Под влијание на циклонска активност со центар над Џеновскиот залив, од денеска до четврток времето во Македонија ќе биде променливо облачно со сончеви периоди. Локално ќе биде нестабилно со пороен дожд, грмежи и со засилен ветер. Локално и повремено атмосферските процеси ќе бидат поинтензивни и во форма на невреме проследено со обилен пороен дожд, силен ветер, електрични празнења и со услови за појава на град.

Повеќе од метеопрогнозата на Славчо Поповски може да прочитате на следниот ЛИНК

The post ЦИКЛОН ОД ЏЕНОВА НОСИ НЕСТАБИЛНО ВРЕМЕ ВО МАКЕДОНИЈА Локално ќе има обилни поројни дождови, ветер и појава на град appeared first on plusinfo.mk.

Поранешниот шеф на државата Стево Пендаровски ја потврди изјавата на актуелата претседателка Гордана Сиљановска Давкоа дека сите класифицирани документи што ги добива Кабинетот се во писмена форма и се архивираат во писмена форма, но, не се согласува дека нема афера по информациите за неовластен пристап и извлекување информации од компјутерскиот систем на претседателскоот кабинет.

– Тезата е дека класифицираните информации не може да се извлечат дигитално. Добро, а може ли да се извлечат мејловите, преписката внатре во кабинет или до влада, до министерства. Значи нагаѓам, не знам. Меѓутоа, суспендиран е човекот кој работел на одржување на компјутерската мрежа заедно со некои други колеги. Велиме немаме афера, а за што е суспендиран ИТ-техничарот? Во ред, не е суспендиран архивар, значи не е таму пробиено. Просто прашувам… И индикативно е зошто треба поприлично време да помине за вие да ги дадете видеоснимките или наодите од форензичките испитувања на мобилните телефони на припадникот на кабинетот – рече Пендаровски во гостување на емисијата „360 Степени“ на МРТВ.

На прашањедали ги препознава актерите, оти се тврди дека едниот е поранешен припадник на „Волците“, ангажиран во кабинетот и негово време, Пендаровски рече дека не го познава лично, дека е вработен е во времето на Ѓорге Иванов, бил еден од луѓето кои се задолжени за одржување на мрежата и секојпат имало над него друг, кој е негов претпоставен.

– Она што успеав да го разберам е дека тој што му е претпоставен практично прв сугерирал до МВР, до надлежните органи, дека постои упад на неовластен субјект во компјутерската мрежа. Меѓутоа, во 10 години на Ѓорге Иванов немаме чуено за ваква афера. Човекот не бил суспендиран. Во моите 5 години немаме чуено ни индиција дека вакви работи правел тој човек. Работел и кај мене и кај Иванов. Сега се случува и јавноста заслужува минимум одговор за што станува збор – рече Пендаровски.

На прашање дали може да се извлечат паралели со случајот од неговото време како претседател, кога се појави информација за протекување информации, дури и на аудиоснимка од состанок во неговиот кабинет со целиот државно-политички врв и со амбасадорите на САД и на ЕУ, Пендаровски рече – не.

– Знаете зошто не, зашто стануваше збор за еден вработен во кабинетот кој бил припадник на „огнената група“, која беше зачетокот на Вреди во тоа време. Тој, гледајќи дека на состанокот доаѓа и господинот Али Ахмети, од кабината на преведувачот успеал да сними неколку акценти од излагањето на Ахмети, за да може тоа партиски, политички да го употреби на другата страна, контрастраната од ДУИ. Откога тоа се откри, веднаш луѓе од надлежните институции вклучително и од АНБ разговараа со човекот, заклучија дека тој нема никаков контакт со странски служби и второ, тоа што успеал да го забележи на неговиот мобилен не е класифицирана информација. Не е никаква тајна. Потоа беше истеран, се разбира, од кабинетот – рече Пендаровски.

На прашање дали тој го суспендирал или самиот заминал кај Блерим Беџети во Сарај, експретседтелот одговори дека тоа се третирали во кабинетот како дисциплинска повреда, потешка повреда на работниот однос.

– Беше вратен таму и тоа беше практично, сега да не испадне дека се шегувам на таа тема, меѓутоа во тоа беше пародијата. Беџети во тоа време беше дел од „огнената група“, подоцна се врати во ДУИ и беше малку една контроверзна ситуација – рече Пендаровски.

