Во Основниот суд Куманово продолжи судскиот процес против Трајко Бојковски, обвинет за четири убиства и два обиди за убиство на жени. На последното рочиште сведочеа две од преживеаните жртви, додека новиот бранител на обвинетиот побара пред судот да бидат сослушани психијатрите и психолозите кои го изготвиле вештачењето за неговата психичка состојба.

На рочиштето повторно беше отворено и прашањето за однесувањето на Бојковски во судницата, кое привлече големо внимание во јавноста.

На претходното рочиште обвинетиот се смеел и гледал кон плафонот, што предизвика бројни реакции и шпекулации за неговата психичка состојба.

За ова однесување свое стручно мислење даде невропсихијатарот Мице Дудучки. Тој посочи дека ваквото однесување во психијатријата може да се опише како псевдодементно, односно однесување кое остава впечаток на нарушување на меморијата или когнитивните способности.

Дудучки го поврза однесувањето и со таканаречениот Ганзеров синдром, состојба при која лицето може да дава необични или очигледно неточни одговори и да остава впечаток дека не се сеќава на одредени настани.

Според него, во конкретниот случај ваквото однесување може да биде поврзано и со обид да се создаде впечаток дека обвинетиот не се сеќава на случувањата.

Сепак, невропсихијатарот нагласи дека самото постоење на одредена психопатологија не значи автоматски дека едно лице е непресметливо. Прашањето за пресметливоста, односно дали обвинетиот можел да ја разбере природата и значењето на своите постапки и да управува со своето однесување, се утврдува со соодветни стручни проценки и во рамките на судската постапка.

На последното рочиште во судницата сведочеа и две од преживеаните жртви, кои со тешкотии се потсетуваа на нападите што ги преживеале.

Росанка Трајковска, родена во 1939 година, од селото Челопек, сведочеше дека обвинетиот околу еден час ја тепал и ја допирал по телото.

– Кога слушна звук, престана. Веројатно се исплашил дека некој доаѓа и избега. Нека каже зошто ме тепаше и зошто се обиде да ме силува – рече Трајковска пред судот.

Слободка Арсовска, родена во 1943 година, исто така од Челопек, раскажа дека обвинетиот го затекнала во ходникот од нејзината куќа откако станала да оди во тоалет.

– Тој стоеше во ходникот. Двапати го прашав како влегол тука и кој го пуштил, но цело време молчеше. Кога го прашав по третпат, ме нападна и почна да ме дави. Во тој момент викнав: „Јоване, Јоване!“, по мојот син. Тој помисли дека син ми е тука, ме пушти и избега. Кога ме пушти, немав воздух да дишам. Сум паднала во бессознание, а потоа се сеќавам дека во утринските часови лежев на подот и во куќата немаше никој – сведочеше Арсовска.

На ова рочиште Бојковски имаше нов бранител по службена должност, адвокатот Тони Цветковски, откако претходниот адвокат го откажал полномошното.

Според информациите изнесени во текот на постапката, претходниот бранител го советувал обвинетиот да признае вина, но Бојковски не го прифатил тоа.

Новиот бранител побара пред судот да бидат сослушани сите тројца вештаци – психијатри и психолози кои учествувале во изготвувањето на вештиот наод и мислење за обвинетиот.

Цветковски рече дека предлогот го поднесол имајќи го предвид психолошкиот профил на обвинетиот, но и заклучокот на вештаците дека постои висок ризик од повторување на кривични дела.

– Обвинетиот сигурно ќе биде осуден, ќе биде донесена одлука со која ќе биде огласен за виновен и, според материјалните докази кои се наоѓаат во списите на предметот, најверојатно ќе биде осуден на казна затвор. Меѓутоа, тоа не значи дека во иднина нема да се однесува така како што предвидуваат вештите лица. Ги предложив за да се произнесат пред судот на кој начин би можела да се елиминира таа опасност – изјави Цветковски.

Според него, треба да се разгледа и можноста за изрекување мерка за безбедност предвидена во Кривичниот законик, доколку за тоа постојат законски услови.

– Станува збор за мерка за безбедност која е предвидена во Кривичниот законик, а со која може да се елиминира опасноста на која укажуваат вештите лица во својот наод и мислење – рече адвокатот.

Одбраната побара и обвинетиот да биде сослушан за сите околности наведени во обвинителниот акт.

