НОЌНА ПОЛИЦИСКА АКЦИЈА ВО СКОПЈЕ Лажни уплатници водат до штета од 13 милиони денари
Полицијата претресувала повеќе локации поради сомневања за финансиски злоупотреби при регистрација на возила.
Доцна синоќа полицијата спровела акција во Скопје поради сомневања за сериозен финансиски криминал. Припадници на Одделот за сузбивање на организиран и сериозен криминал претресле повеќе локации. Приведени биле повеќе лица.
Според неофицијалните информации, акцијата била забрзана откако еден од главните осомничени се обидел да ја напушти државата. Истражните органи потоа презеле мерки и ја почнале реализацијата.
Според информациите до кои доаѓаме, станува збор за случај во кој се сомничи дека преку лажирање на извештаи и уплатници при наплата на надоместоци за регистрација на возила биле прикривани и пренасочувани средства.
Во случајот се опфатени физички лица и правни субјекти. Неофицијално, некои од лицата се вработени и во државни претпријатија.
Првичната проценка е дека штетата надминува 13 милиони денари, односно повеќе од 210.000 евра. Акцијата продолжила и утрово, а во текот на денот се очекуваат информации од надлежните институции.