АРСОВСКА СЕ КИТИ СО ТУЃИ ПЕРЈА Градоначалникот на Гази Баба разочаран што не бил поканет на Перо Наков

Градоначалникот на oпштина Гази Баба Бобан Стефковски не присуствуваше на денешната прес-конференција на градоначалничката Данела Арсовска која ја најави реконструкцијата на улица Перо Наков.

Првиот човек на Гази Баба изјави дека не бил повикан од градоначалничката да присуствува на овој настан, а ова е и прв пат Арсовска да oдржи прес-конференција во некоја општина во која градоначалникот е од редовите ВМРО-ДПМНЕ, а тој да не присуствува на настанот.

– Од првиот ден на мојот мандат давав шанса за соработка со градоначалничката Арсовска и бев многу трпелив. Жалам што по една цела година морам да констатирам дека шансата од страна на Арсовска не беше искористена – ни рече Стефковски.

Тој очекува ветувањата што ги презела како обврска за време на изборите да ги реализира без исклучок бидејќи граѓаните поради тоа им ја дале довербата за да го реализираат она што го ветиле.

– Денес видов од медиумите дека Арсовска била во Гази Баба со цел отпочнување на реконструкција на улица Перо Наков, настан на кој не бев поканет иако општината има учество во реализација на проектот преку склучен договор за меѓуопштинска соработка, како и преку одобрување на проектот со потврда за заврека – објаснува Стефковски.

На денешната прес-конференција Арсовска беше прашана од новинарите зошто градоначалникот на Гази Баба, Стефковски не е дел од прес-конференцијата, но таа не даде одговор.

Откако Арсовска не го покани Стефковски на денешниот настан од ВМРО-ДПМНЕ соопштија дека нивните градоначалници веќе нема да присуствуваат на ниту еден настан на градоначалничката.

– Поради немањето соодветна и нормална комуникација што треба еден градоначалник на Град Скопје да ја има за доброто на градот, како и поради неисполнувањето на обврските од ветеното од програмата „За модерно Скопје“, поради кој и беше дадена довербата на градоначалничката Арсовска, но и нејзината силна инволвираност во сомнителни и криминогени зделки ВМРО-ДПМНЕ во целост се оградува од однесувањето на Арсовска и градоначалниците на ВМРО-ДПМНЕ нема да присуствуваат на ниту еден настан на градоначалничката Арсовска – соопштија од партијата.

Како што е веќе познато, кавгата меѓу Арсовска и ВМРО-ДПМНЕ почна откако таа го смени директорот на „Водовод и канализација“, Златко Перински, а оставка даде и секретарот на Градот, Ѓоко Велковски, кои се членови на ВМРО-ДПМНЕ.

Таа изрази сомнеж за местење во тендерот за пречистителна станица на Вардар, а лидерот на ВМРО-ДПМНЕ Христијан Мицкоски го нарече „шпицен“ градоначалник кога го интересирале само тендери.