АЛТЕРНАТИВА НА ГАШИ ОДИ ВО ОПОЗИЦИЈА За уставните измени ќе биде „за“

Алтернатива излегува од владината коалиција и ќе делува како опозиција, изјави претседателот на партијата Африм Гаши по  состанокот на Централно собрание во партиското седиште во Тетово. Тројцата пратеници на оваа партија ќе бидат опозициски.

-Донесовме конечна одлука. Одлучивме дека Алтернатива со сите функционери ќе биде опозициска партија – рече Гаши.

На новинарско прашање тој најави дека ќе гласат за уставните измени.

Гаши сепак не ја криеше разочараноста од СДСМ за одлуката да им земат ресори кои им ги даваат на Алијанса за Албанците.

„Во однос на програмските определби, нема дилема дали Алтернатива ќе поддржи или не. Но сметам дека СДСМ направи непромислен и ризичен потег за европските интеграции. Иднината ќе биде сведок дали сме биле во право или не. Да, ќе гласаме за уставни измени, за тоа нема дилема” – посочи Гаши.

Гаши објасни дека од ваквите потези ќе произлезе и „дебаланс и во меѓуетничките односи”.

– Се креира перцепција дека СДСМ е заложник на Албанците. Тоа ќе предизвика меѓунационални недобри односи меѓу етникумите. А така некои политички партии кои се радикални, преку меѓуетничките односи ќе бидат посилни во Собранието. Најважно за нас е што партиите можат ова да го злоупотребат и да го стопираат европскиот процес. Ние работевме на релаксација на етничките односи. Вака ќе предизвикаме тензии меѓу Македонците и Албанците” – рече Гаши.

Алтернатива излезе од Владата поради прекршување на договорот од страна на СДСМ