Можно е да се постигне договор со Софија доколку постои партнерски однос и подготвеност за дијалог, но Македонија нема да влезе во процес во кој постојано ќе се поставуваат нови барања без јасна перспектива за негово завршување, рече премиерот Христијан Мицкоски.

Според Мицкоски, иако по последната посета на министерот за надворешни работи и надворешна трговија Тимчо Муцунски на Софија немало позитивни сигнали за напредок во односите, можноста за договор постои, под услов двете страни да пристапат кон проблемот како партнери.

– Вие ме прашувате дали има можности, јас ви велам дека има. Доколку имаме партнерски однос, можно е. Доколку немаме партнерски однос, односно доколку продолжат со булингот, со позицијата „ние сме внатре, вие сте надвор“, тогаш нема договор – рече Мицкоски во интервју на ТВ21.

Според него, неопходно е да се направи разлика меѓу соседство со држава која треба да стане дел од Европската Унија и однос во кој од соседот се бара постојано да решава историски прашања.

– Ако навистина сакаат да видат сосед кој ќе биде дел од Европската Унија, а не сосед од кој ќе бараат решавање прашања од 11 век, 10 век, Средниот век, за жал, немаме живи луѓе за да посведочат што се случило тогаш, а врз основа на историските факти што ги читаме, ние и тие имаме различни толкувања. Така што, сè додека постојат овие билатерални бариери, тешко дека ќе најдеме решение – оцени премиерот.

Тој нагласи дека Владата сака да најде решение и прави сè што е во нејзина моќ за да го почне преговарачкиот процес со ЕУ, но нема да прифаќа отстапки без извесност дека процесот ќе има крај.

– Ние сакаме да го почнеме конечно тој процес, но не по секоја цена и нема без глава да одиме во овој процес. Едноставно, ќе си ја градиме нашата позиција, бидејќи позицијата што ја имавме како држава пред 3 години и оваа што ја имаме денес се сосема различни работи – рече Мицкоски.

Осврнувајќи се на средбата со претседателката на Европската комисија, Урсула фон дер Лајен, премиерот рече дека советот што го добил од неа бил Македонија и Бугарија да почнат да се среќаваат и да разговараат за отворените прашања. Тој посочи дека ја прифатил препораката и дека на таа основа побарал од Муцунски да иницира средба со бугарската колешка.

Како можност за таква средба бил посочен регионалниот самит поврзан со Коридорот 8, а Муцунски, по барање на премиерот, испратил дипломатска нота до бугарската страна.

Мицкоски рече дека прифатената иницијатива ги надминала неговите очекувања, бидејќи првично сметал дека средбата ќе биде само формална.

– Јас го замолив нашиот министер тоа да го направи и тој го направи тоа преку дипломатска нота. Тие го прифатија. Тоа ги надмина моите очекувања. Тоа беше средба на маса, каде што две држави разговараат за проблем и водат дијалог – изјави Мицкоски.

Тој посочи дека на прес-конференцијата по средбата била присутна и еврокомесарката за проширување Марта Кос, која можела непосредно да добие впечаток за разговорите меѓу двете страни.

– Добро е што почнавме, бидејќи досега немавме почеток на таков тип дијалог. Јас очекувам овој дијалог да продолжи – рече премиерот.

Мицкоски нагласи дека Владата не разговара само за моменталната позиција на земјата во процесот на пристапување кон ЕУ, туку и за тоа како да се стигне до крајната цел – членство во Унијата.

Тој оцени дека Македонија има пријатели во меѓународната заедница кои ја поддржуваат нејзината позиција, но предупреди дека процесот ќе биде долг и сложен.

Мицкоски ја критикуваше претходната влада на СДСМ и ДУИ, оценувајќи дека направила сериозна грешка со прифаќањето на условите поврзани со продолжувањето на евроинтеграциите, без да обезбеди извесност дека тие ќе бидат доволни за напредок.

Според него, претходната влада прифатила нешто што очигледно не можела да го испорача, а со своите настапи и ветувања во Брисел придонела дел од европските политичари да поверуваат дека процесот може да се придвижи на тој начин.

