📽️ АПОКАЛИПСА ВО АНДАЛУЗИЈА, ЛУЃЕ ЖИВИ ГОРЕА ВО ВОЗИЛА Најмалку 12 мртви во страшниот пожар во Шпанија

Најмалку 12 лица загинаа во големиот шумски пожар што ја зафати шпанската област Андалузија, а локалните власти го опишаа како „најразорниот пожар досега“ што го погодил регионот.

Според информациите на регионалната влада на Андалузија, бројот на жртви пораснал откако рано утринава била потврдена смртта на уште шест лица во пожарот што избувнал во општината Лос Гаљардос, во провинцијата Алмерија.

Властите соопштија дека околу 1.000 луѓе биле евакуирани превентивно поради брзото ширење на огнот и опасноста за населените места.

Особено потресни се информациите дека дел од жртвите биле пронајдени во возила зафатени од пламенот во едно населено место во соседната општина Бедар. Според службите за итни случаи, луѓето најверојатно се обидувале да избегаат од пожарот, но огнената стихија ги стигнала.

Владините извори предупредуваат дека бројот на жртви сè уште не е конечен, бидејќи спасувачките екипи продолжуваат со пребарување на погодените подрачја.

Според сведоштва доставени до службите за итни случаи, пожарот најверојатно започнал откако далновод паднал во близина на автопатот Н-340, по што огнот брзо се проширил низ околната шумска област.

Во гаснењето учествуваат околу 150 пожарникари и четири противпожарни возила, заедно со специјализирани единици за шумски пожари, медицински тимови и регионални служби за итни ситуации.

Министерот за претседателство, здравство и итни ситуации на Андалузија, Антонио Санс, изјави дека станува збор за „најразорниот пожар досега“ во регионот и ја опиша состојбата како „невидена трагедија“.

Претседателот на регионалната влада на Андалузија, Хуан Мануел Морено, преку социјалните мрежи порача дека е „скршен од срце и уништен“ од трагичните вести.

Шпанскиот премиер Педро Санчез изрази длабока потресеност поради последиците од пожарот и упати сочувство до семејствата на загинатите.