Обвинителот Владимир Лапе, пак, се спротивставил на предлогот на одбраната од процесни причини, посочувајќи дека во предметот нема друго, алтернативно психијатриско вештачење кое би упатувало на поинакви околности.

Сепак, обвинителството нема ништо против вештите лица да бидат сослушани пред судот, доколку судот оцени дека тоа е потребно.

Лапе нагласи дека веќе изготвеното вештачење, кое е изведено како доказ во постапката, е јасно во однос на пресметливоста на обвинетиот.

– Вештачењето е многу јасно и концизно дека се работи за пресметлив сторител – изјави Лапе.

Тој посочи дека одбраната се повикала на член 63 од Кривичниот законик, кој, според неговото образложение, се однесува на ситуации на битно намалена пресметливост или непресметливост, поради што обвинителството го истакнало својот процесен приговор.

– Вештачењето не остава простор за сомнеж дека се работи за целосно пресметливо лице – рече Лапе.

Во однос на сведочењата на преживеаните жртви, обвинителот оцени дека немало суштински отстапувања од нивните претходни искази дадени пред обвинителството. Според него, имало само мали разлики во одредени детали, што го оценил како разбирливо со оглед на возраста на жените, кои имаат повеќе од 80 години.

Судењето против Бојковски треба да продолжи во септември. На следните рочишта пред судот треба да бидат сослушани тројцата вештаци, кои ќе треба дополнително да го појаснат својот наод и мислење, а предвидено е исказ да даде и самиот обвинет.

Бојковски се товари за четири убиства и два обиди за убиство на жени. Според обвинителниот акт, кривичните дела биле извршени од побуди и ниски страсти.

Во текот на постапката конечната оценка за неговата кривична одговорност, пресметливоста и сите други околности поврзани со делата за кои е обвинет ќе ја донесе судот.

The post СЕРИСКИОТ УБИЕЦ ОД СТАРО НАГОРИЧАНЕ „ГЛУМИ ЛУДИЛО“ Психијатар го анализираше однесувањето на Бојковски, сведочеа и две жртви appeared first on plusinfo.mk.

Жителите на Гостивар ќе бидат ослободени од плаќање на сметките за вода за август, одлучи денеска Советот на Општина Гостивар. Мерката е донесена како помош за граѓаните по едномесечната кризна состојба со водоснабдувањето и епидемијата што го зафати градот.

Иницијативата била покрената од Советот на Општина Гостивар, со цел да се ублажат последиците за граѓаните кои во изминатиот период се соочуваа со сериозни проблеми со водата за пиење.

На денешната седница било разговарано и за можноста граѓаните да бидат ослободени од плаќање на сметките за вода за повеќе месеци.

Претседавачот со Советот на Општина Гостивар, Ваљдет Џафери, посочил дека се разгледувала можноста ослободувањето да се однесува на два или три месеци, но дека ваквата мерка треба да биде реално спроведлива.

Од ЈП „Комуналец“, пак, сметаат дека ослободувањето за еден месец е соодветно, имајќи предвид дека вонредната состојба со водоснабдувањето траела околу еден месец.

Првиот човек на ЈП „Комуналец“, Алмир Даути, појаснил дека поради тоа ослободувањето од плаќање треба да се однесува на сметките за август.

На седницата било разговарано и за проблемите со редовното снабдување со вода за пиење во неколку населени места, меѓу кои Дебреше, Грудајца, Фазанерија и Циглана.

Од ЈП „Комуналец“ било најавено дека на првата наредна седница ќе бидат презентирани плановите и мерките за надминување на проблемите со водоснабдувањето во овие населби.

Одлуката за ослободување од плаќање на августовските сметки доаѓа по периодот во кој жителите на Гостивар се соочија со ограничувања и предупредувања во однос на употребата на водата за пиење, во услови на кризна состојба и појавата на зголемен број случаи со стомачни тегоби.

The post ГОСТИВАРЦИ НЕМА ДА ПЛАЌААТ ВОДА ЗА АВГУСТ Советот донесе одлука по едномесечната кризна состојба appeared first on plusinfo.mk.

Неколку дена сведочиме на паниката што СДСМ и Венко Филипче ја шират дури и за оваа идеја за изградба на дата центи или центри за податоци – рече на прес-конференција Миле Лефков, член на Извршниот комитет и пратеник на ВМРО-ДПМНЕ, наведува Центарот за комуникации на ВМРО-ДПМНЕ во соопштение.

