АХМЕТИ НЕ СЕ ПОВЛЕКУВА, ЗАТОА ШТО НЕ ИЗГУБИЛ НИЕДНИ ИЗБОРИ ДОСЕГА Демократската унија за интеграција бара предвремени парламентарни избори

Изборниот процес помина генерално добро, коалицијата НАИ, која ја предводи ДУИ, освои 114.076 гласови и со тоа 159 советници, а коалицијата Вреди освои 91.000 со 122 советници, рече претседателот на Демократската унија за интеграција, Али Ахмети на прес-конференција по седницата на Централното претседателство на партијата.

– Во овој процес, како и тие што ги оставивме зад нас како парламентални и претседателски избори, имаме синдром на Газиместан, поразените излегуваат победници. Вреди и на претходните 2 изборни циклуси, парламентарни и претседателски, од поразени излегоа победници. Дали е победник тој што има 159 советници или 122? Но, тоа е реалноста, се занимаваат со тоа дека демек победиле на избори. Не само на овие, туку и на претходните – рече Ахмети.

Тој рече дека другите политички партии воделе кампања со националистички карактер.

– Почнувајќи со пропаганда пред кампања, кој бара албански нека бега во Албанија, во Косово, да доминира да се претставува дека оваа држава е само на Македонците. И од тука извираше мотото, за жал, „Македонија повторно твоја“. Ние се залагаме и ќе се залагаме, со најголема искреност, за европска Македонија, добри меѓуетнички односи, нула проблеми со соседите, така сметаме дека ѝ служиме на иднината, не на минатото. Имало секакви изјави ние корумпирани, криминализирани, јас стојам пред вас, јас сум предводник на студентското движење од 1981 и тогаш политиката од Белград, диригирана со политиките на Никола Пашиќ, ме нарече националист, сепаратист, иредентист, а модерната политика ме вика корумпиран и криминализиран, мене и мојата политичка партија – истакна Ахмети.

На новинарско прашање дали ќе се повлече од политиката, Ахмети рече дека не ги изгубил изборите за да го направи тоа.

– Дали слушнавте кој победи, зошто да се повлечам од политиката? Дали ги сакате резултатите, одете во ДИК и ќе видите. Ако може да видите дали за 25 години има еден пораз на Али Ахмети, тогаш ќе се повлечам. Еве ги резултатите, 25 години сме победувале, не само последниве 3 циклуси. Апсолутно не е пораз во Тетово и во Струга, на 2-ри ноември играта почнува од 0:0. За Чаир и Сарај во битки има и порази – рече Ахмети.

На прашањето дали ќе има соработка со други политички партии генерално во вториот круг, Ахмети одговори дека има такви можности.

– Мицкоски ги влече за уши своите партнери, ние сме отворени со сите да комуницираме за доброто на граѓаните. Ние се ангажираме за унитарна држава и ова не го велиме инцидентно но без селективна правда – рече Ахмети.

Партијата повика веднаш да се оди на предвремени парламентарни избори.

„Главниот заклучок од денешниот состанок на Централниот штаб на Демократската унија за интеграција беше јасен и едногласен: Веднаш да се оди на предвремени парламентарни избори! Оваа констатација ја делат и сите партнери во Националната алијанса за интеграција, кои проценуваат дека по 3 последователни победи на претседателски, парламентарни и локални избори, волјата на граѓаните е јасна, непроменета и за поддршка на НАИ“, соопшти ДУИ.

Фактите за локалните избори се тврдоглави и неоспорни, додава партијата.

„На изборите за општински совети, НАИ има водство од над 23.000 гласови на национално ниво; Во трката за градоначалници, разликата е над 21.000 гласови во корист на НАИ; НАИ има 159 советници, наспроти 122 од другиот политички табор; Доколку парламентарните избори се одржеа тој ден, НАИ би имала 20 мандати, наспроти 15 на политичките ривали. Во овој контекст, ДУИ оценува дека единственото решение за политичката и за институционалната стабилност на земјата се предвремени парламентарни избори. Граѓаните ја изразија својата волја 3 пати по ред и секој обид да се заобиколи оваа реалност е бесмислен и антидемократски. ДУИ бара мандатот да им се врати на граѓаните. Нека народот одлучи кој има легитимитет да ја води земјата и да го унапредува евроатлантскиот процес, еднаквата застапеност и политичката стабилност“, соопшти ДУИ.