ГОЛТАРИ ДОАЃААТ, МИЛИЈАРДЕРИ СИ ОДАТ Мицкоски предлага да се направи ветинг на политичарите

Не треба спуштање на дебатата на ниво на естрада за да се провери потеклото на имот на политичарите кои влегоа во политиката како голтари, а потоа излегоа како милијардери, изјави лидерот на ВМРО-ДПМНЕ, Христијан Мицкоски, кој побара да се направи потекло на имот на политичарите во Македонија.

Според него, не треба нов закон или законски измени за ова да се реализира.

– Во политиката имаме многу политичари кои влегоа како голтари, а излегоа како милијардери. Ценам дека имотот на голем дел од тие политичари и нивниот потесен круг на семејство во прв ред – изнесува во милијарди. Пред да влеземе во ветинг на судството кој е памфлет од барање, јас сметам дека треба да се искористат постојните законски надлежности кои ги има Управата за јавни приходи и другите институции и да направиме ветинг на политичарите. Еве, нека почнат од мене и моето семејство, како прв пример. Јас сѐ ќе ставам на увид и ќе покажам потекло на имот. Во Македонија можете да го видите едноставено потеклото на имотот. Доволно е да видите само луксузни недвижности, да видите колку луксузни автомобили се возат и ќе видите кои се тие луѓе. Побарајте им го потеклото на имотот ќе видите дека немаат пријавено ниту еден процент од тоа кое го поседуваат – рече Мицкоски.