РУСКАТА ВАКЦИНА ПРОТИВ РАК ДАДЕ РЕЗУЛТАТ Кај пациент исчезнале метастазите, 4 месеци нема нови тумори

Првиот пациент лекуван со руската персонализирана вакцина против рак „Неоонковак“ го завршил третманот, а претходно откриените метастази повеќе не се забележуваат на медицинските прегледи. Во изминатите четири месеци лекарите не откриле ниту нови туморски промени, соопшти научниот директор на рускиот Центар „Гамалеја“, академикот Александар Гинзбург.

Станува збор за 60-годишен маж од руската Курска област, кој боледува од меланом, агресивен вид рак на кожата. Тој во април годинава прв ја примил експерименталната персонализирана вакцина, а сега е под редовен медицински надзор.

Во интервју за рускиот медиум „Газета.ру“, Гинзбург објаснил дека пациентот секој месец се подложува на детални прегледи.

Лекарите користат компјутерска томографија со висока резолуција, при што особено внимание посветуваат на лимфните јазли и можната појава на нови тумори.

– Првиот пациент веќе го заврши лекувањето. Сега го следиме секој месец. Поминаа околу четири месеци и сè е во ред. На последниот преглед не откривме никакви нови туморски промени – изјавил Гинзбург.

На прашањето дали исчезнале и претходно откриените метастази, академикот одговорил потврдно.

Пациентот ќе остане под медицински надзор во следните 3 години, за да се утврди дали поволните резултати ќе се задржат.

Вакцината се изработува посебно за секој пациент

„Неоонковак“ се базира на технологијата на информациска РНК, позната како mRNA, која се користи за насочување на имунолошкиот систем.

За разлика од класичните вакцини што се применуваат за спречување заразни болести, оваа е наменета за лекување веќе постоечки рак.

Препаратот се изработува индивидуално, врз основа на генетските карактеристики на туморот кај конкретниот пациент.

Целта е имунолошкиот систем да научи да ги препознава специфичните карактеристики на малигните клетки и да ги нападне.

Според Гинзбург, кај првиот пациент научниците го следат и имунолошкиот одговор, односно активноста на клетките што учествуваат во уништувањето на туморите.

Тој тврди дека досегашните резултати се во согласност со очекувањата на истражувачите.

Вакцината ја примиле шестмина пациенти

Рускиот научник открил дека вакцината досега ја примиле шестмина пациенти со меланом.

Вториот пациент е приближно на половина од третманот, кој предвидува вкупно 10 примања на препаратот.

Гинзбург објаснил дека првиот пациент повремено имал температура од 38 до 38,5 степени, која се намалувала со лекови. Вториот, според неговите зборови, засега нема такви реакции.

Рускиот тим планира до крајот на 2026 година да започне лекување на вкупно 20 пациенти во Институтот „Херцен“, кој е дел од Националниот медицински истражувачки центар за радиологија.

Паралелно се подготвува примена на вакцината и во Башкирскиот државен медицински универзитет.

Истражувачите работат и на развој на слични персонализирани терапии за други видови рак, меѓу кои рак на белите дробови, мочниот меур и дебелото црево.