Во врска со тоа дали на тој состанок се договарало враќање на Никола Груевски во Македонија за да го ослаби ВМРО-ДПМНЕ пред изборите во 2024 година, одговори дека ВМРО-ДПМНЕ во тоа време како опозиција прилично го користела и го злоупотребувала тоа.

– Тие направиле транскрипт од снимката и го дадоа на американската амбасадорка, без да знаат дека и таа била присутна. Значи, станува збор за состанок, состаноци имаше такви три-четири најмалку и пред тоа и потоа на тема – Америка и Европската Унија сакаат да знаат дали ние имаме план за уставните промени, како би се приближиле до ЕУ. И тоа беше еден од тие состаноци на таа тема. Бидејќи во тој период имаше шпекулации, морам да бидам искрен и да кажам и во рамки на врвовите на тогаш владејачката партија СДСМ, дека наводно јас сум еден од проблемите за тоа, бидејќи не сакам да се согласам со помилување на Груевски. Кратко појаснување – Груевски во тој момент веќе има две правосилни пресуди и може да се врати само на два начина: ако јас го помилувам или ако донесат закон за амнестија во Собрание. Таков закон е донесен 2018 година, сите знаеме. И ВМРО гласаше цела пратеничка група – 92 гласа има тој закон за делумата амнестија. Опфатени се многу луѓе, меѓутоа сите знаеме дека индиректно беа опфатени и оние што гласаа за промена на Уставот, за упадот во Собранието… И сега јас на почетокот, како домаќин на оваа средба што ви ја споменав, велам, ќе ми дозволите неколку позиции да објаснам кои се однесуваат на моето размислување за целиов политички контекст. И меѓу другите работи велам – слушам дека некаде има шпекулации дека треба јас да го помилувам Груевски зашто така е најбрзо да ја завршиме работава, па тој ќе дојде, ќе ги убеди пратениците на ВМРО, извесна бројка и ќе се гласаат измените. Јас реков – на тоа да не смета никој, Груевски во ниедна варијанта немам намера да го помилувам. Ако сакате толку закон за амнестија, во парламент имате доволно мнозинство – терајте… Средбата е како до уставни промени. Што мислите вие, прашуваа странците. И тие даваа свои предлози, да не откривам детали, значи и Американката и Гир даваа свои предлози како полесно до таа варијанта или прашуваа, а зошто не би направиле вака? Тоа е ваше, меѓутоа каде ние можеме да помогнеме и така натаму и така натаму.

На прашање дали широка коалиција е една од идеите на Американците во тоа време Пендаровски одговори:

– Од сите работи кои не сакам да ви ги кажам, ова се решив на крај да ви кажам, затоа што е јавно промовирано од поранешниот премиер Зоран Заев. Идејата за широка коалиција е дискутирана меѓу Заев и Мицкоски – да се направи широка коалиција и две точки има тој речиси неформален договор – прво, денес Бугари во Устав, утре предвремени избори. ВМРО добива избори година дена минимум порано од регуларниот термин, а политичкиот товар го поднесуваме сите и после тоа тераме не само кон Европска Унија, туку и без таков товар тераме во развој на државата многу побрзо. Таа идеја ја поддржа меѓународната дипломатија, вклучително и американската дипломатија. Сега, кој бил прв, меѓутоа јас знам дека Заев го објаснувал тоа во тогашниот врв на СДСМ и во Владата.

The post СПОРЕД ПЕНДАРОВСКИ СЕГА ИМА АФЕРА, А ПРОТЕЧЕНИТЕ ЗАПИСИ ОД СОСТАНОК ДОДЕКА БЕШЕ ПРЕТСЕДАТЕЛ – НЕ БИЛЕ АФЕРА „Тоа не беше средба за враќање на Груевски, но се зборуваше на темата“ appeared first on plusinfo.mk.

Заклучно со декемврискиот извештај сме фронтранери во исполнувањето на Реформската агенда, рече премиерот Христијан Мицкоски и изрази жалење што опозицијата вели дека рокот за реформмите истекол.