– Прифатено е нешто што очигледно таа влада не можеше да го испорача. Само по себе направи катастрофална грешка. За жал, со нивните настапи и лажни ветувања во Брисел, имаше такви од Брисел политичари кои што поверуваа. Потоа правеа егзибитиции на домашната сцена, менуваа кривични закони, овозможуваа политичка амнестија, мислеа дека на тој начин ќе се направи некаков притисок врз Владата во Скопје и дека Владата во Скопје ќе прифати да влезе во уште една авантура без крај. Тоа Владата во Скопје не го прифати и сè додека сум јас таму нема да го прифати без да имам јасен крај на овој процес – рече Мицкоски.

Тој додаде дека ја разбира позицијата на европските претставници, кои упатуваат дека одлуките на ЕУ се веќе донесени и дека треба да се исполнат преземените обврски, но нагласи дека токму затоа е потребен дијалог со Софија.

Во однос на историските прашања и нивната поврзаност со процесот на пристапување, Мицкоски посочи дека Македонија треба да бара решение што ќе ги заштити нејзините интереси и ќе овозможи вистинско напредување кон членство, наместо постојано да се соочува со нови барања.

Мицкоски посочи дека мнозинството граѓани го поддржуваат членството во ЕУ, но дека истовремено постои и мнозинство кое не сака евроинтеграциите да се одвиваат по секоја цена и со дополнителни отстапки без извесен крај.

– Јас никогаш нема да влезам во овој процес без да ги штитам безусловно интересите на моите граѓани. Јас сум премиер на сите граѓани. Тука не прифаќам поделба по етничка и по религиска, по партиска или непартиска припадност – рече Мицкоски.

Тој додаде дека ја застапува политиката што ја смета за внимателна и одговорна, за разлика од пристапот на опозицијата, кој, според него, подразбира влегување во процеси без да се добијат соодветни гаранции.

Мицкоски рече дека конечната оценка за неговата политика ќе ја дадат граѓаните на изборите.

– Дали сум бил во право, ќе видам на следните избори. Ако бидам поразен, на тие што ќе победат ќе им честитам и ќе се повлечам од политиката. Тоа е легитимно. Секоја политика е легитимна, цената се плаќа на избори – изјави премиерот.

На прашањето дали Владата има поинаков план доколку Софија не ја промени позицијата и спорот продолжи да се одолговлекува со години, Мицкоски одговори дека Владата веќе работи на реформите и на исполнувањето на обврските што се во нејзина надлежност.

Тој посочи дека Македонија ја спроведува реформската агенда и дека во извештајните периоди декември 2025 и јуни 2026 година остварила значителен напредок, со најголем број спроведени реформи и најголем обем искористени средства од Планот за раст.

Премиерот рече дека реформските активности се потврдени и во разговорите со европските претставници, а како пример ја посочи посетата на Фон дер Лајен на Скопје.

– Претседателката Фон дер Лајен на прес-конференцијата, нешто што никој не го кажува, само тука во Скопје, во Македонија го кажа: „You are doing impresive job“, односно, вршите импресивна работа – рече Мицкоски.

Според него, постепеното приклучување кон Европската Унија е една од можностите што треба да се разгледуваат, бидејќи постојат механизми за напредок што не зависат непосредно од билатералниот спор со Бугарија.

Мицкоски рече дека Македонија исполнува два од трите услови што ги наведе за таквиот пристап – усогласување со заедничката надворешна и безбедносна политика и скринингот, а како трет услов го посочи законодавството за јавни набавки, наведувајќи дека соодветниот закон бил усвоен во Собранието пред десетина дена.

Тој, сепак, не потврди дека постепеното приклучување ќе овозможи напредок без да се реши спорот со Бугарија, туку нагласи дека постојат механизми што можат да се искористат независно од непредвидливоста на билатералното прашање.

Како дополнителен предизвик во евроинтегративниот процес, Мицкоски го посочи Акцискиот план за малцинствата, кој е дел од патоказот за владеење на правото.

Тој рече дека по совет од Брисел, документот бил подготвен со ангажирање експерт и по повеќе јавни дебати, а според неговите информации, 26 земји членки на ЕУ немале забелешки, додека една земја имала забелешки, алудирајќи на Бугарија.

Премиерот предупреди дека ова прашање покажува оти исполнувањето на едно барање не значи дека нема да се појават нови услови во следните фази од преговорите.

– Акцискиот план за малцинствата е предуслов за да го отвориме следниот кластер. Утре да го смениме Уставот, утре да одлучиме да прифатиме сè што сака Бугарија, повторно ќе имаме уште еден документ за кој ќе треба да се договараме и разговараме со нашиот сосед – рече Мицкоски.

