ОТВОРЕНА ИСТРАГА ЗА ЗЛОУПОТРЕБИ ВО ЦАРИНАТА Обвинителството бара притвор за четворица осомничени

Поранешниот директор на Царинската управа е меѓу четворицата осомничени во новата истрага што ја отвори Основното јавно обвинителство за гонење на организиран криминал и корупција по кривична пријава од Управата за финансиска полиција.

Покрај екс-директорот, под истрага се и поранешен помошник-директор на Царинската управа, управител на фирма и вработен во истата компанија. Според Обвинителството, тие се сомничат за злоупотреби при јавна набавка за одржување на хигиената на граничните премини и царинските терминали.

Истрагата се однесува на периодот од јули 2023 до март 2024 година, кога, според сомнежите, била изиграна постапката за доделување на договори за јавна набавка. Обвинителството тврди дека преку фаворизирање на одреден економски оператор и ограничување на конкуренцијата, на избраната фирма ѝ била овозможена противправна имотна корист од 18,4 милиони денари.

Според наодите на истрагата, осомничениот поранешен директор на Царинската управа наводно го искористил своето службено влијание за тендерската постапка да заврши во корист на избраниот понудувач. Второосомничениот, кој бил помошник-директор, според сомнежите влијаел врз други компании да не учествуваат во завршната фаза од постапката.

Обвинителството наведува дека во текот на истрагата биле обезбедени и докази за примање и давање награда за противзаконито влијание. Според сомнежите, првоосомничениот примил 111.600 денари за користење на службената положба и влијание.

За четворицата осомничени обвинителот ќе побара мерка притвор, а за случајот ќе одлучува судија на претходна постапка во Основниот кривичен суд Скопје.

Истрагата е во почетна фаза, а надлежните институции најавуваат дека ќе продолжат со прибирање докази за утврдување на сите околности поврзани со случајот.