КРВАВА НОЌ ВО КСАМИЛ, ФРАНЦУЗИН ИЗБОДЕН НА ЛЕЖАЛКА Исплива досието на осомничениот за убиството
Младиот Франсес Мигел Мендес бил пронајден мртов на лежалки покрај плажа. Полицијата трага по 29-годишниот Сократ Вата, кој претходно бил осуден во Англија за дела поврзани со трговија со дрога.
Дваесетгодишен француски државјанин бил избоден до смрт во Ксамил, Албанија, а полицијата трага по 29-годишниот Сократ Вата. Жртвата, Франсес Мигел Мендес, била пронајдена мртва на лежалки покрај плажа, во близина на локал.
Зад осомничениот стои бурно криминално минато во Англија. Вата двапати бегал од британската полиција за само 17 дена во април 2024 година. Во едниот случај зад себе оставил превртено возило со кокаин. Во другиот фрлил пакет кокаин во грмушка и се скрил во двор, пишува Албеу.
Првичните сознанија на албанската полиција укажуваат дека на убиството му претходила расправија од банални причини. Се сомнева дека Вата го нападнал 20-годишниот Французин со нож, а потоа избегал.
Полицијата почнала потрага по осомничениот и работи на целосно расчистување на околностите.
Две бегства од полицијата за само 17 дена
Првиот од двата инцидента во Англија се случил на 13 април 2024 година во Кент. Вата управувал возило со клонирани регистарски таблички и не застанал на полициска наредба.
Бегството завршило кога автомобилот се превртел на патот А20 кај Ист Малинг. Вата избегал, а полицијата во возилото пронашла кокаин и регистарски таблички.
Само 17 дена подоцна следувала нова потера.
Бегал, возел, фрлал кокаин, се криел
Вата управувал сива „тојота РАВ4“, пријавена како украдена. Кога полицијата се обидела да го запре во Кембриџ, тој повторно избегал.
Потерата продолжила низ повеќе улици. Вата во еден момент запрел за да излезе сопатник, а потоа продолжил да бега. На крајот го напуштил автомобилот и продолжил пеш. Додека бегал, фрлил пакет кокаин во грмушка.
Полицајците подоцна го пронашле како се крие во задниот двор на куќа.
Криминална „кариера“, па 5 години затвор
Вата подоцна бил осуден во Англија на пет години затвор. Меѓу делата за кои се изјаснил за виновен биле две обвиненија за поседување дрога од класа А со намера за продажба и две за опасно возење.
Тој признал и поседување канабис и возење под дејство на дрога.
Албанската полиција сега го поврзува со многу потешко дело. Според досегашните информации, 20-годишниот Мендес бил смртно избоден по конфликт во близина на плажата во Ксамил.