ЕУ ГО ВРАТИ КОНТРОВЕРЗНИОТ „CHAT CONTROL“ Платформите повторно ќе можат да ги скенираат приватните пораки
Откако Европарламентот даде зелено светло за мерка со која полесно ќе се откриваат пораки поврзани со сексуална злоупотреба на деца, критичарите предупредуваат на ризик од масовен надзор на приватните пораки на социјалните мрежи. Сепак, усвоениот амандман вели дека мерката нема да се употребува за пораки до кои пристап имаат само испраќачот и примачот.
Европскиот парламент даде зелено светло за повторно воведување на контроверзната мерка позната како „Chat Control“, со која онлајн платформите ќе можат доброволно да ги анализираат приватните комуникации за откривање материјали поврзани со сексуална злоупотреба на деца.
Мерката ќе важи до 3 април 2028 година, додека институциите на Европската Унија продолжуваат да преговараат за трајна регулатива во оваа област.
Следење на пораки, но не и задолжително
Новата одлука не воведува задолжителен надзор и не им дава директен пристап на владите до приватните пораки. Сепак, платформите ќе можат доброволно да користат алатки за откривање сомнителни содржини, вклучително и материјали за сексуална злоупотреба на деца и обиди за регрутирање малолетници преку интернет.
Поддржувачите на мерката тврдат дека без вакво решение би се создал правен вакуум во борбата против ваквите кривични дела.
Приватност или безбедност?
Токму тука се наоѓа и најголемата контроверза. Критичарите предупредуваат дека мерката отвора простор за масовно следење на комуникациите на милиони граѓани кои не се осомничени за никакво кривично дело.
Според нив, заштитата на децата не смее да стане изговор за постепено ограничување на дигиталната приватност. Од друга страна, поддржувачите нагласуваат дека станува збор за алатки кои и досега биле користени во рамки на привремениот режим што важеше од 2021 до 2026 година.
Парламентот ја заштити енкрипцијата
Една од клучните измени што ја усвои Европскиот парламент се однесува на енкрипцијата од крај до крај.
Според усвоениот амандман, мерката нема да се применува на комуникации заштитени со ваков тип енкрипција, односно на пораки до кои пристап имаат само испраќачот и примачот.
Ова беше едно од главните барања на организациите за дигитални права.
Прашањето останува отворено
Иако привремената мерка сега е продолжена, конечната битка допрва следува.
Европската Унија сè уште нема усвоено трајна регулатива за таканаречената „Контрола на разговорите“, а преговорите меѓу Европската комисија, Европскиот парламент и земјите-членки продолжуваат.