Османи по прозивката од Мицкоски за барањето на Захариева за нов договор: Не коментирам шпекулации

Шефот на дипломатијата Бујар Османи како шпекулација ја оцени иајавата на лидерот на ВМРО-ДПМНЕ Христијан Мицкоски дека неговата бугарска колешка Екатерина Захариева на нивната прва средба во Софија, минатата недела, побарала двете влади да потпишат нов договор сличен на Преспанскиот.

– Не можам да коментирам шпекулации – ни одговори кусо Османи преку смс порака.

На прашањето дека не станува збор за шпекулација туку за изјава на опозицискиот лидер во интервју за Канал 5, Османи остана на ставот дека веќе одговорил.

Мицкоски во интервјуто јавно го повика министерот за надворешни работи Османи да каже дали е точно дека Захариева тоа го побарала.

– Да го прашаме Бујар Османи дали Захариева барала да се потпише нов договор сличен на Преспанскиот договор со уставни измени каде што ќе се дефинира постоењето на македонската нација и јазик од 1945 година па наваму, додека, пак, пред 1945 година ние сме биле нешто друго. Еве да го прашаме Бујар дали ова е точно и дали токму тие барања се услов за понатамошно продолжување на преговорите со ЕУ – рече Мицкоски.