– За жал, опозицијата денеска ја слушам како вели дека дека рокот истекол. Жалам кога политички аналфабети се дрзнуваат да даваат такви коментари, бидејќи рокот не е 1 јуни рокот, туку 30 јуни. Тоа е елементарно непознавање, но тоа е што е. Ние сме, заклучно со декемврискиот извештај, вистински фронтранери. На второ место е Албанија, на трето е Црна Гора во регионот на Западен Балкан и ние користиме најголем дел од средствата како резултат на завршените реформи и испорачаните чекори – изјави Мицкоски по отворањето на МЕФ Форум 2026.

Тој истакна дека од она што денеска разговарал со колегите на состанокот за Реформската агенда е оптимист дека и оние реформи што се во грејс период, но и од оние чијшто рок за испорака завршува на крајот на јуни, најмалку 90 проценти ќе бидат ќе бидат испорачани.

– Во четврток имаме повторно координација со Брисел со господинот Герт Јан Копман. Очекувам местото на вистински фронтранери во испорака на реформите да го задржиме и во јунскиот извештај, така што во таа смисла на испорака ние се движиме најдобро од сите земји во регионот – нагласи Мицкоски.

Во врска со очекувањата од утрешната средба со претседателот на Советот на ЕУ Антонио Кошта, рече дека пораките се јасни и аргументирани.

– Во зависност од темите моите пораки се јасни и аргументирани. Ние сме подготвени да разговараме со секого на која било тема. Ние сме подготвени да бараме решенија и тука не треба никој да има дилема, но тие решенија мора да бидат достоинствени и тие решенија мора да опфатат заштита на македонскиот национален идентитет. Но, истовремено решенија кои што ќе значат почеток и крај на процесот, а не само почеток на процесот. Тоа не е доволно – рече премиерот.

На новинарско прашање дали има одговор од бугарскиот премиер Румен Радев за поканата за средба, рече дека засега нема одговор.

The post ЖАЛАМ КОГА ПОЛИТИЧКИ АНАЛФАБЕТИ КОМЕНТИРААТ ЗА РЕФОРМСКАТА АГЕНДА Рокот за реформите не е 1 јуни, туку 30 јуни appeared first on plusinfo.mk.

Министерот за надворешни работи и надворешна трговија Тимчо Муцунски изрази очекување дека во фокусот на претстојните разговори со претседателот на Европскиот совет, Антонио Кошта ќе бидат реформската агенда и евроинтегративниот процес, како и можностите за надминување на пречките кои го кочат напредокот на Македонија кон Европската Унија.

Во врска со односите со Бугарија посочи дека постојат области во кои може да се постигне напредок, особено во делот на инфраструктурното поврзување преку Коридорот 8 и отворањето на граничниот премин „Клепало“.

– Тоа што не ми дава во овој момент голем оптимизам е начинот на кој актуелната бугарска влада на почетокот на самиот мандат се поставува кон нас како држава. Тоа што е кристално јасно е дека кај Бугарија не се единствено барање само уставните измени. Има многу елементи кои тие ги гледаат како значаен дел од нашиот евроинтегративен процес, за кои ние сметаме дека нема потреба да се дискутира во ова време во кое живееме. Бугарија од нас како држава има очекувања кои се поврзани со идентитетски прашања – како јазикот, историјата и културата. Да, бугарската страна, за разлика од сите други земји членки и сите европски институции, смета дека договорот од 2022 година е многу повеќе од само уставни измени, тоа е реалност со која се соочуваме и за која треба да најдеме решение – истакна Муцунски во гостување на Сител.

Тој додаде дека токму тоа е прашањето кое треба да се разреши со посредство на Европската Унија и земјите членки кои се добронамерни кон процесот на европското проширување.

– Ние како држава имаме обврска да бидеме проактивни. Покрај реформите кои ги спроведуваме, да нудиме решенија кои ќе бидат достоинствени – тоа е разликата помеѓу нашата Влада и сите други влади. Сите претходни влади барале решенија по секоја цена, а ние бараме решенија кои ќе бидат достоинствени и одржливи – нагласи министерот.

Муцунски е дециден дека Владата нема намера да отвора разговори за прашања поврзани со националниот идентитет.

– Ние како Влада немаме подготвеност по никаква цена да дискутираме за какво било прашање поврзано со идентитет, јазик, култура и историја – порача министерот.

