковачевски може да ги понуди и сите министерства, но тој заборава дека на Македонија ѝ следува тешка економска и енергетска криза. Ни следува банкрот. И што ако им понуди министерски или директорски места на новите коалициски партнери? Тоа е исто како некој да ви рече дека ќе добиете 50 проценти од нула. И колку ќе земете? Сите се заинтересирани за бенефиции, никој не сака да биде директор без моќ и без финансии. Што ако добиеш функција ако сите скокаат врз тебе и плачат оти не добиле плата? Затоа сметам дека тешко ќе оди оваа работа, но ајде да видиме – објаснува Пекевски.
Кога се во прашање албанските политички партии во земјава, додава тој, тие се силни поддржувачи на американските интереси во Македонија, а тоа значи дека имаат одлична соработка со Амбасадата на САД.
– Токму Амбасадата на САД нема да дозволи сега да падне Владата на СДСМ, па ако некаде зачкрипи, тогаш ќе се најде помош од која било политичка партија, вклучително и од Алијанса за Албанците. Хипотетички гледано, партијата на Ковачевски би направила сѐ за да остане на власт, па секако дека е голема веројатноста да ѝ понуди коалиција на партијата на Арбен Таравари. Во нормални околности, СДСМ би била подготвена да му даде сѐ што ќе побара новиот коалициски партнер, нешто што веќе го стори Заев со Гаши од Алтернатива – вели аналитичарот.