– Прво, Филипче и неговото актуелно раководство во СДСМ треба да направат разлика помеѓу приватни дата центри и државен национален дата центар. Второ, Филипче е последен кој може да се грижи за интересите на граѓаните и нивниот квалитет на живот.

Државата има обврска од Реформската агенда или патот до ЕУ за изградба на национален дата центар. И како што информиравме Македонија има дата центар во Прилеп кој е секундарен, она што и треба е примарен каде што на едно место ќе се чуваат сите податоци од државните институции. Значи, цел на овој дата центар е безбедност на личните податоци на граѓаните како и безбедност на податоците од државните институции.

Дали Филипче и СДСМ, кои шират паника се против безбедност на лични и државни податоци? Дали СДСМ знае дека тоа е клучно за безбедност и стабилност на државата? Дали СДСМ знае дека безбедни лични информации на граѓаните е од голема важност за остварување на нивните права по различни основици како здравствени, социјални и слично?

Сајбер безбедноста или заштита од напади на системот на податоци е одлика на секоја современа држава. И додека ВМРО-ДПМНЕ се грижи за секој еден граѓанин и за државата, СДСМ бара начини за остварување на интереси на поединци – рече пратеникот Лефков на прес-конференцијата.

The post ШИРЕЈЌИ ПАНИКА ПРОТИВ ДАТА-ЦЕНТРИТЕ СДСМ ЈА ЗАГРОЗУВА САЈБЕР-БЕЗБЕДНОСТА Државата има преземено обврска кон граѓаните и кон ЕУ appeared first on plusinfo.mk.

Сите закони за кои е потребно Бадентерово мнозинство ќе бидат ставени на гласање, соопшти претседателот на Собранието Африм Гаши денеска на брифинг со новинарите и додаде дека не знае каков ќе биде исходот поради процедуралната блокада на опозициската ДУИ.

Закони за кои е потребен Бадентер односно што се од особен интерес се законот за правична застапеност, за високо образование, за локална самоуправа и други.

– Ова прашање има повеќе политичка димензија отколку процедурална. Во својство на претседател на Собранието се обидувам ги преземам сите мерки. Јас сум во контакт со сите пратенички групи. Се обидуваме да дојдеме до решение. Ако прашањето навлегува во политичката сфера тогаш на друго политичко ниво се разговара. Се согласувам дека ова прашање треба да се реши, но оставам на политичките актери да го решат – рече Гаши.

На денешната координативна средба присуствувал заменик-координаторот на пратеничката група на ДУИ, но немало никаква најава дека повторно ќе има блокада од страна на нивните пратеници.

– Тоа не е блокада, туку злоупотреба на Деловникот, но ќе видиме како ќе реагираат – рече Гаши.

Во однос на тоа дали доколку блокадата продолжи ќе има предвремени парламентарни избори, рече дека вакви избори ќе има кога 61 пратеник ќе одлучат за распуштање на Собранието, но нагласи дека тој е поборник на идејата за редовни парламентарни избори и нема да дозволи злоупотреба на Деловникот да предизвика парламентарни избори.

Гаши најави дека наскоро во Собранието ќе пристигне законско решение поврзано со барањата правосудниот испит да се полага и на албански јазик.

Во следните месеци пристапот во околината на Собранието ќе биде отежнат поради градежните работи поврзани со изградбата на паркингот за пратениците и за вработените.

The post ГАШИ ЈА ОБВИНИ ДУИ ЗА ЗЛОУПОТРЕБА НА ДЕЛОВНИКОТ ВО СОБРАНИЕТО Каков ќе биде исходот за законите за кои треба Бадентер? appeared first on plusinfo.mk.

Шест пратеници од Бугарија денеска го следат денешното рочиште во Основниот суд во Кочани  од судењето против 23-годишната Ива Михаилова од Кочани, која има двојно државјанство – македонско и бугарско. Таа е обвинета за кривичното дело Тешки дела против безбедноста на луѓето и имотот во сообраќајот, по сообраќајната несреќа од октомври лани, во која едно лице го загуби животот, а неколку други беа повредени, меѓу кои и самата Михаилова. Таа ја отфрла вината за несреќата и тврди дека не настанала по нејзина вина.