Тој посочи дека постои загриженост и поради можноста за нови блокади при отворањето и затворањето на преговарачките поглавја, дури и за прашања што не се директно поврзани со реформите и so европските стандарди.

Според него, блокада би можела да биде образложена со друга причина, додека суштинскиот проблем би бил билатерален спор или несогласување за историски прашања.

– Затоа сакаме да видиме пат кој ќе биде јасен и кој ќе го штити интересот на граѓаните. Ете, тоа е она што го прави оваа Влада – истакна премиерот.

На прашањето дали до крајот на мандатот Македонија би можела да направи исчекор во преговорите со ЕУ и да отвори кластер, Мицкоски рече дека не може да даде категоричен одговор, бидејќи тоа не зависи само од Владата.

Мицкоски потсети дека Македонија во минатото направила големи отстапки, меѓу кои ги наведе промената на знамето и промената на уставното име, но оцени дека и по тие чекори земјата сè уште не го започнала суштинскиот преговарачки процес.

Тој рече дека Македонија има усогласена надворешна и одбранбена политика со ЕУ, дека работи на реформите и проектите и дека нејзините граѓани заслужуваат да напредуваат според принципот на заслуги, односно според исполнувањето на критериумите.

The post МИЦКОСКИ ОЧЕКУВА ДА ПРОДОЛЖИ ЗАПОЧНАТИОТ ДИЈАЛОГ СО БУГАРИЈА Има можност за договор ако односот е партнерски, а со булинг – нема договор appeared first on plusinfo.mk.

Формирањето на Специјалното јавно обвинителство претставуваше сериозен удар врз правдата, а уште од самиот почеток беше поставено на неуставни основи., рече премиерот Христијан Мицкоски.

– Чувството кај граѓаните потекнува од, условно кажано, би рекол, работи кои се случија во минатото и коишто мислам дека зададоа силен удар врз правдата во Македонија. Првиот е оној период 94–98 година кога ВМРО-ДПМНЕ беше вонпарламентарна опозиција и кога судиите се избираа во Собранието. Кога практично тогашната власт, којашто беше со акламативна моќ, избра стотици судии од коишто дел се сè уште активни судии. И тоа беше политички обоена структура – рече Мицкоски во гостување на ТВ21.

Вториот удар на правдата е кога се донесе оној имплант СЈО, додаде Мицкоски.

– Тотално неуставен имплант кога од тие коишто требаше да ја донесат правдата, ништо повеќе од естрада не видовме. Тогаш се правеа беџови, маици се штампаа, капи се носеа, дуксери СЈО. Не можете со неправда да донесете правда. Од самиот старт тој имплант е неправен, неуставен. Не може да делувате на тој начин. И за тој имплант се виновни сите партии, бидејќи консензуално беше донесено. Сега не сакам да ја оградам ВМРО-ДПМНЕ. Јас не ја исклучувам ВМРО-ДПМНЕ. Но, тој имплант создаде таква перцепција, уште посилна кога се случи третиот проблем. А тоа е кога заврши во еден куфер пари. Сè се тоа процеси кои во граѓаните создадоа чувство на недоверба во правдата – дециден е Мицкоски.

The post НЕУСТАВНОТО СЈО БЕШЕ СЕРИОЗЕН УДАР ВРЗ ПРАВДАТА Недовербата почна со политичкиот избор на судии во периодот 94-98 година appeared first on plusinfo.mk.

Зад случајот со Ива Михаилова се крие политичка позадина за да ѝ се нанесе штета на Владата предводена од ВМРО-ДПМНЕ и тоа е синхронизирано со опозицијата во земјава, вели премиерот Христијан Мицкоски.

– Она што мене повеќе ме загрижува е состојбата што на ниво на хистерија ја направија одредени медиуми и политичари кај нашиот источен сосед. Не се проблемот односите меѓу двете држави, туку да му наштетат на ВМРО-ДПМНЕ и на мене, покажувајќи некаков тип на политички мускули во координирана акција и јавна дебата со македонската опозиција, и тоа е очигледно. И македонската опозиција ќе прави политички притисок врз актуелната Влада и на тој начин тие ценат дека политичката репутација на Владата и на ВМРО-ДПМНЕ ќе ја намалат во очите на граѓаните – рече вечерва Мицкоски на гостување на ТВ21.

