📷 🎬 ТОПКАТА ЗА КОНЦЕРТИ ВО ЛАС ВЕГАС КАКО ОД ДРУГ СВЕТ Ја сефтосаа U2, Боно беше зашеметен
Целото ова место се чувствува како педала за изобличување на умот, признал Боно на концертот кога на 80 метри над публиката и бендот се проектирале слики како во планетариум.
Џиновски топчест „вселенски брод“ наменет за концерти беше сефтосан во Лас Вегас, а Американците зборуваат за тоа како изгледа необичната концертна сала. На нејзините ѕидови се проектираат најразлични пејзажи и слики во движење. Честа да ги одржат двата први концерти во салата ја имаа U2, популарниот ирски бенд.
Но, едно е однадвор да ги видите проекции во калотата вредна 2,3 милијарди долари. Одвнатре, пишува Си-Ен-Ен, е како да сте во планетариум, ама џиновски, хипер-планетариум, „џиновски вселенски брод“.
Оваа топка е и најголемата сферична структура во светот, во моментов. Висока е 111 метри, а широка 157. Внатрешноста може слободно да ја збере Статуата на Слободата, сосе факелот и да остане простор, да не биде кнап.
Дали е ова иднината на забавата, на мултимедијалноста?
– Тоа е огромно искуство визуелно… беше воодушевувачки – изјавил Дејв Зитиг, кој патувал со неговата сопруга Трејси од Солт Лејк Сити за шоуто во саботата вечер.
Видеосликите биле проектирани на 80 метри над сцената, но успеале да го зачудат и Боно, пејачот на групата.
– Целото ова место се чувствува како педала за изобличување на умот – рекол тој пред публиката.
Брендон Григс за Си-Ен-Ен го опишал своето искуство со „топката“:
„Откако ќе влезете внатре, ќе наидете на атриум со висок таван со висечки скулпторски мобилни телефони и долги ескалатори кои водат до горните нивоа. Но, вистинската привлечност е театарот и неговото опкружено ЛЕД платно, кое може да се пофали со 268 милиони видео пиксели. Тоа звучи како многу“, пишува тој и додава:
„Екранот е импресивен, и толку доминантен што понекогаш ги обзема живите изведувачи. Понекогаш не знаев каде да погледнам – во бендот што свири во живо пред мене или во блескавите визуелни слики што се случуваат насекаде на друго место“.
Картата за концертот на U2 чинела od 400 до 500 долари. Шоуто започна во петокот вечерта со лавина од гужва и премиера на црвениот тепих на која присуствуваа Пол Макартни, Опра, Снуп Дог, Џеф Безос и десетици други познати личности.