Случајот предизвика голем интерес на официјална Софија, откако на Михаилова ѝ беше одбиено барањето да ѝ бидат вратени лични документи одземени со мерките на претпазливост, за да може да се лекува надвор од Македонија, конкретно во Бугарија, бидејќи, наводно, такви интервенции не се вршеле во земјата. Основниот суд во Кочани во почетокот на август го одби нејзиното барање, затоа што во него нема конзилијарно мислење од лекари на ЈЗУ Клинички центар Скопје, ниту од комисија во ФЗОМ дека такво лекување не може да се реализира во здравствните установи во Македонија.

По ваквата одлука реагираше бугарското МНР, од каде побараа Михаилова да добие пристап до навремена и соодветна медицинска грижа, со цел да се избегне реалната опасност од трајни попречености, а потсетија и на „постојаните негативни констатации на ЕК за состојбата на судскиот систем во Македонија“.

Апелацискиот суд во Штип на 20 август ја потврди одлуката на кочанскиот суд дека Михаилова може да се лекува во Македонија, по што од ГЕРБ на Бојко Борисов најавија дека нивните пратеници Георг Георгиев, кој е поранешен министер за надворешни работи и Красимир Терзиев ќе присуствуваат на судското рочиште.

„Присуството на Георгиев и Терзиев е израз на фактот дека ГЕРБ внимателно го следи развојот на случајот околу Ива Михаилова и категорично стои зад нејзиното право на фер судење, како и да ѝ се даде можност да го продолжи потребното лекување во Бугарија“, наведе ГЕРБ.

Владејачката Прогресивна Бугарија (ПБ) објави дека тројца нивни пратеници, Иван Голомеев, Бојко Младенов и Борислав Георгиев, „внимателно ќе го следат текот на судското рочиште и ќе ја информираат бугарската јавност за развојот на случајот“.

Присуство најави и пратеничката од парламентарната група на „Демократска Бугарија“, Елисавета Белобрадова, која е заменик-претседател на Комисијата за политика за Бугарите во странство.

На претходното рочиште во Кочани присуствуваа двајца пратеници од бугарската десничарска партија „Преродба“ и покрај тоа што од лани имале забрана за влез во Македонија.

Бугарската „Фондација Македонија“ попладнево организираше „граѓански протест пред амбасадата Северна Македонија во Софија за поддршка на Бугарката од Кочани, Ива Михаилова“.

Ива Михаилова во изминатиот период доби голема институционална подршка од официјална Софија. Бугарското МНР двапати се огласи со соопштение, а премиерот Румен Радев им се заблагодари на бугарските европратеници кои ги информирале европските институции и јавноста за тој случај. Пред десетина дена бугарската претседателка Илијана Јотова најави дека во средината на септември ќе има средба со генералниот секретар на Советот на Европа во Стразбур и едно од прашањата кои ќе ги постави е токму за случајот на Михаилова. Претходно, на 4 август, собраниската Комисијата за политика за Бугарите во странство ја сослуша мајката на Ива, Христина Михаилова, во Народното собрание.

The post СОФИЈА ГО ДРАМАТИЗИРА СЛУЧАЈОТ СО СООБРАЌАЈКАТА И ЛЕКУВАЊЕТО НА ОБВИНЕТАТА ИВА МИХАИЛОВА ОД КОЧАНИ Шест бугарски пратеници дојдоа на судењето appeared first on plusinfo.mk.

Во неделата вечерта околу 20:00 часот во СВР Скопје било пријавено дека на општинскиот пат од село Огњанци кон Петровец, патничко возило „рено“ со скопски регистарски ознаки, управувано од 52-годишниот Б.П. од Скопје, удрило во пешакот М.Т.(28) од село Р’жаничино.

Како што се наведува во полицискиот билтен, во несреќата со тешки телесни повреди се здобил пешакот, констатирани во Јавна здравствена установа „Свети Наум Охридски“ во Скопје.

The post ПРЕГАЗЕН ПЕШАК НА ПАТОТ ОГЊАНЦИ-ПЕТРОВЕЦ Со тешки повреди е префрлен в болница appeared first on plusinfo.mk.

Две лица на мопед во движење пукале кон автомобил на локален пат во Кумановско. Во инцидентот нема повредени, а полицијата трага по сторителите.

Пукањето било пријавено во СВР Куманово рано утрово, околу 2.45 часот. Според пријавата, инцидентот се случил 5 минути претходно.

Мопедот се движел на локалниот пат од населбата Карпош кон селото Никуљане во општина Старо Нагоричане.

„Од мопед во движење, на кој се превезувале две лица, биле испукани неколку куршуми од огнено оружје кон патничко возило ‘ауди’ со кумановски регистарски ознаки“, соопшти МВР.