Осврнувајќи се на пошироките последици од блокадата на евроинтегративниот процес, Муцунски истакна дека цената од ваквиот пристап не ја плаќа само државата.

– Цената ја плаќа и целиот регион, но и целата Европска Унија, која губи кредибилитет што дозволува билатерални прашања да го кочат европскиот напредок и ветувањата и гаранциите кои се давани кон нашата земја и кон регионот во целост – истакна тој.

Во врска со можните решенија, министерот нагласи дека државата останува посветена на изнаоѓање решение, но не по цена на нови национални отстапки без јасни гаранции.

– Факт е дека ние мораме да најдеме решение, тоа нема дилема. Но, доколку тоа решение значи само почеток без извесност за крај, а знаејќи дека во меѓувреме Софија е многу конкретна во своите барања за национални отстапки, тогаш нема логика да тргнеме по пат кој е неизвесен, по кој цената ќе биде нови национални отстапки без никакви гаранции – истакна Муцунски.

Додаде дека е потребно решение кое ќе даде одржливост.

– Ние разговараме и дискутираме да најдеме решение кое ќе даде не само предвидливост, туку и одржливост. Да знаеме дека сме ги затвориле сите прашања, да знаеме дека европските институции и Бугарија застануваат цврсто позади затворањето на прашањата и да почнеме да разговараме за прашања кои се суштински битни – рече министерот Муцунски.

Целта не е само да ги почнеме преговорите, туку и да ги завршиме, доколку се спроведат соодветните реформи во различните области.

– И тука е всушност каде што настанува моментот на постоење на на спор. Односно, убедувањето на најголем дел од земјите членки, европските институции дека единствена кочница на нашиот пат се уставните измени, очигледно е дека не се. И тоа е тоа за коешто треба да дискутираме и со Кошта, од потребата од давање на гаранции спрема нас како држава. Патем, и тој во Софија го кажа тоа, пред околу една година, дека државата треба да добие дополнителни гаранции – рече Муцунски.

Во врска со спроведувањето на реформите од Реформската агенда и очекувањата за нови средства од Планот за раст рече дека Владата посветено работи и изрази уверување дека Македонија повторно ќе биде меѓу најуспешните земји во регионот според бројот на реализирани реформи.

– Очекувам да спроведеме вкупно 25 реформи и да добиеме најмногу средства во регионот – вели Муцунски.

Тој апелираше до опозицијата да даде конструктивен придонес и да се вклучи во процесите што произлегуваат од европската агенда.

– Ова се закони коишто ги носиме по барање на европските институции, закони и подзаконски акти, кои што се за доброто на државата и закони коишто ги подготвуваме заеднички со европските институции – посочи тој.

Според него, неконзистентно е опозицијата да зборува за европски вредности и за европска интеграција, а истовремено да не ги поддржува законите што произлегуваат од европската агенда во Собранието.

– Кога ќе дојде редот да ги поддржите законите со европската агенда, да не ги гласате во Собрание и да бегате од работните групи како таа за Изборниот законик, кои што се на ОДИХР, но исто така на барање на европските институции – потенцира Муцунски.

Владата, додаде, посветено ја извршува својата работа и граѓаните можат да бидат сигурни оти во следниот извештаен период Македонија повторно ќе биде меѓу водечките земји по бројот на спроведени реформи.

На прашањето дали треба ли да се прашаат граѓаните на референдум што тие мислат за промената на Уставот, тој истакна дека референдумот е најсилната алатка на граѓаните, но референдум во овој момент ниту има логика, ниту нешто конкретно може да значи или да даде некој пробив во состојбата.

– Единствено служи како внатрешно-политичка алатка на главната опозициска партија која, ако им ги следите и денешните прес-конференции, не знаат ни кога ни се роковите за испорака на реформите. Тие денеска држат прес-конференции и велат „Реформите требаше да ги испорачате до јуни“, а не се свесни дека рокот е 30 јуни, а не не 1 јуни. А суштината е следна: нашите граѓани, сите анкети ни покажуваат апсолутно недвосмислено дека граѓаните даваат поддршка на европскиот пат. Но, истовремено и дека не треба да го продолжиме патот на отстапки во низа без јасни сигнали дека тоа е крај – рече Муцунски.