Тие создаваат иста теза, додаде тој.

– Ако забележите, медиумите кои се провладини кај нив и нашата македонска опозиција што имаат заедничко? Заедничка е тезата дека ова било договорено. Добро, еве ако е договорено, сега има меѓународна потерница, ве молам испорачајте ги. Бидејќи имаме меѓународна потерница. Ако не ги испорачаат, тоа значи дека нивната теза не е вистина – рече Мицкоски.

Тој рече дека Михаилова не поминала на легален граничен премин во Бугарија.

– Границата е помината нелегално. Штом јас ви го говорам ова, ви го кажувам со голема доза на прецизност. МВР тоа го истражува и ќе дојдеме до одговорите, но нема никаква вистина со она што го зборуваше адвокатот којшто сам по себе има одредено проблематично минато – истакна Мицкоски.

Тој не гледа пропуст кај институциите во државата и повтори дека правдата ќе ги стигне и Ива Михаилова и нејзиниот татко правосилно осуден во случајот „Детонатор“.

– Не мислам дека ова што го направиле за нив е спас и кога-тогаш тие ќе одговараат. Ако мислат дека на овој начин ќе ја заобиколат правдата се лажат. А тоа што го направија властите кај нашиот источен сосед не можам да кажам дека е умен потег и мислам дека нивната репутација е сериозно нарушена на меѓународната сцена, но тоа е нивна работа – рече Мицкоски.

Најави дека прашањето ќе биде покренато и на состаноците на НАТО.

– Ова ќе биде покренато и на состаноците на НАТО Алијансата, бидејќи наш партнер во НАТО денес е прибежиште на осудени криминалци. Ние очекуваме во најскоро време тие да бидат испорачани на правдата. Но, исто така ова ќе биде покренато и кај нашите партнери во Европската Унија. Не би сакал осуден криминалец да биде причина за неспроведување на правдата, не би сакал да верувам дека моменталното политичко водство кај нашиот источен сосед ќе биде алиби за осудени криминалци од државата да барат бугарски пасоши и преку нелегални премини да бегаат и да барат свое прибежиште таму – рече Мицкоски.

The post ПОЛИТИКА СЕ КРИЕ ЗАД СЛУЧАЈОТ СО МИХАИЛОВА Бугарски политичари и македонската опозиција сакаат да ѝ наштетат на Владата appeared first on plusinfo.mk.

Времето утре ќе биде променливо облачно со повремени локални врнежи од дожд, најави Управата за хидрометеоролошки работи.

На некои од повисоките планини врнежите ќе преминат во слаб снег.

Ќе дува умерен, наместа долж Повардарието повремено засилен ветер од северен правец.

Најстудено ќе биде во Берово, каде утринската температура ќе се спушти до 1 степен. Најтопло ќе биде во Гевгелија со дневна температура до 19 степени Целзиусови.

Во Скопје ќе биде променливо облачно со повремен дожд. Ќе дува умерен, во делови од котлината повремено засилен ветер од северен правец. Температурата ќе се движи од 6 до 16 степени.

Во деновите од викендот и во почетокот на новата седмица ќе преовладува сончево и стабилно време со променлива облачност во текот на денот.

The post ДОЖД ВО ГРАДОВИТЕ, СНЕГ НА ПЛАНИНИТЕ За викенд сончево и стабилно време appeared first on plusinfo.mk.

Во секоја пристојна демократија, опозицијата бара предвремени избори. Доколку опозицијата побара, ние тоа задоволство ќе ѝ го пружиме, изјави вечерва вицепремиерот и министер за транспорт Александар Николоски.

Николоски го повтори ставот на Владата дека преферираат да има редовни избори во 2028 година.

– Ние сметаме дека е потребно да имаме целосен мандат, со цел да има предвидливост за бизнисот и проектите – рече Николоски во гостување на Канал 5..

Она што го бараат Левица и Али Ахмети, според Николоски, е несериозна работа.

The post ВО СЕКОЈА ПРИСТОЈНА ДЕМОКРАТИЈА ОПОЗИЦИЈАТА БАРА ИЗБОРИ Ако побара СДСМ, ќе има предвремено гласање appeared first on plusinfo.mk.