Автомобилот го управувал 34-годишниот Д.Д. од Куманово. Повредени лица нема.

The post ПУКАЛЕ ОД МОПЕД ВО ДВИЖЕЊЕ КОН „АУДИ“ КАЈ КУМАНОВО Полицијата трага по сторителите appeared first on plusinfo.mk.

Новата учебна 2026-2027 година започнува утре и наставата за сите ученици ќе трае до 10 јуни, освен за матурантите кои завршуваат на 17 мај. Оптимизирана е училишната мрежа и во голем број училишта условите се значително подобрени. Обезбедени се учебници за сите, а за учениците со посебни образовни потреби, ангажирани се најмногу образовни асистенти досега.

Подобрени услови во училиштата

За ова денес на прес конференција, информираше министерката за образование и наука, проф. д-р Весна Јаневска, која им посака успех на сите ученици, наставници и стручни соработници.

– Трета година по ред, учебниците се навремено набавени во тираж кој го побараа училиштата. Истите се испорачани и уште утре можат да им бидат поделени на учениците. Задоволство ми е што прашањето за учебници повеќе не е предизвик како во минатото. Годинава, набавени се 622 илјади учебници и остварени се заштеди од 50 милиони денари споредбено со годината пред да го преземам раководењето со оваа институција – рече Јаневска.

Целосно нови учебници во полн тираж

Информираше дека целосно нови учебници во полн тираж се набавени за прво, втор и трето одделение, со оглед дека тоа се учебници во кои има и работни листови, како и за осмо одделение и за втор клас во гимназиско образование, каде ќе се учи по нови наставни програми.

Во 620 училишни објекти од вкупно 1023 во основното и средното образование ќе има едносменска настава. Јаневска рече дека тоа е концепт за кој се залага Владата, затоа што обезбедува повеќе придобивки, а најважни се интересите на децата – поголема концентрација на часовите, поголема социјализација, задржување на училиште доволно за да се совлада целиот материјал и да се стекнат соодветни вештини.

Едносменска настава, секаде каде е можно

– Ги поддржуваме општините да воведуваат едносменска настава во што повеќе училишта и во таа насока градиме објекти и доградуваме училници. Во моментов министерството и Владата ги прошируваат капацитетите на 14 училишта во Центар, Карпош, Аеродром, Ѓорче, Бутел, Илинден, Гази Баба и Градско, а уште 15 проекти ќе започнеме етапно во следните неколку месеци – рече министерката.

Додаде дека завршени се реконструктивни активности во 20тина училишни објекти и спортски сали. Се градат и четири нови сали кои многу скоро ќе бидат пуштени во употреба, а потсети и дека преку програмата на Владата за финансирање на капитални проекти во општините, во тек е реализација на 50тина инвестиции за изградби и реконструкции на училишта, за нови спортски сали и училишни базени.

Ангажирани 1.524 образовни асистенти

– За да им се олесни процесот на образование на учениците со посебни образовни потреби, ангажираме 1.358 образовни асистенти во основното и 166 во средното образование. За учениците кои се на подолго болничко или домашно лекување, ќе потсетам дека е достапна можноста која законски ја уредивме минатата година – да се вклучат онлајн во наставата во класот или пак, наставникот индивидуално да работи со нив – нагласи Јаневска.

Во март повисоки плати за наставниците

Наставниците и сите други вработени во училиштата, во март 2027 ќе добијат ново покачување на платите помеѓу 7,5 и 10% во зависност од стапката на инфлација. Како што рече министерката, покачувањето е согласно договорот со СОНК од пред две години, а преку кој досега платите пораснаа за над 20%, додека околу 300 наставници и стручни соработници напредуваа во звања ментор и советник, што исто така подразбира зголемен личен приход. Јаневска им се заблагодари за посветеноста кон учениците и рече дека очекува партнерскиот однос да продолжи за да се создаваат сé подобри и подобри генерации.

Намален број ученици, затворени 26 училишта

Министерката укажа дека трендот на намалување на бројот на ученици продолжува. Според пристигнатите податоци во МОН, учебната година ќе ја почнат 238 илјади ученици, од кои 174 илјади основци и 64 илјади средношколци. За прв пат во училишните клупи ќе седнат 14.952 првачиња.

