КОЈ СОЈ ГИ НАПОЛНИ ДЕТСКИТЕ КЛИНИКИ? Студија открива какви симптоми развиваат децата од омикрон, а какви од делта

Кај многу мали деца, омикрон варијантата на коронавирусот предизвикува помалку тешка болест во споредба со варијантата делта, според една нова американска студија.

Истражувачите ги разгледаа податоците за речиси 80.000 американски деца на возраст под 5 години кои првпат биле заразени со коронавирус, вклучително и 7.201 дете заразено кон крајот на декември или почетокот на јануари, кога омикрон предизвика повеќе од 90 проценти од случаите.

По разгледувањето на другите фактори на ризик, вклучувајќи ги здравствените состојби и социо-економските фактори, истражувачите открија дека децата инфицирани за време на бранот со омикрон имаат 29 отсто помал ризик од посета на собата за итни случаи, 67 отсто помал ризик од хоспитализација, 68 отсто помал ризик да имаат потреба од интензивна нега и 71 отсто помал ризик од потреба од машини за дишење во споредба со децата заразени со делта.

Сепак, „поради зголемената преносливост на омикрон, вкупниот број на посети на одделот за итни случаи, хоспитализации, интензивна нега и употреба на механички респиратори кај деца сè уште може да биде поголем“ со омикрон отколку со делта, според извештајот објавен на medRxiva.

Истражувачите, исто така, забележаа дека стапките на инфекција биле непропорционално повисоки кај црните и латиноамериканските деца и за омикрон и за делта во оваа возрасна група, а јазот се зголемил за инфекции со омикрон, рече водачот на студијата Ронг Ксу од Медицинскиот факултет на Универзитетот „Case Western Reserve“.

Необјавените податоци покажуваат дека „децата на возраст под 5 години имале највисока стапка на омикронска инфекција“ во споредба со постарите деца и возрасните во сите возрасни групи, вели Ксу.