Нема договор со Бугарија за Ива Михаилова, вели вицепремиерот и министер за транспорт Александар Николоски, кој ги отфрла тврдењата на опозицијата дека има политички договор со Софија, односно, дека заминувањето на Михаилова во Бугарија било однапред договорено,.

Според Николоски, опозицијата има координација со Бугарија и работи со одредени структури од оваа соседна држава.

– Тие мислат дека можат да си ја подобрат позицијата не на начин што ќе го подигнат својот рејтинг, туку на начин што ќе го спуштат рејтингот на ВМРО -ДПМНЕ и очигледно дека работат со одредени структури во Бугарија – изјави Николоски во гостување на Канал 5.

Случајот со Михаилова го гледа во контекст на претстојните претседателски избори во Бугарија.

– Овде се работи за след на околности, за луѓе кои се искористени и потоа фрлени. Самото тоа што нема соодветна реакција од таму зборува многу. Тоа е земја членка на ЕУ и на НАТО и има развиен систем на владење на правото и очекувам да ги почитува меѓународните стандарди во делот на владењето на правото и да ја испорача Михајлова – нагласи Николоски.

Тој, како и премиерот Христијан Мицкоски, вели дека кога-тогаш правдата ќе ги стигне и Михаилова и нејзиниот татко кој е осуден во случајот „Детонатор“.

– Така што не се работи за борци за човекови права или за луѓе кои имаат идеолошки проблеми со Македонија, туку очигледно за семејство кое што има сериозни законски проблеми со државата –  посочи Николоски.

Николоски додаде дека се надева дека во иднина нема да се повторуваат вакви случаи.

АПСОЛУТНА ЛАГА Е ДЕКА МИХАИЛОВА СО АДВОКАТОТ ЛЕГАЛНО ЈА ПРЕМИНАЛА ГРАНИЦАТА Mицкоски откри детали и упати силна порака за одговорност за бегството

The post НЕМА ПОЛИТИЧКИ ДОГОВОР СО БУГАРИЈА ЗА СЛУЧАЈОТ СО ИВА МИХАИЛОВА Опозицијата, а не власта, има координација со Софија appeared first on plusinfo.mk.

The post РЕЧИСИ 25.000 ЛУЃЕ СЕ ПРИЈАВИЛЕ ЗА ВАКЦИНАЦИЈА ПРОТИВ ГРИП Министерството ќе обезбеди доволно вакцини appeared first on plusinfo.mk.

Основното јавно обвинителство Тетово поведе истражна постапка против 20-годишник од селото Голема Речица, осомничен за повеќе кривични дела поврзани со компјутерски криминал, злоупотреба на лични податоци и недозволена експлицитна содржина со деца. За него е побаран притвор поради опасност од бегство и можност да продолжи со вршење кривични дела.

Станува збор за Е. А., кого Министерството за внатрешни работи го поврза со администрирањето на нелегалниот онлајн пазар OLVX. По акцијата, во која учествувало и американското Федерално истражно биро (ФБИ), американската агенција ѝ честиташе на македонската полиција за апсењето, наведувајќи дека платформата ја загрозувала дигиталната безбедност на илјадници американски граѓани.

Според Основното јавно обвинителство Тетово, повеќемесечните предистражни дејствија, координирани од јавен обвинител, обезбедиле докази што упатуваат на основано сомнение дека осомничениот сторил кривично дело Компјутерска измама од член 251-б од Кривичниот законик.

Обвинителството сомничи дека во периодот од 2025 до 2026 година, 20-годишникот администрирал нелегална онлајн група на апликацијата „Телеграм“, преку која нудел услуги и софтверски алатки за измами поврзани со незаконско враќање парични средства.

Тој е осомничен и за Злоупотреба на лични податоци по член 149 од Кривичниот законик. Според Обвинителството, делото било поврзано со администрирање домени и веб-страници на платформата OLVX, која функционирала како нелегален пазар за продажба на украдени дигитални податоци, софтверски алатки и услуги наменети за извршување кривични дела.

Корисници на платформата биле сајбер-криминалци кои купувале и продавале лични податоци и податоци за пристап до кориснички сметки. Во периодот на нејзиното функционирање биле понудени повеќе од 1.500 украдени пристапни податоци што им припаѓале на физички и правни лица.

Во рамките на истрагата, врз основа на судска наредба обезбедена по барање на јавниот обвинител, бил извршен претрес кај осомничениот. Притоа биле одземени два мобилни телефони.

