АЗИСКИТЕ ЗЕМЈИ ПРЕД ЦЕЛОСЕН ПРЕКИН НА СНАБДУВАЊЕТО СО ГАС ОД БЛИСКИОТ ИСТОК Прво на удар производството на струја

Азиските земји се подготвуваат за целосно запирање на снабдувањето со течен природен гас (LNG) од Блискиот Исток во наредните денови, што сериозно го загрозува производството на електрична енергија и индустриските операции во регионот.

Блокадата на Ормускиот теснец и повторените напади врз најголемиот светски извозен комплекс за LNG во Катар резултираа со губење на околу 28 милиони тони оваа година – речиси целиот проектиран глобален раст на снабдувањето со LNG за 2026 година. Враќањето на нивоата пред војната може да потрае со години.

– Зборуваме за значително стеснување на пазарот – зборуваме за намалено производство до крајот на деценијата – изјави Хенинг Глојстин, директор за енергетика во „Евразија груп“ за „Њујорк тајмс“.

Азија, која купува околу 90% од LNG произведениот на Блискиот Исток, досега сметаше на  залихите што веќе беа на море пред затворањето на теснецот. Сепак, последните бродови ќе пристигнат во следните неколку дена, по што ќе има сериозен јаз помеѓу понудата и побарувачката. Тој јаз нема значително да се намали пред 2028 година, кога се очекува нов бран на производство на гас во САД.

Најголемите азиски економии – Кина, Јапонија, Индија и Јужна Кореја – како и земјите во развој како Виетнам и Тајланд, во голема мера се потпираат на течен природен гас (LNG) за производство на електрична енергија. Ова неочекувано нарушување го загрозува индустриското производство и може да ја доведе во прашање идната подготвеност на регионот да се потпира на овој извор на енергија.

Првите знаци на притисок се веќе видливи. Земјите што можат да го сторат тоа се префрлаат на производство на електрична енергија од нафта и јаглен, а во некои случаи агресивно ја намалуваат потрошувачката. Овие мерки веројатно ќе се интензивираат како што продолжуваат воените нарушувања на енергетските текови, предупредуваат енергетските експерти.