Прашан дали токму Европскиот совет може да биде гарант, да го испорача ова барање на македонската влада за гаранции, вели апсолутно да.

– Дефинитивно, и тоа е тоа што ние го кажуваме. Една од институциите коишто можат преку свои заклучоци да даде гаранции дека нема за нашата држава да има дополнителни барања поврзани со историја, со идентитет, јазик и култура е Европскиот совет, како главна институција што ги носи одлуките во името на земјите-членки. Но, не треба да се запостави запостави и нашето очекување дека соседна Бугарија ќе покаже минимум добра верба спрема нас и ќе си ги преземе обврските согласно Европската конвенција за човекови права – рече министерот за надворешни работи, Тимчо Муцунски.

The post НАЧИНОТ НА КОЈ СЕ ПОСТАВУВА НОВАТА БУГАРСКА ВЛАДА НЕ ДАВА ОПТИМИЗАМ Не им е услов само Уставот, ама по ниедна цена не разговараме за идентитетските прашања appeared first on plusinfo.mk.

Времето утре ќе биде променливо облачно со сончеви периоди, најави Управата за хидрометеоролошки работи.

Во попладневните часови ќе има локална појава на нестабилност со пороен дожд, грмежи и со засилен ветер. Ќе дува засилен до силен ветер од западен правец, кој повремено во западните делови ќе надминува брзина од 60 километри на час.

Најстудено ќе биде во Берово, со утринска температура до 9  степени, а најтопло во Гевгелија, со температура до 32 тепени Целзиусови.

Во Скопје ќе биде променливо облачно со сончеви периоди. Попладне во делови од котлината ќе има услови за краткотраен пороен дожд и грмежи. Температурата ќе се движи од 14 до 30 степени.

До крајот на оваа седмица времето ќе биде променливо облачно време со сончеви периоди. Во попладневните часови наместа ќе има појава на пороен дожд, грмежи и засилен ветер.

Локално процесите ќе бидат поинтензивни, со пообилен пороен дожд, силен ветер, грмежи и услови за појава на град, особено во четврток и во сабота.

Ќе дува умерен до засилен ветер од западен правец.

The post ЌЕ КОСИ СИЛЕН ЗАПАДЕН ВЕТЕР СО БРЗИНА НАД 60 КИЛОМЕТРИ НА ЧАС Следуваат денови со поројни дождови, грмежи и со услови за град appeared first on plusinfo.mk.

Управата за заштита на културното наследство во врска со јавните реакции за рушењето на куќата во Охрид изградена во 1927 година информира дека објектот не поседува статус на заштитено културно наследство согласно Законот за заштита на културното наследство, ниту е евидентиран како добро под привремена заштита.

„Оттука, Управата за заштита на културното наследство нема законски ингеренции за постапување во однос на издавање согласности, забрани или други управни акти поврзани со интервенции на овој објект. Надлежностите на Управата се однесуваат исклучиво на културни добра кои имаат утврден статус на заштита или се во постапка за заштита, согласно важечката законска регулатива“, соопшти Управата.

До Управата, се додава во соопштението, не е покрената постапка за воспоставување заштита на предметниот објект од надлежна установа за заштита, поточно НУ Завод за заштита на спомениците на културата и музеј – Охрид .

„Невладината СОС Охрид не е надлежна установа за доставување предлози за воспоставување заштита за објекти кои треба да бидат културно наследство. Објектот се наоѓа во контактната зона на Споменична целина Старо градско јадро на Охрид, за кој постои утврден режим на заштита. Со оглед на ова Националата установа за заштита на споменици и музеј – Охрид е надлежна установа која треба да ја следи состојбата на терен“, соопшти Управата.

Во време кога дезинформациите брзо се шират преку социјалните мрежи, од особена важност е јавноста да прави разлика помеѓу официјално потврдени информации и објави кои не се поткрепени со документи, факти или институционални извори, се додава во соопштението.

„Случајот со објектот на улицата Димитар Влахов во Охрид уште еднаш ја отвора потребата од одговорно информирање и проверка на фактите пред да се пласираат во јавноста обвинувања кои можат да доведат до погрешна перцепција и непотребно вознемирување на граѓаните“, соопшти Управата за заштита на културното наследство.

Деновиве има силна реакција од граѓаните по најавите дека сопствениците ќе ја урнат куќата со специфична архитектура.

