Американската Агенција за примена на храна и лекови ги одобри брзите тестови со антитела за откривање на коронавирусот
Тестовите што ги одобри во четвртокот FDA се со исти карактеристики како и брзите тестови што сега се користат во Македонија, во клиничката болница „Аџибадем Систина“.
Американската Агенција за примена на храна и лекови (FDA – Food and Drug Administration), во четвртокот го одобри новиот тест со антитела за откривање на коронавирусот, прв таков за употреба во САД, јави „Њујорк Тајмс“.
Во моментов достапните тестови се дизајнирани врз база на брис од нос и од грло да откријат фрагменти од гени на вирусот кои укажуваат на инфекција. За разлика од нив, новиот тест бара заштитни антитела во примерок од крвта земен од прст. Тоа им кажува на лекарите дали пациентот бил изложен на вирусот и дали можеби има стекнато некаков имунитет.
Тоа е важно од повеќе причини, објаснува „Њујорк Тајмс“. Луѓето со имунитет можат безбедно да излеазат од своите домови и да се вклучат во работната сила. Посебно е важно лекарите и сестрите да знаат дали имаат такви антитела.
Исто така, тестирањето на антитела може да им даде на научниците подобро сознание колку е раширена заразата во популацијата и да им помогне на истражувачите попрецизно да ја калкулираат стапката на смртноста.
– Ако не ги знаеме асимптоматските или лесните случаи, ние нема да знаеме дали вирусот убива значителен ден од луѓето што го носат, или само луѓе во одредени услови, или едноставно такви коишто немаат среќа – вели д-р Карл Бергстром, експерт за заразни болести од Универзитетот Вашингтон во Сиетл.
Новите тестови, произведени од Cellex, откриваат два вида антитела: имуноглобулин М, создаден од телото неколку дена по инфекцијата (ИгМ) и именоглобулин Г, создаден подоцна за да го неутрализира нападот на вирусот (ИгГ), објаснува „Њујорк Тајмс“.
Резултатите од тестовите се добиваат за околу 15 минути. Но, да се има во телото такви антитела не гарантира имунитет од коронавирусот, прецизира медиумот.
Како што е познато, истоветни се и карактеристиките на брзите тестови произведени во Холандија, со кои кај нас врши тестирање клиничката болница „Аџибадем Систина“. Агенцијата за примена на храна и лекови е апсолутен авторитет во САД за одобрување на лекови и медицински протоколи.