АХМЕТИ СЕ СОМНЕВА ВО ДНЕВНИОТ РЕД НА ЛИДЕРСКАТА СРЕДБА Во ДУИ се убедени дека Мицкоски и Филипче ќе кројат планови против Албанците
Го повикуваме целиот политички и неполитички спектар на Албанците во државава, вклучително и лидерите на коалицијата Вреди, заедно или секој посебно, да изразат јасен и гласен револт против овој обид за реструктуирање на државата и да не дозволат да бидат вовлечени во планот за целосна дисквалификација на Албанците од општествените текови, се вели во соопштението на ДУИ.
На јавна сцена денеска ќе ни биде демонстрирана моноетничката коалиција чија основна цел е да го преобликува политичкиот модел на државата од мултиетничка, во моноетничка демократија, реагираше ДУИ преку соопштение по најавената средба на премиерот Христијан Мицкоски со лидерот на опозициската СДСМ Венко Филипче во 14 часот.
„Иако на јавноста ќе ѝ бидат презентирани поинакви точки, дозволете да ви го презентираме дневниот ред на денешната средба кој нема да го видите во јавноста:
Точка 1: Неказнивоста. Како да не одговараат. Каков правосуден систем им треба за да можат да продолжат да се напаѓаат во јавноста, но суштински меѓусебно да се заштитат дури и кога во прашање ќе дојдат трагедии како онаа во Кочани.
Точка 2: Како да се отстранат Албанците од сите нивоа на власт во државата, и потоа да се држат на периферијата на општествените текови.
Овој план не е нов, туку е скорен пред три години преку ноторниот договор Мицкоски-Заев пред сѐ како заштитен чадор за транзициската олигархија во земјава“, реагираше партијата на Али Ахмети.
Оттаму велат дека планот веќе се реализира преку укинувањето на Балансерот, моноетничкото одлучување на Уставниот суд, но и со отстранувањето на Албанците од голем број високи позиции во државната управа.
„Треба да се напомене дека реализацијата на овој план е невозможна без да се пронајдат ‘чесните Албанци’ кои треба да обезбедат лажна легитимација за мултиетнички консензус на ова политичко преструктуирање. Го повикуваме целиот политички и неполитички спектар на Албанците во државава, вклучително и лидерите на коалицијата Вреди, заедно или секој посебно, да изразат јасен и гласен револт против овој обид за реструктуирање на државата и да не дозволат да бидат вовлечени во планот за целосна дисквалификација на Албанците од општествените текови“, се вели во соопштението на ДУИ.