Од вчера, процесот на уривање почна.

На социјалните мрежи се коментира дека куќата имала повеќе сопственици и дека има видливи оштетувања одвнатре и однадвор.

Деновиве „Охрид СОС“ поднесе барање итно да се заштити објектот од уривање, за, како пто порачаа, да не се претвори во зграда.

Граѓанската иницијатива „Охрид СОС“ информираше дека на 29 мај доставила барање за итна привремена заштита на куќата, откако биле информирани дека во дворот има багер.

Претпознатливата куќа изградена во 1927 година се наоѓа во непосредна близина на охридското старо градско јадро, а барањето за нејзин спас е поднесено до Министерството за култура и туризам, Управата за заштита на културното наследство и Заводот за заштита на спомениците на културата и Музеј – Охрид, соопшти иницијативата.

Според „Охрид СОС“, објектот е исклучително вреден пример на еклектична градска архитектура од меѓувоениот период и содржи уникатни архитектонски и декоративни елементи, кои денес се зачувани во мал број во државата. Иниијативата побара надлежните институции итно да го спречат понатамошното оштетување на објектот и да донесат решение за привремена заштита, согласно член 39 од Законот за заштита на културното наследство, што би овозможило да почне постапка за валоризација на куќата и нејзино понатамошно користење во согласност со нејзините културни и историски вредности како добро од јавен интерес.

Во образложението се наведува и дека куќата е сместена во близина на повеќе значајни јавни објекти, меѓу кои Маларичната амбуланта, Пензионерскиот дом, градинката „Јасна Ристеска“, гимназијата „Свети Климент Охридски“ и Основното училиште „Григор Прличев“, со што претставува дел од веќе формирана архитектонско-урбанистичка целина.

The post НЕ Е ЗАШТИТЕНО КУЛТУРНО НАСЛЕДСТВО Почна уривањето на куќата на „Димитар Влахов“ во Охрид appeared first on plusinfo.mk.

Опозициската партија СДСМ соопшти дека ги враќа можностите за коментари на своите објави на социјалните мрежи на сите платформи.

Партијата повика на поголема вклученост и на јавна дискусија.

СДСМ апелира граѓаните да се вклучат во иницијатива за, како што наведува, „чистење на просторот од омраза и поделби“ на социјалните мрежи, преку активна реакција и учество во онлајн комуникацијата.

Опозицската партија повикува на заедничка акција и поголема ангажираност на јавноста во дигиталниот простор, со цел „поттикнување на конструктивен дијалог и намалување на негативните содржини“.

Упатува и повик за пријавување и за реакција на несоодветни коментари на социјалните мрежи.

Пред нецел месец СДСМ ги забрани коментарите на официјалните профили на партијата на социјалните мрежи.

НЕМА ВЕЌЕ КОМЕНТИРАЊЕ НА ПРОФИЛИТЕ НА СДСМ Партијата најави борба со „трол-фабриката на ВМРО-ДПМНЕ“

The post СДСМ ГИ ВРАЌА КОМЕНТАРИТЕ НА СОЦИЈАЛНИТЕ МРЕЖИ Ако сте умни, може и Зоки ќе го вратат appeared first on plusinfo.mk.

Нема ниту еден македонски универзитет на новата листа Глобал 2000, објавена од Центарот за рангирање на светски универзитети. Оваа листа е составена со анализа на над 80 милиони податоци.

Најдобро пласиран од земјите на поранешна Југославија е Универзитетот во Белград, кој е на 393-то место. Универзитетот во Љубљана е на 444-то, а Свеучилиштето во Загреб на 522-то место.

На листата Глобал 2000 има уште три универзитети од Србија и тоа Универзитетот во Нови Сад, кој е рангиран на 1.136 место, Универзитетот во Крагуевац на 1.549 место и Универзитетот во Ниш на 1.886 место.

Од Хрватска, покрај загрепскиот на листата се уште и Универзитетот во Сплит, кој е на 953-та позиција и Универзитетот во Риека, на 1.658-та.

Од Словенија на листата се најде и Универзитетот во Марибор – на 1.293-то место од вкупно 2.000 најдобри во светот.