Поради тоа што немаат запишано ученици, од септември времено се затворат 26 подрачни училишта. Вкупната бројка на празни училишни објекти во Македонија, претежно во руралните средини е 148. Негативниот тренд, поттикнува и реорганизација на училишната мрежа и работата на училиштата.

Укинати 433 паралелки, некои и со по 2 ученици

– Процес за кој се заложивме во изминатите неколку месеци е оптимизација на паралелките во постојните училишта, што значи спојување на помалите паралелки една со друга или приклучување кон поголемите, а во интерес на учениците – да бидат во поголемо друштво, да можат подобро да се социјализираат и да се натпреваруваат. Не е тајна дека со години опстојуваа, на пример 2 паралелки со по 2 ученика на иста возраст и во исто училиште. Сега таквите ги обединивме и затоа во образовниот систем ќе имаме 433 паралелки помалку годинава – 222 во основното образование и 211 во средното – објасни министерката.

Јаневска додаде дека иако одредени политички субјекти се обидоа тоа да го претстават како страшен потег и крах на образованието, всушност е позитивна промена во интерес на учениците. Притоа, како што рече – ниту еден редовно вработен наставник не е отпуштен од работа.

Поевтин училишен прибор, дотации за талентирани ученици

Во новата учебна година продолжува грижата за талентираните ученици, која во минатото недостасуваше – министерството ќе ги покрива целосно трошоците за пат и учество на меѓународни научни олимпијади.

Во септември семејствата на учениците ќе можат да купуваат училишен прибор со намалена малопродажна цена за најмалку 15%, за што е донесена одлука од страна на Владата. Во октомври ќе бидат објавени конкурсите за ученички стипендии.

The post УТРЕ ПОЧНУВА УЧЕБНАТА ГОДИНА ЗА 238.000 МАКЕДОНСКИ УЧЕНИЦИ Од нив 174.000 се основци, 64.000 средношколци, а 14.952 првачиња appeared first on plusinfo.mk.

Пожарот под Пелистер е ставен под целосна контрола по жестоката битка со огнот во текот на ноќта, соопшти Стојанче Ангелов, првиот човек на Дирекцијата за заштита и спасување. Новото опасно жариште е кај селото Градец во општина Врапчиште, каде што гори борова шума.

Од 23 пожари на отворено регистрирани вчера, седум утрово сè уште се активни, информира Ангелов.

Најтешката битка изминатите два дена се водела во подножјето на Пелистер. Пожарот почнал од преспанската страна, а огнот вчера ја преминал противпожарната пресека.

– Во текот на вчерашниот ден, во текот на ноќта, во текот на утрово водевме жестока битка со пламените јазици и можам да кажам дека утрово овој пожар беше ставен по целосна контрола – изјави Ангелов.

Екипите успеале да ја запрат огнената линија што вчера попладне излегла над противпожарната пресека. На терен се пожарникари од Ресен со силна поддршка од нивните колеги од Битола.

Ангажирани се и тимови на Дирекцијата за заштита и спасување со пет „пинцгауери“. Во текот на ноќта на терен дејствувале и доброволни пожарникари.

Во гаснењето утрово се вклучил и армиски хеликоптер со ведро од три тони. По него треба да дејствуваат два „ертрактори“ на Дирекцијата, а по потреба и полициски хеликоптер.

– Со еден збор концентрирани се големи сили за ставањето под контрола на овој голем пожар, но се работи за еден од најтешките шумски пожари оваа сезона – изјави Ангелов.

Главната цел е огнот да не навлезе во квалитетната шума на Националниот парк Пелистер.

Второто тешко жариште се отвори синоќа кај селото Градец во општина Врапчиште, информира Ангелов. Пожарот зафати борова шума на тешкопристапен терен.

Полициски хеликоптер почна да дејствува рано утрово. Близината на мало езеро му овозможува да полни вода и да прави нов налет на секои пет до шест минути.

– Хеликоптерот помага за значително намалување на кракот којшто се движи кон селото – вели Ангелов.

Тој вели дека на терен се и гостиварските пожарникари. Доколку биде потребно, ќе бидат испратени дополнителни сили.

Активни се уште неколку пожари на поголеми површини. Според Ангелов, тие во моментов не се алармантни и не загрозуваат населени места.

Опасноста од нови пожари, сепак, останува многу висока низ целата држава. Дождот во источните делови само краткотрајно ја намалил сувоста на вегетацијата, смета првиот човек на ДЗС.

