📽️ ФУДБАЛЕРОТ ГО ФАТИ ЗА ВРАТ, НАВИВАЧОТ МУ УДРИ ШЛАКАНИЦА Хаос на натпреварот Портсмут – Кардиф

Несекојдневен инцидент го прекина натпреварот меѓу Портсмут и Кардиф во англиската Чемпионшип лига, откако фудбалерот на гостите Кристијан Биелик влезе во физичка пресметка со млад навивач на домашната екипа.

Инцидентот се случи во 70 минута, при водство на Портсмут од 2:0. Биелик отишол до трибините за да ја земе топката, но млад навивач ја фрлил над него наместо да му ја врати. Според снимките од натпреварот, фудбалерот потоа го фатил навивачот за вратот.

Младиот навивач возвратил со туркање и удар кон Биелик, по што ситуацијата дополнително се вжештила. Други навивачи станале од трибините, а судијата Бен Спиди го прекинал натпреварот за да се смири ситуацијата.

Cardiff player Krystian Bielik grabs a young Pompey fan by the neck and the fan gets asked to leave… pic.twitter.com/n2cdfjMe3a

— James Hall (@ItsJamesHall) September 5, 2026

Прекинот траел околу три минути. Судијата разговарал со двајцата тренери и капитените на екипите, но Биелик не добил дополнителен картон, иако претходно, уште во деветтата минута, бил опоменат со жолт картон. Младиот навивач и неговото семејство биле отстранети од стадионот.

Инцидентот може да има последици за полскиот репрезентативец. Англиската фудбалска асоцијација (ФА) може дополнително да го разгледа случајот и да одлучи дали ќе покрене дисциплинска постапка. Засега нема официјално соопштение дека Биелик е суспендиран или казнет.

Портсмут на крајот славеше со 2:0, додека Биелик остана без дополнителна санкција за време на самиот натпревар.

Случајот веднаш предизвика бројни реакции на социјалните мрежи, а британските медиуми го споредуваат со други познати конфликти меѓу фудбалери и навивачи, меѓу кои и инцидентот на Ерик Кантона од 1995 година.