ШТО СЕ СЛУЧУВА ВО ЗЕМЈОДЕЛСТВОТО? Трошоците на производството растат, но цените на готовите производи паѓаат

Трошоците во производството на земјоделски производи во јули годинава пораснале за 4,4% во однос на истиот месец лани, но цените на земјоделското производство се намалиле за 5,5%, покажуваат податоците на Државниот завод за статистика.

Кај инпутот, односно средствата вложени во земјоделското производство, цените на тековно потрошените средства во јули годинава биле повисоки за 3,7% во споредба со ланскиот  јули.

Највисок раст од 10,8% во овој делот на трошоците имаат цените на ветеринарните услуги и цените на енергијата и горивата од 7,9%. За една година за 3,9% пораснале и цените на средствата за заштита на растенијата како и на цената на семињата од 3,4%. Трошоците на земјоделците пораснале и кај ѓубривата од 2,2% и добиточната храна од 1,9%.

Уште поголемо зголемување од 8,9% е забележано кај цените на средствата наменети за инвестиции во земјоделството. Така транспортната опрема поскапела за 17,3%, а машините и опремата за 13,7%.

И покај високите влезни трошоци во земјоделското производство, во јули цените кај аутпутот, односно земјоделското производство, се движеле во спротивна насока.

Цените на растителното производство се намалиле за 6,8%, додека кај добиточното производство било регистрирано благо намалување од 0,2%.

Цените на овошјето и грозјето во јули споредено со истиот месец лани се пониски дури за 13,2%, на зеленчукот за 11,4%, а на добиточните растенија се намалиле за 3,7%. За 5,7% се намалиле и цените на производите од животинско потекло.

Раст на цените е забележан кај индустриските растенија и тоа за 19%, кај виното од 4,3%, како и кај компирот од 2,1%. Пораснала и цената на добитокот за колење од 9,5%.

Но, во јули нема промена на цената на пченицата и оризот во однос на ланските цени.