Топ 10 рангирани универзитети во светот оваа година се: Харвард, МИТ, Стенфорд, Кембриџ, Оксфорд, Принстон, Универзитетот во Пенсилванија, Колумбија, Јеил и Универзитетот во Чикаго. Од нив, дури 8 се во Соединетите Американски Држави, а 2 се во Обединетото Кралствво – Кембриџ и Оксфорд,

Центарот ги оценува универзитетите врз основа на 4 критериуми, без да се потпира на анкети или податоци обезбедени од самите универзитети: квалитет на образование (25 проценти), вработливост на дипломираните студенти (25 проценти), квалитет на наставниот кадар (10 проценти) и истражувачка работа (40 проценти).

За рангирањето оваа година се анализирани 81 милион податоци, врз основа на конкретни резултати.

Харвард, Стенфорд и МИТ се меѓу најцитираните универзитети во светот.

Кина има 360 универзитети во првите 2.000.

Јапонија има 102 универзитети на листата, предводени од Универзитетот во Токио, кој е на 13-то место.

Обединетото Кралство има 89 институции во првите 2.000. Кембриџ е најдобро рангиран јавен универзитет во светот 13-та година по ред.

Франција има 71 претставник на листата, а најдобро рангираната институција е Универзитетот ПСЛ, кој е на 20-то место.

Русија, предводена од Московскиот државен универзитет на 264-то место, има 42 универзитети во првите 2.000.

The post УКИМ ТОНЕ СЀ ПОДЛАБОКО, МАКЕДОНСКИТЕ УНИВЕРЗИТЕТИ СЕ НЕВИДЛИВИ ВО СВЕТОТ Нема ниту еден на листата Глобал 2000 appeared first on plusinfo.mk.

Потребата од згрижувачки семејства е постојана. Потребно е да се зголеми свеста за оваа хумана работа, но и да се направат системски промени за да се овозможи развој на ваквиот тип на семејства, односно да се понудат повеќе мотивирачки решенија од страна на Министерството за социјална политика. Вакви пораки денеска испратија претставниците на надлежните институции на одбележувањето на Денот на згрижувачките семејства.

Настанот се одржа во Зоолошката градина – Скопје со присуство на сопругата на премиерот, Рози Мицкоска, заменик-министерот за социјална политика, демографија и млади, Ѓоко Велковски, претставници на општини и на институции, донатори и згрижувачки семејства.

Директорката на Домот „11 Октомври“, Павлина Трајановска, апелираше секој што има можност, да го отвори својот дом и да им подаде рака на децата во социјален ризик.

– Потребно е да се промени целосно менталниот склоп на населението во Македонија, сè уште свесноста не е на високо ниво за секој од нас како семејство да почне да размислува да им помогне на овие деца, да го отвори својот дом и да им даде љубов, поддршка и социјална сувереност. Формата за згрижување е привремен облик на социјална заштита. Времетраењето на згрижувањето е онолку колку што е потребно и во интерес на самото дете – вели Трајановска.

Според директорката на СОС Детско село, Јулијана Гапо, згрижувачките семејства се најдобриот модел за детето и најевтиниот за државата поради што државата треба да стори нешто за да ги мотивира семејствата да згрижуваат. Вели дека потребата од згрижувачки семејства е секојдневна, но, за жал, нема доволна заинтересираност.

– Потребни ни се системски промени за да се овозможи развојот на згрижувачките семејства, односно да имаме повеќе згрижувачки семејства, а за да го имаме тоа, мора да се понудат некои мотивирачки решенија од страна на Министерството. Утре да се отворат 100 згрижувачки семејства, сите ќе бидат пополнети во рок од 48 часа. За жал, нема доволна заинтересираност. Да речеме, ако се јават три згрижувачки семејства, нам ни требаат 10, така што цело време сме во некаков недостиг од згрижувачки семејства – вели Гапо.

Во земјава во моментот има 384 згрижувачки семејства, каде што се сместени 664 лица и ова е константна бројка во текот на годините. Сепак, заменик-министерот за труд, Ѓоко Велковски, вели дека се работи за жива материја, која секојдневно се менува.

– Како Министерство заедно со ресурсните центри во Битола и СОС Детското село продолжуваме со кампањата за го зголемиме бројот на згрижувачки семејства за да може сите дечиња, кои, за жал, животната судбина ги оставила на таков момент, да имаат каде да се згрижат и да го добијат она што е најблиску до нивниот дом, а тоа е згрижувачкото семејство – вели Велковски.

