Ако македонските опозициски лидери соработуваат меѓу себе, победата на 8 мај ќе биде историска!

Ова е вистински момент политичките партии од  македонскиот блок да се обединат во намерата да ја соборат владата на СДСМ и на ДУИ и да создадат моќно парламентарно мнозинство, коешто ќе биде гаранција дека утре нема да подлегнат на уцени, притисоци и трикови за одржување на постоечката гарнитура на власт.

Народот на 24 април јасно и недвосмислено се изјасни за промени и СДСМ неповратно го изгуби легитимитетот да ја води Македонија во следните четири години. ВМРО-ДПМНЕ и другите македонски опозициски партии ќе извојуваат сигурна победа на парламентарните избори на 8 мај. Но, постои реална опасност ефектите од таа победа да бидат намалени со постизборен инженеринг, чија единствена цел би била да се предизвика политичка криза после изборите.

Затоа, соработка меѓу партиите од македонскиот блок, освен што е реално возможна, е и суштински важна за иднината на Македонија. Доколку се остварат реалните проекции за очекуваните резултати од трката на 8 мај, веројатно нема да има сила којашто ќе може да го спречи победникот да ја формира новата македонска влада. Но, постојат исто толку реални сценарија за предизвикување нестабилност на таа влада.

Затоа, актуелните опозициски лидери од македонскиот блок треба уште сега, пред изборите на 8 мај, да демонстрираат одговорно лидерство и меѓу себе да преговараат искрено, со добра волја и со спремност со нужни компромиси да постигнат минимална платформа за соработка.

Што значи тоа конкретно?

ВМРО-ДПМНЕ, Левица, ЗНАМ и другите македонски партии треба да договорат единствени или блиски ставови за најважните политички прашања, при што однапред треба да биде јасно дека ниту е можно и ниту е потребно тие да се договорат буквално за сè. Напротив. Секоја од овие партии има различна идеолошка платформа и политичка програма и секоја од нив бездруго мора да го сочува својот идентитет и интегритет.

Втората важна работа што мора да се демонстрира во оваа меѓусебна размена на пораки за соработка и за обединување е дека македонските партии немаат намера да создадат антиалбански политички блок. Поканата до албанската коалиција Вреди да учествува во идната македонска влада е веќе упатена и таа е добра основа за создавање стабилна извршна власт по победата на 8 мај. Коалицијата Вреди многу сериозно размислува за коалиција со победникот и тоа е шанса што не смее да се пропушти.

Конечно, македонските опозициски партии коишто навистина сакаат – поединечно, но и заеднички! – да ги поразат СДСМ и ДУИ на 8 мај, треба јасно и гласно да ги повикаат своите симпатизери да гласаат за претседателската кандидатка Гордана Силјановска Давкова. Гласот за Гордана е една од клучните точки на обединување на севкупната политичка волја за промени. Без тоа, пораките за соработка и за обединување ќе останат само празна реторика.

Во секој случај, време е тесноградоста и суетите да се тргнат настрана. А кога го велам ова, првенствено се обраќам до Христијан Мицкоски, лидерот на партијата која ќе биде победник на изборите на 8 мај.

Христијан, прерогатив на победниците е да покажат широкоградост и одговорност, повеќе од другите. Победата на ВМРО-ДПМНЕ и на Гордана Силјановска Давкова на 8 мај секако ќе биде голема, но вистински триумф ќе биде ако ти изградиш мост на соработка со другите опозициски партии, зa и тие да бидат носители на промените, рамо до рамо со тебе. Со едностраниот прекин на непријателствата со ЗНАМ и со Левица, можеби малку задоцнет но сепак во краен час, ти покажа дека имаш капацитет за такви потези. Потруди се да го потврдиш тоа!

Упатувам порака и до лидерите на ЗНАМ и на Левица, со надеж дека таа порака ги одразува чувствата на огромното мнозинство граѓани коишто на 24 април гласаа за промена на власта.

Максо и Димитар, вие поведете ја иницијатива за соработка на македонските партии пред изборите на 8 мај. Нека не ве лаже умот дека било која од вашите две партии, кои сега треба да го потврдат својот подем, ќе ќари нешто доколку ја поткопа позицијата на ВМРО-ДПМНЕ, или ако заигра во полза на интересите на опцијата која евидентно ги губи овие избори.

Исходот на 24 април многу јасно ви покажа како се факторизираат партиите – победуваат тие што се за промени, губат тие што се за конзервирање на оваа власт, што веќе ја изгуби довербата од народот.

Бидете победници, Максо и Димитар!

Покажете и вие одговорно лидерство и широкоградост. Не инсистирајте на максималистички позиции, на потпишување некакви документи и на друг вид непринципиелни притисоци врз ВМРО-ДПМНЕ. Така со години работи четата на Али Ахмети и успева, ама само затоа што за сојузник ги имаат безрбетниците од СДСМ.

Немојте и вие така. Не со ВМРО-ДПМНЕ. Не колете вол за шницла. Наместо тоа, покажете добра волја и бидете креативни, отворени и спремни за соработка – таа значително ќе ги подобри и шансите на вашите партии за многу поголем успех на 8 мај.

Конечно, сите вие тројцата – Христијан, Максо и Димитар – треба да бидете свесни дека македонските избирачи, во пресрет на 8 мај, од вас очекуваат еден таков голем гест, веројатно најголем во досегашната историја на независна Македонија. И затоа, немојте да ги разочарате!