– Целата држава е високоризична од појава на пожар и притоа пожарите лесно може да се шират, особено ако на зафатените подрачја дува ветер – предупреди Ангелов.

The post ПО ЦЕЛОНОЌНА БИТКА, ПОЖАРОТ ПОД ПЕЛИСТЕР Е ПОД КОНТРОЛА Ново опасно жариште кај Градец, гори борова шума appeared first on plusinfo.mk.

Заедно за иднина, приклучи се – со оваа порака ВМРО-ДПМНЕ од 1 септември започнува голема кампања за ажурирање на постојното членство и за отворање на партијата за нови членови, најави пратеникот и генерален секретар на ВМРО-ДПММЕ, Драган Ковачки.

– Во следниве три месеци, до 30 ноември, сакаме да направиме уште еден голем чекор во развојот на ВМРО-ДПМНЕ, да изградиме посовремена, поорганизирана и уште посилна политичка организација, подготвена за иднината. ВМРО-ДПМНЕ има повеќедецениска историја, силна организација и огромно членство. Нашата сила се луѓето. Луѓето кои со децении се дел од ВМРО-ДПМНЕ. Луѓето кои верувале кога било тешко, кои работеле, се бореле и придонесувале. Но, и новите генерации кои денес имаат знаење, идеи, енергија и желба да бидат дел од создавањето на иднината на Македонија – рече Ковачки.

Затоа нашата порака е едноставна, додаде тој, обнови го членството, биди активен и биди дел од иднината.

– Од 1 септември до 30 ноември секој постоечки член ќе може да ги потврди или ажурира своите податоци. Истовремено, ги отвораме вратите на ВМРО-ДПМНЕ за секој граѓанин кој ја прифаќа нашата програма и сака да ни се приклучи. Без препорака. Без некој да мора да ве воведе. Ако имаш идеја – има место за тебе. Ако имаш знаење – има место за тебе. Ако имаш енергија и сакаш да придонесеш – има место за тебе. Твоето место е со нас. ВМРО-ДПМНЕ е отворено за нови знаења, нови вештини и нова енергија. Сакаме да го зачуваме тоа што сме го изградиле и сакаме да го надградиме – рече Ковачки.

И затоа правиме уште еден важен исчекор, додаде тој.

– За првпат во Македонија една политичка партија воведува целосно дигитален процес на зачленување и ажурирање на членството. Нашата партиска ИТ комисија изработи веб-апликација која веќе е ставена во функција во општинските комитети, а мобилната верзија е доставена до Google и до Apple и после нејзиното одобрување ќе биде достапна и на мобилните телефони, за што доплонително ќе ја известиме јавноста. Тоа значи пријавата, верификацијата, прифаќањето на Статутот и потврдата за членството ќе можат да се завршат дигитално, од телефон, за само неколку минути – рече тој.

Тоа е ВМРО-ДПМНЕ кое се менува со времето, кое ги користи новите технологии и кое гради модерна организација за новите генерации, додаде Ковачки.

– Но, никого не оставаме зад себе. Дигитализацијата е дополнителна можност, а не замена за досегашниот начин. Секој што сака лично да го ажурира своето членство или да се зачлени ќе може тоа да го направи во општинските комитети. Од 1 септември до 30 ноември, секој ден од 17 до 20 часот, нашите општински комитети ќе бидат отворени за членовите и за сите граѓани кои сакаат да ни се приклучат – информира Ковачки.

Личните податоци, како и досега, ќе се обработуваат согласно Законот за заштита на личните податоци, појасни Ковачки.

– Во ВМРО-ДПМНЕ ги поврзуваме искуството и традицијата со новата енергија. Ги обединуваме луѓето кои со децении се дел од ВМРО-ДПМНЕ со оние кои денес за првпат сакаат активно да придонесат. Затоа ги повикувам нашите членови: ажурирајте го своето членство. А до сите оние кои досега не биле дел од ВМРО-ДПМНЕ, а веруваат дека можат да придонесат за посилна и поуспешна Македонија, нашата порака е: Твоето место е со нас. Заедно сме посилни. Заедно одиме напред. Заедно за иднина – Приклучи се! За ВМРО-ДПМНЕ. За Македонија – повика генералниот секретар Драган Ковачки.

The post СО ЕДЕН КЛИК ДО ЧЛЕНСТВО ВО ВМРО-ДПМНЕ Партијата воведува дигитално зачленување и повикува нови членови appeared first on plusinfo.mk.