Согласен е дека бројката на згрижувачки семејства треба да биде поголема за да има во секој момент слободно згрижувачко семејство, кое, доколку има потреба, може да згрижи дете во социјален ризик.

– Тоа е тековен процес во кој денес може да немате ниту едно детенце, а утре да се појават повеќе деца, кои ќе имаат потреба да бидат згрижени – посочува Велковски.

Покрај кампањата за подигнување на јавната свест, Министерството и директно ги помага згрижувачките семејства со месечна финансиска поддршка.

На настанот присуствуваше и градоначалничката на Кисела Вода, Бети Стаменкоска, која објави дека на територијата на општината има 13 згрижувачки семејства.

– Им оддадовме искрена почит на луѓето кои преземаат реална, секојдневна одговорност за децата на кои им е потребна стабилност, поддршка и дом. Овие луѓе заслужуваат огромна почит, бидејќи тие несебично ја споделуваат својата семејна средина и во пракса покажуваат како вистински се расте со љубов. Верувам дека примерот на овие семејства ќе биде силен мотив и поттик и за други наши сограѓани да размислат за овој чекор. Секое дете заслужува семејство – објави Стаменкоска на Фејсбук.

Да се биде згрижувач значи да се биде херој на едно детство, и затоа, како институции и како заедница, ќе продолжиме да ја даваме нашата целосна поддршка, додаде таа.

Цената на социјалната услуга за згрижување во општо згрижувачко семејство зависи од бројот на сместените деца во едно семејство. Ако во семејството е згрижено едно дете, месечниот надомест изнесува 22.015 денари, за две деца 37.820 итн. Останатите надоместоци за 2026 година погледнете ги ТУКА.

The post 📷 СЕКОЈ ШТО МОЖЕ ДА ГО ОТВОРИ СВОЈОТ ДОМ ЗА ДА ЗГРИЖИ ДЕТЕ Потребата е зголемена, веднаш би се пополниле 100 семејства, ако има заинтересирани appeared first on plusinfo.mk.

Вицепремерот за добро владеење Арбен Фетаи, соопшти дека му ја доставил на премиерот Христијан Мицкоски својата оставка од функцијата што ја извршуваше.

Во јавна објава на социјалните мрежи, тој напиша дека одлуката е донесена внимателно и произлегува од неговото убедување дека во актуелните околности тоа е најправилен и најдостоинствен чекор. Фетаи оцени дека за време на неговиот мандат придонел за реформи насочени кон зајакнување на одговорноста, транспарентноста и кон владеењето на правото.

„Денеска му ја доставив на премиерот мојата оставка од функцијата заменик-претседател на Владата за добро владеење. Во изминатите две години имав чест и привилегија да ѝ служам на државата, придонесувајќи за реформи што имаат за цел зајакнување на отчетноста, транспарентноста и владеењето на правото — мисија која е исто толку важна, колку што е и неблагодарна. Дали сум целосно задоволен од она што го постигнавме? Секако дека не. Секогаш има простор за повеќе, за подобро и за побрзо. Но, дали работев со максимална посветеност за да поставам здрави темели врз кои може понатаму да се гради? Без никаква дилема, да“, објави Фетаи.

Заминувам со крената глава и со чиста совест, додава тој.

„Ова е внимателно донесена одлука, базирана на убедувањето дека во актуелните околности ова е најправилниот и најдостоинствениот чекор. Им благодарам на сите што ми укажаа доверба, ме поддржаа и што соработуваа со мене. Посебна благодарност до мојот тим, меѓународните партнери, граѓанското општество и до граѓаните кои ми беа поддршка и мотивација на секој чекор“, вели Фетаи.

Службата на јавниот интерес не завршува со функцијата, додаде.

„Напротив, таа продолжува секаде каде што има потреба од интегритет, храброст и од слободни гласови во одбрана на заедничкото добро“, напиша Фетаи.

The post ВИЦЕПРЕМИЕРОТ АРБЕН ФЕТАИ ПОДНЕСЕ ОСТАВКА Тврди дека заминува со крената глава и со чиста совест appeared first on plusinfo.mk.