При проверката на еден од телефоните, во скриена папка биле пронајдени вкупно 29 видеоснимки со експлицитна содржина на полови дејствија меѓу возрасни лица и деца, соопшти Обвинителството.

Поради тоа, на 20-годишникот му се става на товар и кривичното дело Производство и дистрибуција на детска порнографија од член 193-а од Кривичниот законик.

Јавниот обвинител до судијата на претходна постапка при Основниот суд во Тетово доставил предлог за определување мерка притвор. Како причини се наведени ризикот од бегство и опасноста осомничениот да продолжи да врши кривични дела.

Американското Федерално истражно биро ја поздрави акцијата на македонската полиција против администраторот на платформата OLVX.

„ФБИ им честита на нашите партнери од единицата за компјутерски криминал при Бирото за јавна безбедност на Северна Македонија, во рамките на Министерството за внатрешни работи, за успешното апсење на администраторот на криминалната платформа OLVX“, се наведува во објавата на американското биро.

Според ФБИ, платформата била активна од 2023 до 2025 година. Преку повеќе од 1.500 сметки, според наводите на агенцијата, незаконски се продавале лични податоци на жртви и податоци за најава на нивните кориснички сметки.

„Постоењето на оваа платформа директно ја загрозуваше дигиталната безбедност на илјадници американски граѓани кои се потпираат на сигурноста на сметките што ги користат“, соопшти ФБИ.

The post ОСОМНИЧЕН ЗА ЗЛОУПОТРЕБА НА ЛИЧНИ ПОДАТОЦИ И ЗА ЕКСПЛИЦИТНИ СОДРЖИНИ СО ДЕЦА Стаса и честитка од ФБИ за апсењето на сајбер измамникот од Мала Речица appeared first on plusinfo.mk.

Четириесет и тригодишен жител на скопското село Кондово е уапсен на граничниот премин Долно Блаце, при влез во Македонија. За него биле распишани две централни и меѓународни потерници, по наредби на Основниот кривичен суд Скопје.

Станува збор за Ф. Т. (43), кој бил баран за издржување две затворски казни од по осум години.

Според Министерството за внатрешни работи, едната потерница се однесувала на казна затвор од осум години за кривично дело „тешки дела против општата сигурност“, предвидено во член 288, став 3 од Кривичниот законик.

Втората потерница била распишана за издржување осумгодишна затворска казна за кривично дело „тероризам“, според член 313 од Кривичниот законик.

„Лицето ќе биде предадено на надлежната казнено-поправна установа“, соопштија од МВР.

The post УАПСЕН КОНДОВЕЦ БАРАН ЗА ТЕРОРИЗАМ На „Блаце“ го чекале две меѓународни потерници appeared first on plusinfo.mk.

Неврологот Иван Барбов вели дека се чувствува злоупотребен од страна на Ива Михаилова, која доаѓала кај него на лекување со посттраумтска повреда по сообраќајната несреќа.

Ива му рекла на лекарот дека живее во Бугарија и дека во Македонија дошла на викенд кога се случила сообраќајната несреќа.

– Логично беше да предложам да го продолжи лекувањето во Бугарија. Знаев дека има два пасоша и дека има бугарско осигурување. Сега кога ќе си го вратам филмот, можеби имало тука и одредена симулација од нејзина страна. Сега ја гледам се движи, ги нема тие симптоми што ги имаше тука, бидејќи тоа не беше хронична неизлечива болест туку последица на повреда. И тие обично се подобруваат – вели Барбов во изјава за Прва ТВ.

Тој вели дека Ива имала посттраумтска повреда и невропатија што се лекува и дека состојбата никогаш не можела да ѝ се влоши до толку за таа да остане со траен инвалидитет.

Лекарот вели дека Ива не била во тешка невролошка состојба ниту во витално загрозувачка состојба.

– Даваше изјава за некој бугарски портал и ги преувеличуваше симптомите. Од јули месец не се појави повеќе на преглед – додаде Барбов.

The post 🎥 НЕВРОЛОГОТ БАРБОВ СЕ ЧУВСТВУВА ЗЛОУПОТРЕБЕН ОД ИВА МИХАИЛОВА Ги преувеличувала симптомите кога давала изјави за бугарски медиуми appeared first on plusinfo.mk.