СО МАСОВНА СМС КАМПАЊА ГРАЃАНИТЕ СЕ ИНФОРМИРААТ КАКО ДА СЕ ЗАШТИТАТ ОД КОМАРЦИ Клековски најави состанок со надлежните за застоените води
Кампањата опфаќа испраќање на вкупно околу 38.500 пораки до граѓаните во општините во кои е прогласена епидемија.
Со цел граѓаните од засегнатите подрачја навремено да добијат совети за лична заштита од убоди на комарци, во тек е масовна СМС кампања за информирање на населението. Кампањата опфаќа испраќање на вкупно околу 38.500 пораки до граѓаните во засегнатите општини.
– Вчера (18 август) испратени се 6.526 пораки. Испраќањето започна во општина Петровец (1.554 пораки), а потоа продолжи во општина Гази Баба. На чекање за испраќање остануваат уште 31.365 пораки, кои постепено ќе бидат доставени до граѓаните во наредниот период. Досегашните резултати покажуваат висок степен на ангажираност. До 70 отсто од доставените пораки се прочитани од примачите и го посетиле линкот со дополнителни информации содржан во пораката – информираа надлежните.
Надлежните апелираат до граѓаните да ги почитуваат дадените препораки.
– Отстранете стоечка вода од дворот (тацни од саксии, стари гуми, канти) и редовно чистете ги олуците. Поставете заштитни мрежи на прозорци и врати. Избегнувајте престој надвор во зори и во самрак, кога комарците се најактивни. Носете облека со долги ракави и панталони и користете репеленти. При појава на симптоми – висока температура, главоболка, вкочанетост на вратот и слично, веднаш побарајте лекарска помош и известете го докторот за евентуален престој во засегнатите подрачја – се советите од надлежните.
Заклучно со 18 август, според последните податоци на ИЈЗ, во земјава се регистрирани вкупно 38 случаи на западнонилска треска од кои 36 се потврдени и два се веројатни. Од нив, 37 се во скопскиот регион, а еден е од Велес. Регистрирани се четири смртни случаи со невроинвазивна форма на болеста. Станува збор за машки лица на возраст од 62 до 83 години од Скопје, кои биле хоспитализирани во Клиниката за инфективни болети во Скопје. Кај три починати лица биле регистрирани коморбидитети. Од регистрираните случаи 28 се машки, а 10 се женски лица. Во изминатата недела, од 12 до 18 август, пријавени се 12 нови случаи, вклучувајќи три нови смртни исходи.
По прогласувањето епидемија на западнонилска треска во општините Кисела Вода, Гази Баба, Аеродром и Бутел, се преземаат мерки за контрола на комарците.
Државниот санитарен и здравствен инспекторат – ДСЗИ спроведе контрола на активности за дезинсекција во сите општини. Продолжуваат систематските и вонредните (по епидемиолошка индикација) активности за ларвицидна и адултицидна дезинсекција – авионска и терестичка – на територијата на Град Скопје и општините Гази Баба, Кисела Вода (населбата Драчево), Арачиново, Зелениково, Илинден, Петровец, Сопиште, Чучер Сандево и Велес. Заклучно со 14 август 2026 година спроведени се повеќе циклуси на третман, вклучително и дополнителни интервенции на стоечки водени површини во засегнатите подрачја.
– Мислам дека правиме максимум што можеме. Одговорно тврдам дека сите мерки се преземале, преземаат и ќе се преземаат понатаму – рече министерот за здравство Сашо Клековски и за во петок најави состанок со надлежните за застоените води.
– Едно лице со западнонилска треска во државата е на возраст од 20 до 29 години – потврди доктор Марија Гочевска од Институт за јавно здравје, одговарајќи на новинарско прашање.
Гочевска рече дека досега, сезонава, нема регистрирано деца со западнонилска треска.