МЕТА ГИ ИЗБРИША ПРОФИЛИТЕ НА РАСЕЛ БРЕНД Мистериозна порака се појави на профилот на актерот на Икс иако е тој во затвор

Расел Бренд остана без своите профили на Инстаграм и Фејсбук откако компанијата „Мета“ одлучи да ги отстрани поради кршење на правилата на платформите. Одлуката следуваше по судската пресуда со која 51-годишниот актер беше прогласен за виновен за силување на една жена и сексуални напади врз уште три жени.

На неговиот профил на Икс, кој сè уште има повеќе од 10 милиони следбеници, во средата, на 11 ноември, беа објавени снимки од екранот со известувањата од „Мета“. На нив се гледа дека Инстаграм го оневозможил неговиот профил, додека Фејсбук ја суспендирал неговата страница поради прекршување на стандардите на заедницата.

Заедно со снимките беше објавена и необична порака:

– Според Мета, Расел Бренд никогаш не постоел. Фала му на Бога за Илон Маск. Останете со нас.

There never was a Russell Brand, according to @Meta.

Thank God for @elonmusk.

Stay tuned. https://t.co/nZTZRfEYM1

— Russell Brand (@rustyrockets) November 11, 2026

Не е познато кој ја напишал пораката и кој во моментов управува со профилот на Бренд на Икс, со оглед на тоа што актерот се наоѓа во затвор.

Портпарол на „Мета“ потврдил за американскиот портал ТМЗ дека профилот на Инстаграм е отстранет бидејќи ги прекршувал правилата на компанијата. Според објавените информации, одлуката е донесена врз основа на правилата за интегритет на профилите, кои дозволуваат ограничување или отстранување на сметки поврзани со активности надвор од платформата што можат да предизвикаат штета. Во нив спаѓаат и профили на лица осудени за сексуални кривични дела.

Бренд беше осуден на 9 ноември во Лондон на 10 години и шест месеци затвор. Поротата го прогласи за виновен за силување на една жена во 2009 година и за три сексуални напади врз други жени во периодот од 2004 до 2008 година. Тој беше ослободен од две други обвиненија за силување и едно за обид за непристоен напад. Во текот на судењето ги негираше обвиненијата и се изјасни дека не е виновен.

Непосредно по пресудата, полицијата во Лондон соопшти дека разгледува и нови пријави и информации поврзани со Бренд. Претходно веќе се водеше истрага за уште две обвиненија за силување, а по завршувањето на судењето повеќе лица контактирале со истражителите со дополнителни информации и можни кривични пријави.

Интересно е што неговиот профил на Икс, каде што има повеќе од 10 милиони следбеници, останува активен. Сопственикот на платформата, Илон Маск, претходно јавно го поддржа Бренд и ја оцени затворската казна како неправедна.